2 Watemi 9 - Luganuzi Luswanu Kuli Wanhu Wose 2002

Yehu, yakwitilwa mafuta, yawe mutemi wa Isilayeli

¹ Hanyuma Elisha yakamucema yumonga wa muli wawizi we cizelelo, yakamutya, “Alu, wiwikanizaje, wubite ku Lamoti ya ku Gileyadi. Wusole ne cupa ayi ye mafuta,

² na kolo wafika kuko, ale, wumulondole Yehu u mwana wa Yehoshafati, kanyhi yo mwizukulu wa Nimushi. Kolo wamuwona, wumusolaje, wubitane nayo mu cinyumba, kutali ne wanduguze.

³ Na kolo wenjila nayo, wumwitile mafuta aga mu mutwe wakwe, akuno wukutya, ‘Muwaha Mulungu yakukutya nha vyono yakukwitila mafuta gaga wuwe mutemi wa Isilayeli.’ Na kolo wazikondya zizi, wuwuce baho mbela mbela nha vyono kosuma.”

⁴ Ale, du, u muwizi we cizelelo yakawa kubita ku Lamoti ya ku Gileyadi.

⁵ Nayo yali yeza kufika kuko, yakawagana wawaha we wasilikale wehangulize wali mu mukung'ano wawo. Yakawatya, “Nye wawaha, ane nina nghani yono nhumigwe nimulonjelenyi.” Nayo Yehu yakawuza yakutya, “Alu wukumusaka wa hayi mwene muli sese?” Muwizi muzelelo yakatya, “Nghukusaka gwegwe.”

⁶ Hodu wakawa kutulukana. Nayo muwizi we cizelelo, yakawa kumwitila Yehu mafuta mu mutwe, akuno yakutya, “Muwaha Mulungu, u Mulungu wa Isilayeli yakukutya, ‘Nghukwitila mafuta gaga, wuwe mutemi we wanhu wangu Waisilayeli.

⁷ Holeka yikunojeye wumuwulaje mutemi wako. U mwana wa Ahabu, nane ho sume kumulipiciza Yezebeli ku soko yo kuwawulaga wawizi wangu, hamonga ne wetumami wangu wanji.

⁸ Holeka wuwawulagaje wose we nyumba ya Ahabu hamonga no lulelo lwakwe lose. Nowongomezeza lukulu wose wa mu nyumba yakwe, wadodo ne wakombi.

⁹ Nowanoza we nyumba yakwe, nha vyono nawanozeza we zimhuga za Yelobowamu na Baasha, i matemi wa Isilayeli.

¹⁰ Nayo Yezebeli, u muwili wakwe si wozikwa yaye, langa woligwa du ne zimbwa mu yisi ya Yezeleli.’ ” Nayo muwizi we cizelelo, yali yeza kukondya kuzilonga zizo, hodu yakawuka lwa kamonga mu cinyumba, yakatiza.

¹¹ Nayo Yehu, hobaho yakawa kuwuya kuli wetumami wayagwe, nawo wakamuwuza wakatya, “Wule, zose swanu? Alu yu yulya wo lukwale, yali kukusacilaci?” Yehu yakatya, “Mumanyile cono yali kunondolela?”

¹² Nawo wakatya, “Aa, ng'o, ase si cimanyile yaye, holeka cikukulomba wucilonjele zono yakulonjeye!” Yehu yakatya, “Kanonjela katya, ‘Muwaha Mulungu kanyitya nha vyono yakunyitila mafuta niwe mutemi wa Isilayeli.’ ”

¹³ Hodu ho bahobaho wa walya wayagwe, wakawa kutandalika vivwalo vyawo mucanyha ye zi ngazi, Yehu yakawa kwima mucanyha ye vivwalo vivyo, nawo wakawa kutowa ndulele, akuno wazozize wakutya, “Yehu yo mutemi!”

Yolamu mutemi wa Isilayeli, yakuwulagwa

¹⁴ Na ku wulawa baho, Yehu yakawa no wuhile wubi kuli mutemi Yolamu, na lulo, Yolamu yali yakali yali ku Yezeleli, kono yali yabita kwilanjilila zinghomele zakwe, zono yazituga ku wulugu wono wehomaga na Hazaleli, u mutemi wa Siliya, ku Lamoti ya ku Gileyadi.

¹⁵ Holeka Yehu yakawalonjela i wetumami wayagwe yakatya, “Anye wose hono muwe muli ku lubavu lwangu, ale, halece kuwa na yunji wo wose wa muli nyenye, mono kotiza kulawa mu Lamoti, yabite ku Yezeleli yakawasugule.”

¹⁶ Hodu, mwene Yehu yakapanda mwi'tuka lyakwe lyo wulugu, yakawa kubita ku Yezeleli. Nayo Yolamu yali yakali si nanoga zinghomele zakwe. Na Ahaziya u mutemi wa Yuda, nayo yali yaza kumulanga.

¹⁷ Ninga mulindilizi we likaya lya Yezeleli, lono yali yali mu canyha yo munala, yakamuwona Yehu yakuza hamonga ne wanhu wakwe. Hobaho yakazoza yakutya, “Nghuwona lipuga lye wanhu likuza!” Nayo Yolamu yakatya, “Ale, wutume munhu monga mupanda fwalasi, yabite viketang'anile nawo, yawawuze hono walugu hamba wayetu.”

¹⁸ Nayo mono yatumwa, yakamangha mbela sunga kuli Yehu, yakamulonjela Yehu yakatya, “Mutemi yakusaka kumanya hono kuza nha wuli muyetu.” Nayo Yehu yakamupitula yakatya, “Ayo si nghani yako kumanya, agwe wuze wunhyatyaje du mu nyuma.” Nayo mulindilizi mono yali yali mucanyha yo munala, yakalonga nha vyono, u munhu mono cimutumile kakondya kufika kwi'puga, ninga si yakuwuya ng'o, hamba nhawule magu.

¹⁹ Baho yakatumwa munhu yunji kanyhi, nayo yali yeza kufika kuko, yakamuwuza Yehu nha vyono muyagwe yamuwuzize. Nayo Yehu yakamupitula yakatya, “Ayo si nghani yako kumanya, agwe wuze wunhyatye du mu nyuma.”

²⁰ Nayo mulindilizi yakalonga kanyhi nha vyono u munhu mono cimutumile, kakondya kufika kwi'puga, ninga si yakuwuya ng'o, hamba nhawule, magu. “Ninga u muwaha we lipuga, yakujendya mutuka wakwe wo wulugu kotya nha munhu mono yena lukwale, kanyhi hono wukumulanga kotya nha Yehu!”

²¹ Hodu mutemi Yolamu yali yeza kuzihulika zizo, yakatya, “Mbikanizizenyi mbela mutuka wangu wo wulugu.” Nawo wakamutya, “Cakondya.” Hobaho mwene Yolamu hamonga no mutemi Ahaziya, wakawa kupanda munhu no mutuka wakwe, wabite wakamuhinjilize Yehu. Waketang'anila nayo ha mugunda wono wali wa Naboti.

²² Ale, baho, Yolamu yakamuwuza Yehu yakamutya, “Yehu! Wukuza no mulamu hamba ng'o?” Nayo Yehu yakamupitula yakatya, “Alu howa ho wuli wule mulamu, na kumbe wuhawi wo nyina yako Yezebeli, hamonga no wusenyha wakwe vyono yetumaga, vikali vili mumu?”

²³ Nayo Yolamu yakawa kuwupitusa mbela mbela mutuka wakwe yakutiza, akuno yakuzoza yakutya, “Gwe Ahaziya, ale citize awu mbeka wugaluci.”

²⁴ Ninga Yehu yakawutawika wupinde wakwe, yakawukwega kwe vilungo vyakwe vyose, yali yeza kuyilecela songa, yikaficila mu mugongo wa Yolamu, yikaguma yikatoboza mo mu nhumbula yakwe, hodu hobaho Yolamu yakawa kugwa mugati yo mutuka wakwe, yakondya kufwa.

²⁵ Nayo Yehu, yakawa kumulonjela mutazi wakwe Bidikali yakatya, “Ale, wusolaje muwili wa Yolamu wukawugumile mu mugunda wono wali wa Naboti. Kanyhi wukumbucile nha vyono, agwe na nene, lono cali cipandile hamonga cili mu nyuma ya Ahabu, u sogwe wa yuyu Yolamu, u Muwaha Mulungu yazilonga zinghani zizi kuli Ahabu yakamutya,

²⁶ ‘Nawuwona wuwulaji wono wamuwulaga Naboti yigolo, hamonga ne wanagwe wose. Nane nghehuwiza nha vyono, nagwe nokulipiciziza bahano du hono mugunda wuwuno.’ Holeka wusolaje muwili wa Yolamu, wukawugumile mu mugunda wono wali wa Naboti, ciyifisilize nghani yono yayilonga Muwaha Mulungu.”

Ahaziya u mutemi wa Yuda yakuwulagwa

²⁷ Nayo mutemi Ahaziya yali yeza kuziwona zizi, hobaho yakapanda mu mutuka wakwe, yakawa kutiziza ku Beti Hagani. Ninga Yehu yakamuwinga munyuma, sunga yakamwibata, yakawa kuwalonjela wanhu wakwe yakutya, “Mumuwulagaje na yuyo si!” Hodu nawo wakamutimila, akuno yakumangha, wakamuhoma makomele menji, lono mwene Ahaziya, yatizaga yali mu nzila mu mutuka wakwe, yadomile ku cikaya ca Gulu, behi ne likaya lya Ibeleyamu. Ninga hamba nhavivyo, yakasuma kwikwejelela sunga yakafika kwi 'kaya lya Megido, yakafwila kuko.

²⁸ Nawo i wetumami wakwe wakawusola muwili wakwe, wakabita nawo ku Yelusalemi, wakawuzika mu vitenjelo vye watemi, mu kaya ya Dawudi.

²⁹ Ahaziya u mutemi wa Yuda, yakatema mu Yuda mu mwaka we likumi na monga, wa mu vilo vyo wuteme wa Yolamu mwana wa Ahabu mu Isilayeli.

Yezebeli u mugolece wo mutemi yakuwulagwa

³⁰ Yehu yali yeza kufika mwi'kaya lya Yezeleli, yakamwagana Yezebeli yakondya kuzihulika zose zono zijeye, holeka yakawa yeyola na lanji ndunghu mu zinghope ze meso gakwe, yetonanga ne zimvwili zakwe, yakawa yemile he 'dilisha mu kaya ye likulu yalanjile ku nzila.

³¹ Nayo yali yeza kumuwona Yehu yakwinjila ha mulango we likaya, hobaho yakawa kwanza kuzoza yakutya, “Gwe Zimuli! Gwe go muwulaji! Alu akuno nako, kuza nozaci?”

³² Yehu nayo yakamugalamila kuko kwi' dilisha, yakazoza yakutya, “Anye! Nani mono yali ku lubavu lwangu?” Hakawa na wetumami wa mwi'kulu wejete hamba wadatu nhavi, wono wahulika vyono Yehu yalongaga baho hasi,

³³ Yehu yakawalonjela wawo yakawatya, “Mugumilenyi mucekulu yuyo hono hasi.” Hobaho nawo wakamwibata wakamugumila ho hasi. Ne sakami yakwe yikamizucila mwijinji, sunga na mu zifwalasi mose. Nayo Yehu yakawa kukoza mutuka wakwe hamonga ne zifwalasi zakwe mucanyha yo muwili wa Yezebeli, akuno yakwinjila mwi'kulu.

³⁴ Yakalya zindigwa baho. Hanyuma ho yakatya, “Ale, alu mubite mukawusole u muwili wa ayulya u mucekulu mulijitwe mukawuzice, hamba nhavivyo mwene yo mwana we cicekulu wo mutemi.”

³⁵ Ninga wanhu wawo wono watumwa ho wakamuzice, wagana gasigaye go mafupa ge mawoko ne magulu, hamonga ne lipala hodu.

³⁶ Nawo wali weza kumulonjela zizi Yehu, nayo Yehu yakawatya, “Zo zizi zono Muwaha Mulungu yazilonga vyono zowa, lono yazilonjela muli mwitumami wakwe Eliya, nha vyono, zimbwa zo zolowulya muwili wa Yezebeli mu yisi ya Yezeleli.”

³⁷ Sunga ne mafupa gakwe geyagazwe, gagumilwe ako na ako kotya matope, sunga ne wanhu walece kugamanya watye, “Ayu Yezebeli.”