Wukumbucize wo Wulajilize 10 - Luganuzi Luswanu Kuli Wanhu Wose 2002

Musa yakubocela kanyhi Malajilizo yikumi

¹ “Baho nayo Muwaha Mulungu yamhitula yakatya, ‘Ale wusese kanyhi vibawo vyejete vya mabwe, viwe vinha nhe vibawo vilongozi, kanyhi wusese ne lisanduku lya mbawo, lyono vyowikwa mugati yalyo. Hanyuma wuze navyo, wunyagane akuno kwi'tunda kucanyha,

² nane novyandika vibawo vivyo navyo, zinghani zono nali nizandice mu vibawo vi vilya vyono wavitula. Hanyuma wuwe kuviwika mwi'sanduku mugati.’

³ “Nane nghawa kulisesa lisanduku, nghetumamila zimbawo zo mubici wo mukambala, hanyuma nghawa kusesa ne vibawo vyejete kanyhi vye mabwe, nha vyono vyali vinha vilongozi. Nghawa kuvitegula kuko kwi'tunda kucanyha.

⁴ Nayo Muwaha Mulungu, yakawa kuvyandika mucanyha yavyo zinghani zi zilya du zono yali yazandice halulongozi, nha cinji i Malajilizo yikumi gono yamupelenyi lono yalonganila nanye muciligati yo moto, mwizuwa lililya lyono mwali mwihangulize ha mwejelele we litunda. Nayo Muwaha Mulungu, yakawa kumhela vibawo vivyo,

⁵ nane nghawa kupituka, nghawa kutima hasi ku wulawa mwi'tunda mucanyha. Hanyuma nghawa kuviwika mwi'sanduku mugati, mwisanduku lyono nalisesa nha vyono Muwaha Mulungu yalajiliza. Navyo vibawo vivyo, vikawa vikalaga mumo du sunga nalu.”

⁶ (Waisilayeli wakawa kutuluka, wulawa ha masima ge malenga gono gali ge wanhu wa Yakani, wakawa kubita sunga wakafika ku Mosela. Baho Haluni ho yafwila, yakazikwa baho. Nayo mwanagwe we cilume Eleyezali, yakawa kuhalila u mulimo wo sogwe wo wukohani.

⁷ Na ha wulawilila baho, wakajendelela, wakawa kubita hanhu hono hakucemwa Gudigoda. Na ku wulawa Gudigoda, wakabita Jotibata hanhu hono ho vili vikolongo vye malenga.

⁸ Na baho he 'tunda, Muwaha Mulungu yakawahagula wanhu wo mulango wa Lawi, wo wawe walanjilizi we Lisanduku lye Cilagane. Wamwitumamile nha wakohani. Kanyhi wawe kulavizya wulugutize mwitagwa lyakwe. Na wuwo wo mulimo wawo sunga nalu.

⁹ Na yiyo yo soko yono yaleka wo mulango wa Lawi wasina ligawo lye yisi, nha vyono wenha we milango yinji yose. Ninga wene wabocela lihewa lyo kuwa wakohani wo Mulungu, nha vyono Muwaha Mulungu, u Mulungu wenyu, yehuwiza.)

¹⁰ “Nane nekala vilo makumi mane misi ne cilo kuko mwi'tunda, nha vyono nekala ha lulongozi. Nayo Muwaha Mulungu yakahulika wulombe wangu, yakavumila yalece kumongomezenyi.

¹¹ Hanyuma yakawa kunonjela nize nimutonjenyi, ho musume kwinjila no kuyitema yisi yono yawehuwiza i walezi wenyu.”

Cono Mulungu yakucisaka

¹² “Alu 'nye nyo Waisilayeli, muhulicize ta cono Muwaha Mulungu, u Mulungu wenyu, yakucisaka kuli'nye, u Muwaha Mulungu yakumusacenyi, Mumuhembe Muwaha Mulungu, mwitume zose zono yakumulajilizenyi mwitume. Mumwende, mumwitumamile kwe zinhumbula zenyu zose na kwe mitima yenyu yose,

¹³ kanyhi mugebate ne malajilizo gakwe gose, gono nghumulajilizenyi i zuwali, ho mutuje wumoteswe.

¹⁴ Hambi u Muwaha Mulungu, nha yo munghala wulanga wose, wono wulawiliciye, sunga ne yinze yose nha yakwe, sunga ne vinhu vyose vyono vili mugati yayo.

¹⁵ Hambi u wendo wakwe kuli walezi wenyu, nha wali wuwaha, holeka yakamuhagulenyi anye si nhe wanhu wanji, sunga nalu, mukali muli wanhu wakwe wahagulwa.

¹⁶ Holeka alu, ku wulawilila zuwali, mweze muli cihuliko kuli Muwaha Mulungu, mulecele lukulu kuwa muli cibede.

¹⁷ Hambi Muwaha Mulungu, u Mulungu wenyu, nha yo Mulungu we milungu yose, kanyhi yo munghala vilungo vyose. Mwene yo Mulungu mono Yalawiliciye kanyhi yo we vilungo. Holeka yanojeye yogopwe mweneco du. Hambi mwene nha yasina wuwaguzi, hamba si kabocelaga mafupo.

¹⁸ Mwene yendile kuwona i wana wono wasina walezi, hamonga ne wacekulu wafwile, wose wakutendelwa ling'ani. Kanyhi yawendile sunga ne wajenzi, wono wekalane hamonga ne wanhu wetu. Mwene kawapelaga zindigwa ne vivwalo.

¹⁹ Holeka nanye munojeye muwende wawo wajenzi, hambi nanye nha mwali wajenzi mu yisi ya Misili.

²⁰ Holeka munojeye mweze ne cihuliko kuli Muwaha Mulungu, u Mulungu wenyu, muwe kumuhemba mweneco yali wene du. Kanyhi mweze muli wehuwilwa kuli mwene, kanyhi mweze kwilahiziza mwitagwa lyakwe mweneco du.

²¹ Hambi mwene nha yo nhojo yenyu, kanyhi mwene yo Mulungu wenyu, mono yetuma mezino mawaha, na go wogofye ku soko yenyu, i metumo gono sunga na nyenye nyo mweneco mwagawona ne meso genyu.

²² Mukumbucile vyono, lono walezi wenyu wabitila ku Misili, wali waficile wanhu walume makumi mupunghati du. Ninga aluno, mulanje vyono Muwaha Mulungu, u Mulungu wenyu, yetumile kuli'nye, kamunozenyi muwa muli wenji muno, mwihwana no winji we zinyelezi za ku wulanga.”