Wukumbucize wo Wulajilize 30 - Luganuzi Luswanu Kuli Wanhu Wose 2002

Wulajilize wo kulipa, no wumoteswe wayo

¹ “Alu nakondya kumulecelenyi welecele, wo kwihagulila nyenye nyo weneco muli zizi zi nyejete, wumoteswe no wulijitwe. Nanye kolo zinghani zikumwijelelenyi, lono muli kuko mwikaye mu makungugo, gono Muwaha Mulungu yamuwinjilenyi, nhondo, ho molokumbucila nha vyono munojeye muhagule nyenye nyo weneco muli zizi zi nyejete zono nghumulecelenyi.

² Na hono mwihwese nyenye hamonga ne wana wenyu, mumuwuyile Muwaha Mulungu, u Mulungu wenyu, kwe zinhumbula zenyu zose, kanyhi mugebate ne malajilizo gaga gono nghumulajilizenyi izuwali,

³ ale, Muwaha Mulungu, u Mulungu wenyu, nayo komuwonelenyi nanye lusungu. Nayo komukongholezenyi kanyhi hamonga, no kumugomolenyi mu wulawa mu makungugo gono yali yakondya kumwiyagazizenyi kuko, kanyhi komumotyenyi.

⁴ Hamba muwe mwiyagaye caka ako na ako mono yinze yose, ninga mwene Muwaha Mulungu, u Mulungu wenyu, komukongholezenyi du, no kumugomolenyi kanyhi,

⁵ ho muyihale kanyhi yisi yono walezi wenyu wali wayitemile. Nayo komumotyenyi muno muno, kanyhi komonjelezenyi muwe muli wenji si nhe walezi wenyu.

⁶ Kanyhi Muwaha Mulungu, u Mulungu wenyu, komupelenyi nyenye hamonga ne wana wenyu nhumbula yono yina cihuliko kuli mwene, ho mumwende kwe zinhumbula zenyu zose, kanyhi ho mujendelele kwikala mu yisi yiyo.

⁷ Kanyhi kowuwusa wulijitwe wono wuli muli'nye, yawutajile muli walugu wenyu wono wamusulilenyi no kumwiwonelenyi,

⁸ nanye nhondo ho momuhulika Muwaha Mulungu, u Mulungu wenyu kanyhi no kwibata i malajilizo gaga gose gono nghumulonjelenyi izuwali.

⁹ Nayo Muwaha Mulungu, komumotyenyi muno muno muli milimo yenyu yose. Mowa mwina wana wenji ne mitugo minji muno, ne migunda yenyu, yowa kulavya nhwanga mbaha muno muno. Nayo kosangalala muno kumumotyenyi, nha vyono yali yawamotizye walezi wenyu.

¹⁰ Ninga munojeye nanye mumuhulice mwene, no kwibata malajilizo gakwe gose gono gandicigwe mu citabu cici, i malajilizo ge mejizo gakwe. Holeka munojeye mumuwuyile, kwe zinhumbula zenyu zose.

¹¹ “Ne lilajilizo lili lyono nghumupelenyi izuwali, hamba si yikamu yaye, kanyhi hamba si lili kutali nanye.

¹² Hamba si lili kucanyha mu mavunde yaye. Holeka musina soko yo kuwuza muwe kutya, ‘Alo nani mono kosuma kubita kuko kucanyha yakacitimizye lilajilizo lilyo, nase ho cilihulice no kulikamisa?’

¹³ Kanyhi hamba si lili ku nhumbi nzagwe ye lilenga yaye. Holeka musina soko yo kuwuza muwe kutya, ‘Alo nani mono kosuma kulowoka lilenga, yakaciletele lilajilizo lilyo, nase ho cilihulice no kulikamisa?’

¹⁴ Ng'o yaye, hambi lilajilizo nha lili bahano, kanyhi lili muli nyenye, mu zinhumbula zenyu, nanye mukondizye no kulimanya, alu mukusakwa mulikamise du no kwituma.

¹⁵ “Alu izuwali nane nghumupelenyi welecele wo kwihagulila nyenye nyo weneco, muli zizi zi nyejete, muli ziswanu ne zimbi, na muli wumi ne lifwa.

¹⁶ Hono mugebate malajilizo go Muwaha Mulungu, u Mulungu wenyu, gono nghumupelenyi izuwali, hono mumwende, kanyhi mumuhulice no kugebata malajilizo gakwe gose, mbeka momoteswa, kanyhi mowa nghungugo mbaha muno muno. Nayo Muwaha Mulungu wenyu, komulugutizenyi muno muno mu yisi yono moyisola yiwe yenyu.

¹⁷ Ninga hono mwijelele du muzibedegale zizi, no kuwa musina cihuliko, mukwegwe, muyihembe milungu yinji no kuyitumamila,

¹⁸ mumanye vyono mbeka mokongomelela lukulu. Holeka ane nghumusugulenyi izuwali. Hamba si mosuma kwikala vilo vinji mu yisi yiyo yono yili ku nhumbi ye likolongo lya Yoludani yono moyisola yiwe yenyu.

¹⁹ Holeka ane izuwali nghumupelenyi welecele, mwihagulile nyenye nyo weneco muli zizi zi nyejete, muli wumi ne lifwa, na muli wulugutwe wo Mulungu no wulijitwe wo Mulungu, nane nghusaka wulanga ne yinze, viwe vihomelezi vyenyu, kuli cono nyenye mocihagula. Ninga ane nghumutyenyi, muhagule wumi, ho mowumipa, nyenye, hamonga ne wana wenyu.

²⁰ Mumwende Muwaha Mulungu, u Mulungu wenyu, mumuhulice, kanyhi muwe muli wehuwilwa kuli mwene, holeka nyenye hamonga ne wana wenyu, mosuma kwikala vilo vinji, mu yisi yono yehuwiza vyono kowapela i walezi wenyu Abulahamu, na Isaka, na Yakobo.”