Biblia Todo Logo
Bìoball air-loidhne

- Sanasan -

Wukumbucize wo Wulajilize 13 - Luganuzi Luswanu Kuli Wanhu Wose 2002

1 “Na hono yejele muli nyenye muwizi, hamba mulolosa ndoto, mono kolajila citanjilo hamba mezino, yawe kutya,

2 ‘Alenyi cihembe no kuyitumamila milungu yinji, yono nanye mukali hamba si nayimanya.’

3 Anye mulecele lukulu kuzihulicila zinghani zakwe munhu yuyo. Hambi Muwaha Mulungu wenyu, nha yakumujelenyi, ho yamanye hono mbeka mumwendile mwene kwe zi nhumbula zenyu zose, na kwe mitima yenyu yose.

4 Ninga anye mumutyatye du Muwaha Mulungu, mumupele cogopo, kanyhi mumuhulice mwene, mwibate ne malajilizo gakwe, mumuhembe mweneco du yali wene, kanyhi mweze muli wehuwilwa kuli mwene.

5 No muwizi yuyo hamonga no mulolosi we zindoto, awo wanojeye wawulagwe, vyono wakujela kumunozenyi ho mumubedegale Muwaha Mulungu wenyu, mono yamuwusenyi ku wulawa ku Misili, yakamukombozenyi mu wulawa mu wuwanda. Kanyhi wakujela kumukwejenyi ho muyilece nzila yo wumi, yono Muwaha Mulungu wenyu, yamulajilizenyi muyityatye. Holeka wanhu we liwala lilyo, mbeka wanojeye wawulagwe. Na mu nzila yiyo, mo mowuwusiza u wubi muli'nye.

6 “Hamba yawe nduguyo, u mwana wo nyina yako, hamba mwanago we cilume hamba we cicekulu, hamba yawe mugolece wako u mwendece wako, hamba mwiyendi muyago mono mwiyendile nayo muno muno, hono yejele vyono yakusaka yakukwejeleze cinyele ho wuyihembe milungu yinji, i milungu yono nyenye nyo weneco, hamba walezi wenyu si mwayihemba hamba kamonga,

7 i milungu ye wanhu wono mwikalane behi nawo, hamba milungu ye wanhu wono wekaye kutali nanye.

8 Ninga anye mulecele lukulu kumuhuliciza munhu we liwala lilyo, hamba yawe vyono yenha. Kanyhi munhu we liwala lilyo, mulece kumuwonela lusungu hamba kumutetela hamba kumuhundika yaye.

9 Mbeka munhu yuyo yawulagwe! Kanyhi agwe go mweneco yo weze wuli mulongozi wo kumutowanga ne mabwe, hanyuma wanji nawo ho watyatye, wamutowanje ne mabwe.

10 Mumutowanje ne mabwe sunga yafwe. Hambi nha yali kusaka kumupatusenyi, ho muyilece nzila yo Muwaha Mulungu, u Mulungu wenyu, mono yamuwusenyi ku wulawa ku Misili, yakamukombozenyi mu wulawa mu wawanda.

11 Ne wanhu wose Waisilayeli, wozihulika zono zijeye, nawo wokwinjilwa no woga wuwaha. Na ku soko yiyo, hasina kanyhi hamba monga mono kokwijelela kwituma zimbi zono zinha zizo.

12 “Na kolo mweza kuwa mwikaye mu makaya gono Muwaha Mulungu, u Mulungu wenyu, yakumupelenyi, mumo mudahile kuletelwa nghani zo wihehemeze, zono zikutya,

13 ‘Wenuka wanhu wanji we cakacaka muli nyenye, wono wakuwakwejeleza wanhu wa mu makaya gawo, wabite wayihembe milungu yono mukali si nayihemba ku wulawa katali.’

14 Holeka hono wuhulice wihehemeze wono winha wuwo, wupiligale kuwuzawuza. Na hono zijele vyono nghani zizo zimbi zili mbeka,

15 ale, wawulagaje wanhu wose wa mwi'kaya lilyo hamonga ne mitugo zawo zose. Wulyongomezezaje lukulu likaya lilyo.

16 Hanyuma wukonghole sawo yawo yose ya mwi'kaya lilyo, wuyilundice yose hamonga mu nzila, hanyuma wuyikongoje no moto hamonga ne likaya lyayo, viwe cilavywa kuli Muwaha Mulungu, u Mulungu wenyu. Nalyo likaya lilyo likale vye 'tongo cibitilila, na hamba si lyolozengwa kanyhi.

17 Nanye mulece kusola cinhu co cose ca muli vinhu vivyo vyono vili mwiko kusola, holeka nayo Muwaha Mulungu si komukolelwenyi likuwo yaye, langa komuwonelenyi lusungu, no kumwinjifyenyi muwe wenji, nha vyono yawehuwiza walezi wenyu,

18 hono mugebate malajilizo, nha vyono nimulonjelenyi izuwali, kanyhi mwitume nha vyono Mulungu yakuhila mwitume.”

Cigogo Bible © Bible Society of Tanzania, 2002.

Bible Society of Tanzania
Lean sinn:



Sanasan