Amosi 1 - Luganuzi Luswanu Kuli Wanhu Wose 2002

U muwizi Amosi

¹ Azi zo nghani za Amosi, u mudimi munya kwi kaya lya Tekowa. Myaka myejete lono litulo lya mu'si lyali likali si naza, mu vilo vya Uziya lono yali mutemi wa Yuda, na lono Yelobowamu mwana wa Yowashi yali mutemi wa Isilayeli.

² Amosi yakatya, “Muwaha Mulungu yakukoloma kuwulawa kwitunda lya Sayuni, ne lizi lyakwe wulawa ku Yelusalemi. No wudimo weza musina, ne lihanze mwitunda lye kalimeli lyanyala.”

Wuling'anizi wo Mulungu kuli makaya gono gali gali behi behi na Isilayeli Damesiki

³ Muwaha Mulungu yakutya, “Wanhu wa Damesiki wetuma wubi kali kenji, na ku soko yiyo nane nowalipiciza. Hambi nha wawatendela vibi no kuwatamisa muno muno wanhu wa Gileyadi.

⁴ Holeka nane nolipembela moto likaya lyo wutemi, lyono mutemi Hazayeli yazenga, kanyhi nogakongoga makaya go mutemi Benehadadi.

⁵ Nogabenanjiza ne malango ge likaya lya Damesiki no kuwawusa wono wekaye mwi'lolo lya Aveni, hamonga no mutemi wa Betedeni. Ne wanhu wa Siliya, wolosolwa nha wafungwa sunga ko ku yisi ya Kili.”

Filisiti

⁶ Muwaha Mulungu yakutya, “Iwanhu wa Gaza, wetuma wubi muno muno. Na ku soko yiyo, nane nowalipiciza wene. Ku soko wene wayisola nghungugo yose, no kuwahamizizya kuli wanhu wa Edomu wawe wawanda.

⁷ Holeka notegula moto nigatakamize majinji ge likaya lye Gaza no kugatakamiza makaya gayo.

⁸ Nowawusa wono wekaye mu makaya ga Ashidodi na Ashikeloni, hamonga ne watemi wawo. Kanyhi nolilipiciza likaya lya Ekiloni, ne wafilisiti wose wono wasigala, wofwa.”

Tulo

⁹ Muwaha Mulungu yakutya, “Iwanhu wa Tulo, nawo wetuma wubi kali kenji. Na ku soko yiyo, nane nowalipiciza. Hambi nha wayisola nghungugo yose no kuyihamizizya ku yisi ya Edomu wawe wawanda, hamba siwacikumbucila ne cilagane ce ndugu cono wacinoza.

¹⁰ Holeka nane notegula moto mu majinji ge likaya lya Tulo, no kugatakamiza makaya gayo.”

Edomu

¹¹ Muwaha Mulungu yakutya, “Wanhu wa Edomu, wetuma wubi kali kenji. Na ku soko yiyo, nane nowalipiciza. Hambi nha wawatendela vibi wandugu zawo, Waisilayeli, hamba kulajila lusungu yaye. Ne likuwo lyawo, likawa vyo lijendeleye du lisina wumalice yaye.

¹² Holeka nane notegula moto mwi'kaya lya Temani, no kugatakamiza makaya ga Bozila.”

Amoni

¹³ Muwaha yakutya, “Wanhu wa Amoni, wetuma wubi kali kenji, na ku soko yiyo, nane nowalipiciza. Hambi mu wulugu wawo, nha wawatumbulaga i wacekulu we mida, so wusaka kugazimhya mipaka ye zi'si zawo.

¹⁴ Holeka nane notegula moto mu majinji ge Likaya lya Laba no kugatakamiza zikaya, makaya gayo. Na kolowa kolili izozo mwi'zuwa lilyo lya wulugu, no wihomi wolowa wuwaha, kotya mukukunzo we livulavumbi.

¹⁵ U mutemi we Amoni hamonga ne wawaha, wolohamywa no kutegulwa kutali.”