Esita 1 - Luganuzi Luswanu Kuli Wanhu Wose 2002

Vashiti mugolece wo mutemi yakulibedegala lilajilizo lyo Mutemi Ahasuwelo

¹ Mutemi Ahasuwelo mu madaha lono yali yatemile, yali yatemile yisi yigana limonga na makumi mejete na mupunghati, ku wulawilila Indiya, sunga Kushi.

² Ne ligoda lyakwe lyo wutemi, lyali lili mwi'kaya liwaha lya Susa.

³ Na mu mwaka we kadatu wa mu wuteme wakwe, mutemi Ahasuwelo, yakanoza sikukuu mbaha, yakawalalika i wawaha ne vitung'ati wose wa mu yisi ya Pelisiya no Wumedi. Kanyhi ne wetumbilwa wose wa mu yisi yakwe, wakacemwa ho yaduwane nawo.

⁴ Ne sikukuu yiyi, yikasola myezi mutandatu, mutemi yakawalajila wugoli wakwe, ne zindigwa zinhambule ze citemi-temi.

⁵ Sikukuu yiyi yaza kuwa yamalika, kanyhi yakawanozeza sikukuu yinji, i wawaha ne wanhu wose i wagoli ne waciwa, wono wekalaga mwi'kulu lya Susa. Nayo sikukuu yiyo, yikajendelela sunga vilo mupunghati, yanozezwa mu luwa mu busitani ye likulu.

⁶ Kaya yiyo, yali hambwe ne mapaziya ge vitambala vye buluu ne vizelu, vyo wuguzi wukamu, gawopigwe ne vilejehe viswanu, vye liwala lidunghu na lye buluu, matumbikwe mu zinyamwidole za fweza, mu masumbili ge libwe. Ne vitanda navyo, vyali vya zahabu na fweza, vili mucanyha ye sakafu ya malumalu, mabwe madunghu ne mazelu, na ge manjano, ne matitu.

⁷ Ha wung'we we divayi, vyetumamilwaga vikombe vya zahabu, navyo vyose vyali visimajiye, hali hasina cono cali cihwanile ne ciyagwe. No mutemi yakawa mucemezi muno ne divayi yiyo ye citemi.

⁸ Ne divayi yikawa nyinji muno, sunga no mutemi yakawalajiliza wetumami wa mwi'kulu wamugawile munhu wo wose mu nghango nha vyono yakusaka kung'wa.

⁹ Vashiti nayo yali yanozize zindigwa ze sikukuu so we cicekulu, mu mulya mwi'kaya lyo wutemi.

¹⁰ Mwizuwa lyo mupunghati lya mu sikukuu yiyi, mutemi Ahasuwelo lono yang'wezaga, yakawa na nyemo mbaha. Baho yakawacema wetumami wakwe i wapaswe, mupunghati, wono wali wali mu mulimo, Mehumani, Bizita, Halebona, Bigita, Abagita, Zetali na Kalekasi.

¹¹ Yakawatuma wakamulete Vashiti, yaze yavwalile no mukumbo wakwe wo wutemi. Vashiti yali mucekulu muswanu ku wulangwe. Mutemi Ahasuwelo yasakaga kuwulajila wuswanu wo mugolece wakwe kuli wawaha ne wajenzi wose.

¹² Wetumami wawalya i wapaswe, wali weza kumulonjela Vashiti lilajilizo lyo mutemi Ahasuwelo, Vashiti yakalema kubita. Ne nghani yiyi yikamukalaza muno mutemi.

¹³ Moto wo mutemi, yali yendile kuwawuza i wetumbilwa wakwe zo wityatye no wulajilize we yisi.

¹⁴ Kenji muno yawawuzaga Kalishena, Shetali, Adimata, Talishishi Melesi, Malisena, na Memukani, i wawaha wa mu yisi ya Pelisiya na Wumedi, wono wali webate wulajilize wuwaha mu wutemi wakwe, muli wene, nani mono kumulonjela co kumutendela Vashiti.

¹⁵ Yakawawuza yakatya, “Ane no mutemi Ahasuwelo, nhuma wetumami wangu i wapaswe kuli Vashiti, wamulonjele yaze. Ninga Vashiti kabena wulajilize wangu kalema kuza! Alu wulajilize, wukutya nhawule, cono cimutendele Vashiti so cibede cakwe?”

¹⁶ Memukani yakalonga ha mwande yo mutemi ne wawaha wayagwe yakatya, “Mugolece yuyu Vashiti, siyamubedegaye du mutemi, langa kacibedegala sunga na sese wose ne wawaha wose, hamonga ne wanhu wose wa mu wutemi wako!

¹⁷ Wacekulu wose wa mu wutemi wako, hono wahulice nghani ayi yono Vashiti yetumile, nawo wokwanza kuwabedegala walume zawo. Wotya, ‘Mutemi Ahasuwelo yamulajiliza mugolece wakwe Vashiti yaze ha mwande yakwe, ninga Vashiti yalema kubita.’

¹⁸ Hono wacekulu wa mu wutemi wako wa mu Pelisiya na Wumedi, wahulice cibede ca Vashiti, hodu nawo yowa yo nongwa ku walume zawo, kanyhi wowa wena cibede nhondo zose ku walume zawo. Walume zawo nawo wowa kuwakolelwa yikuwo wagolece zawo.

¹⁹ Holeka hono wuwone viswanu, go Mulumbwe, wulavye wulajilize wukali mu wutemi wako, vyono, Vashiti yalece kanyhi kuza ha mwande yo mutemi. Lajilize mu matumbi gose ga mu yisi yako yo Pelisiya no Wumedi, no wulajilize wuwo, wuwe wono siwulakawanika yaye. Hanyuma wumulondole mugolece yunji mono mutuvu, yo yapegwe lilumbo lyo wugolece wo mutemi.

²⁰ No wulajilize wuwu hono wuwe walongwa no kumanyika kuli wanhu wose mu wutemi wako, hodu, wagolece wose wa mu yisi yako, wowa kuwatumamila viswanu walume zawo, hambe nha mulume muciwa hamba mugoli.”

²¹ Mutemi Ahasuwelo hamonga ne wawaha wayagwe ne vitung'ati wose, ne wetumbilwa wose, wakendezwa ne zinghani zono yalonga Memukani. Nayo mutemi yaketuma nhavivyo.

²² Yakalitegula lilajilizo lili, mu matumbi gose ga mu wutemi wakwe, yitumbi ne milonjele yayo, na mu candicile cayo. Lilajilizo lyono lyatezaga, “Mulume wo wose, yeze yo muwaha mu kaya, no kuyanza nghani yiyi mu nonga ye wanhu wakwe.”