3 Yohana 1 - Luganuzi Luswanu Kuli Wanhu Wose 2002

¹ Ane no munyamhala, nghukwandicila agwe Gayo, u mwendece wangu, mono nghwendeye mu mbeka.

² Go mwendece, nghulomba wumote muli zose, kanyhi nghulomba weze wuli muswanu telele mu muwili, nha vyono winha mu nhumbula.

³ Hambi nha nasecelela muno lono we zindugu wanji waziza baha, wakanonjela zo wihuwilwa wako wa mu mbeka, nha vyono agwe wukujendela mu mbeka nhondo zose.

⁴ Hasina cinji cono cikusangalaza muno, si nho kuhulika vyono i wanangu wakujendela mu mbeka.

U wihuwilwa wa Gayo

⁵ Go mwendece wangu, agwe nhondo zose kuwezaga wuli mwihuwilwa lono wukuwetumamila wandugu, hamba wawe wajenzi.

⁶ We zindugu wawo, waliloloseza likanisa lya bahano zo wendo wako. Alu nghukulomba, wuwatazaje ho wajendelele no muhinzo wawo, mu nzila yono yomwendeza u Mulungu.

⁷ Hambi nha wakwanziza u muhinzo wawo mu witumami wa Kilisito, hamba si wobecela wutazi wo wose kulawa kuli wanhu wono si wehuwiye.

⁸ Holeka ase yicinojeye ciwapele wutazi wanhu wawa, nase ho cihanje u mulimo wawo ku soko ye mbeka.

Diyotelefe na Demeteliyo

⁹ Nandika baluwa fupi ku kanisa yiyo, ninga Diyotelefe mono kahijililaga kuwa mulongola wawo, si yakusaka kuhuliciza hamba hadodo.

¹⁰ Holeka nane kolo nghuza, nozilajila zose zono yakwituma, sunga ne zinghani i zimbi zono yakucilonga, hamonga no wulambi wono yakuwulonga. Kanyhi hamba si nhavivyo du, ninga u mwene kanyhi, si yakuwa kusaka hamba kuwacemela kwakwe, wawo i wandugu wono wali mu muhinzo, kanyhi yakuwa kuwalemeza sunga na wanji wono wakusaka kuwacemela, kanyhi yakujela kuwawinjila kunze ye likanisa.

¹¹ Gwe mwendece wangu, wulece kutyatya u musambo mubi, langa u musambo muswanu. Munhu wo wose mono yakwituma i ziswanu, yo wo Mulungu, ninga mono yakwituma i zimbi, yuyo yakali si namuwona u Mulungu.

¹² I wanhu wose wakumukumya Demeteliyo, heya, sunga ne mbeka yeneco yikumukumya. Sunga na sese wose cikumuhomelela, nagwe wumanyile vyono zono cikulonga zo ze mbeka.

U mulamu we ndumilizo

¹³ Nali nina nyinji zo kukwandicila, ninga si nyendile kwandicila wino ne kalamu.

¹⁴ Ninga nitumbiye vyono si notinya kukuwona, baho ho coduwana cidomile.

¹⁵ U mulamu wuwezane nagwe. I wendece wako wakukulamusa. Wuwalamusaje i wendece wetu wose munhu ne 'tagwa lyakwe.