Wukumbucize wo Wulajilize 27 - Luganuzi Luswanu Kuli Wanhu Wose 2002

I malajilizo go Muwaha Mulungu, mandikwe mu mabwe

¹ Hanyuma kanyhi Musa hamonga ne walongola we wanhu wa Isilayeli, wakawalonjela Waisilayeli wakatya, “Alu mugebataje mejizo gono nghumupelenyi izuwali,

² Mwi'zuwa lyono molowa mweza kusaka kulilowoka likolongo lya Yoludani, no kwinjila mu yisi yono Muwaha Mulungu, u Mulungu wenyu, yakumupelenyi, ale, mwi'zuwa lilyo, nhondo musimye mabwe mawaha, mugakandilize ne lilongo,

³ hanyuma mwandice mu mhelo yago zinghani zose ze malajilizo ne mejizo gaga. Na kolo mwakondya kulilowoka likolongo no kwinjila mu yisi yiyo swanu, kanyhi yono yina moso mwinji, yono Muwaha Mulungu, u Mulungu we walezi wenyu, yakumupelenyi.

⁴ Na kolo mwakondya kulowoka ku nhumbi nzagwe ye likolongo lya Yoludani, ale, mugasimye mabwe gago mwi'tunda lya Ebali, nha vyono nghumwijizenyi izuwali, mugakandilize ne lilongo.

⁵ Hanyuma muzenje cikumbicilo baho ca mabwe, ninga mabwe gago, mulece kugasesa na citwalo co cose ca cuma.

⁶ Hambi nha munojeye mumuzenjele Muwaha Mulungu cikumbicilo kwe mabwe gono si masese yaye. Na mu cikumbicilo cico, mumulavizye Muwaha Mulungu makumbiko, ge cilavywa cinyanywe.

⁷ Na baho kanyhi mulavye ne vilavywa vyenyu vyo mulamu, muvilile baho musangalaye, akuno mwina ne lilumbo hali Muwaha Mulungu, u Mulungu wenyu.

⁸ Mabwe gago gono mowa mwakondya kugakandiliza ne lilongo liswanu, ale, mugandice calinze mu mhelo yayo, zinghani zose zo wulajilize wuwu wo Muwaha Mulungu.”

⁹ Nayo Musa hamonga ne wakohani Walawi, wakawalonjela wanhu wose Waisilayeli wakatya, “Ta hulicizenyi 'nye nyo Waisilayeli, muteje makutu muhulice. Izuwali anye mweza wanhu wo Muwaha Mulungu, u Mulungu wenyu.

¹⁰ Holeka munojeye mumuhulice kanyhi mwibate ne malajilizo gakwe gono nghumulonjelenyi izuwali.”

Wulijitwe kuli wono wasina cihuliko

¹¹ Kanyhi Musa yakawalonjela Waisilayeli yakawatya,

¹² “Kolo mwakondya kulilowoka likolongo lya Yoludani, ale we milango ayi yono yityatizye, wokwima he 'tunda lya Gelizimu, mu cipango lono wulugutwe wukulavywa kuli wanhu, nha cinji wo mulango wa Simiyoni, na wa Lawi, na wa Yuda, na wa Isaka, na wa Yusufu, na wa Benyamini.

¹³ Nawo we milango ayi yono yityatizye, wawe wemile mwi'tunda lya Ebali, lono wulijitwe wukulavywa, nawo wowa, mulango wa Rubeni, na wa Gadi, na wa Asheli, na wa Zabuloni, na wa Dani, na wa Nafutali.

¹⁴ Nawo Walawi baho, wolonga zinghani azi kwe mazi mawaha, wawe kutya,

¹⁵ “ ‘Malijito go Mulungu, geze muli munhu wo wose mono kosesa cihwani ce libwe hamba ce libici, hamba ca cuma, yawe kucihemba cinyele. Hambi Muwaha Mulungu, nha si yazendile zizo.’ “Nawo wanhu wapitule wose hamonga watye, ‘Heya!’

¹⁶ “Malijito go Mulungu, geze muli munhu wo wose mono yasina cihuliko kuli sogwe hamba kuli nyina. “Nawo wanhu wapitulile wose hamonga watye, ‘Heya.’

¹⁷ “Malijito go Mulungu, geze muli munhu wo wose mono yakuteza citanjilo ce mimbi yo muyagwe. “Nawo wanhu wapitulile wose hamonga watye, ‘Heya.’

¹⁸ “Malijito go Mulungu, geze muli munhu wo wose mono yakumutonga munhu mubofu, kawa kumwajiliza nzila ne nyono. “Nawo wanhu wapitule wose hamonga watye, ‘Heya.’

¹⁹ “Malijito go Mulungu, geze muli munhu wo wose mono yakuyiweyanga ling'ani ye wajenzi, hamba ye wana wono wasina walezi, hamba ye wacekulu wafwile. “Nawo wanhu wapitule wose hamonga watye, ‘Heya.’

²⁰ “Malijito go Mulungu, geze muli munhu wo wose mono yakumukoza sogwe cevu, so kugona na yumonga wa muli wagolece wo sogwe. “Nawo wanhu wapitule wose hamonga watye, ‘Heya.’

²¹ “Malijito go Mulungu, geze muli munhu wo wose mono kogona ne lilimu. “Nawo wanhu wapitule wose hamonga watye, ‘Heya!’

²² “Malijito go Mulungu, geze muli munhu wo wose mono kogona no lumbulye mono vihanjile sogwe no nyina, hamba lumbulye mono vihanjile sogwe du, hamba nyina du. “Nawo wanhu wapitule wose hamonga watye, ‘Heya.’

²³ “Malijito go Mulungu, geze muli munhu wo wose mono kogona no mukwewe we cicekulu. “Nawo wanhu wapitule wose hamonga watye, ‘Heya!’

²⁴ “Malijito go Mulungu, geze muli munhu wo wose mono komuwulaga muyagwe cizilago. “Nawo wanhu wapitule wose hamonga watye, ‘Heya!’

²⁵ “Malijito go Mulungu, geze muli munhu wo wose mono yakubocela mafupo, ho yamuwulaje munhu mono yasina masutya. “Nawo wanhu wapitule wose hamonga watye, ‘Heya!’

²⁶ “Malijito go Mulungu, geze muli munhu wo wose mono si yakugebata malajilizo go Mulungu hamonga ne mejizo gakwe. “Nawo wanhu wapitule wose hamonga watye, ‘Heya!’ ”