2 Watemi 10 - Luganuzi Luswanu Kuli Wanhu Wose 2002

Wo lulelo lwa Ahabu, wose wakuwulagwa

¹ Nayo Ahabu, yali yena wana makumi mupunghati ku Samaliya. Yehu yakandika baluwa, yakawategulila wawaha wose we likaya, hamonga ne walezi we wana wa Ahabu. Ne baluwa yiyo yikandikwa zinghani azi:

² “Anye yo nyenye mono muli wadimi we wana wo mutemi Ahabu, kanyhi mwina ne matuka go wulugu, ne zifwalasi, ne vitwalo vyose, hamonga ne makaya gono gena ne magomawakali gayo. Holeka ane nghumulombenyi, vyono kolo mukuyibocela baluwa yiyi du,

³ ale, muhagule mwana monga wo mutemi Ahabu, mono yena lilumbo yiswanu, muli wayagwe wose, mumunoze yawe mutemi. Kanyhi mumutazilize mu wulugu, muyilewele nyumba ya Ahabu.”

⁴ Nawo wanhu wa ku Samaliya wakenjilwa no woga wuwaha muno, sunga wakawa kutya, “Alu se waco, ho cosumila hayi kumwimila Yehu, hambi nha sunga no mutemi Yolamu no mutemi Ahaziya, nha si wasuma kumwimila yaye?”

⁵ Hodu, u mulindilizi muwaha we likulu, hamonga no mulindilizi muwaha we likaya, wakawa kwihanguliza hamonga ne walongola we wanhu ne walezi wose we wana, wakelumbaniza vyono, wamupitule Yehu baluwa yakwe. Holeka wakamwandicila wakatya, “Ase yo sese mono cili wetumami wako, nase ciwikanize kwituma nghani yo yose yono kosaka gwegwe. Ninga ase akuno hamba si cosuma yaye kumunoza yunji yawe mutemi. Langa ase cilindiye witume nha vyono gwegwe du kowona viswanu.”

⁶ Yehu nayo yakawandicila yakuwapitula yakatya, “Alu kumbe hono muli ku lubavu lwangu, kanyhi mwiwikanize kwituma nha vyono nolonga, ale nghumusacenyi mundetele mitwe ye wana wose wo mutemi Ahabu, monyagana ku Yezeleli mitondo mu mapango gaga.” Ne wana wose wo mutemi Ahabu, vyono wali wali makumi mupunghati, wakamiswaga ne wawaha we likaya.

⁷ Nawo walongola we likaya lya Samaliya, wali weza kuyibocela baluwa yiyo, hodu ho baho baho, wakawebata iwana wose wo mutemi Ahabu, wakawadumula mitwe yawo, wakayipanga mu zinhoto, wakamutegulila Yehu ku Yezeleli.

⁸ Nayo Yehu yali yeza kulonjelwa nha vyono mitwe ye wana wose wa Ahabu, yakondya kuletwa, mwene yakalajiliza nha vyono, mitwe yiyo yose yilundwe malundo mejete, ha mulango we likaya, yikale baho milunde, sunga wele mitondo.

⁹ I mitondo yaco, Yehu yakawa kubita kwi'lango hakali mitondo, yakawa kuwalonjela wanhu wose wono wali wemile baho, yakawatya, “Ane yo nene mono namugaluka mutemi Yolamu, nghamuwulaga, nanye yo si mwetuma zizi. Ninga alu nani mono yawawulaje wanhu wawo wose.

¹⁰ Ninga nghani yiyi, yo yikulajila nha vyono zolofisilizwa zose, zono Muwaha Mulungu yazilonga, zono zolowejelela i wana wa Ahabu. Hambi Muwaha Mulungu nha kazinoza zizi, nha vyono yehuwiziza muli muwizi wakwe Eliya.”

¹¹ Hanyuma Yehu yakawa kuwawulaga wanduguze wose wa Ahabu, ne wetumami wakwe, ne wendece wakwe, hamonga ne wakohani wose, hakawa hasina hamba monga mono yasigala.

I wanduguze wo mutemi Ahaziya, wakuwulagwa

¹² Hodu, Yehu yakawa kuwuka ku Yezeleli, yakawuya ku Samaliya. Ninga lono yawuyaga, yali yeza kufika hanhu hono hakucemwa “Nghambi ye Wadimi.”

¹³ Baho, viketang'anila ne wanduze wanji wa malehemu, mutemi Ahaziya wa Yuda, nayo Yehu yakawawuza yakatya, “Nyenye wa nani?” Nawo wakamutya, “Ase cili wanduguze wa Ahaziya, cikanjile ku Yezeleli, cikamulamuse Yezebeli u mugolece wo mutemi, hamonga ne wana wo mutemi.”

¹⁴ Hobaho Yehu yakawalajiliza wanhu wakwe, yakatya, “Ale, muwebataje womi!” Nawo wakawebata womi. Nayo yakawawulajila baho behi ne cilamba. Nawo wali waficile hamonga wanhu makumi mane na wejete liwalo lyawo. Na hasina hamba monga mono yapona.

Wanduguze wa Ahabu wose wono wasigaye, wakuwulagwa

¹⁵ Kanyhi Yehu yakawa kutuluka, na mumo mu nzila, viketang'anila na Yonadabu u mwana wa Lekabu, yakuza kumuhinjiliza. Yehu yakamulamusa, yakamutya, “Agwe na ane nghuwona nhumbula zetu zihwanile. Alu wule, kosuma kunhaza?” Nayo Yonadabu yakatya, “Heya nokutaza.” Yehu yakamutya, “Ale mhelaje muwoko wako.” Hodu wakawa kwilamusa. Nayo Yehu yakawa kumupaciza mu mutuka wakwe,

¹⁶ akuno yakumutya, “Wuze wiwonelele go mweneco i nghango yo wilavye wangu kuli Muwaha Mulungu.” Hodu, wakawa kubitana wose mu mutuka, sunga ko ku Samaliya.

¹⁷ Wali weza kufika ku Samaliya, Yehu yakawawulaga wanduguze wose wa Ahabu, siyasigaza hamba monga. Na zizi zo Muwaha Mulungu yazilonjela muli Eliya, nha vyono zolokwijela.

I wahemba Baali wose, wakuwulagwa

¹⁸ Hanyuma Yehu yakawakonghola hamonga wanhu wa Samaliya, yakawalonjela yakutya, “Mutemi Ahabu, yahembaga mulungu Baali hadodo du, ninga ane nomuhemba Baali kuciza muno.

¹⁹ Holeka muwakongholelaje hamonga i wawizi wakwe wose, ne wahembi wose wono wamuhembaga Baali, hamonga ne wakohani wayo wose. Yunji yalece kuwa na cikojelwa ho yalece kuza. Hambi ane nha nghuhila kumulavizya Baali yikumbiko yiwaha muno. Na hono yunji yejelele yalece kuza, munhu yuyo kowulagwa.” Ninga Yehu yanoza cihalahala du, ho yawongomeze wose wono wamuhembaga Baali.

²⁰ Hanyuma Yehu yakatya, “Aluno muliwikaje no kulyanza lizuwa lyo kulavizya likumbiko.” Ale, lizuwa likawa kuwagwa, no wanze wukawa kwanzwa.

²¹ Nayo mweneco Yehu yakatuma wanhu, wabite wakawalonjele wanhu wose mu yisi yose ya Isilayeli. Nawo wanhu wose wono wamuhembaga mulungu Baali, wakawa kuza, hali hasina hamba monga mono yadila. Ne wanhu wose wahemba Baali, wakenjila mu nyumba yo wuhembelo wa Baali, nyumba yikamema twaa hanhu hose.

²² Hodu, Yehu yakamulajiliza mukohani mulongola, u mulanjilizi we vivwalo vyo wukohani, yalete vivwalo vyo wukohani, yawapele i wahembi wavivwale. Nayo mulanjilizi yakavisolo vivwalo vivyo yakawapela.

²³ Nawo wanhu wali weza kuvivwala vivwalo vivyo, ale, nayo Yehu hamonga na Yonadabu u mwana wa Lekabu, ho wakawa kwinjila mumo mu nyumba yo wuhembelo wa Baali, wakawa kuwalonjela wanhu wa mumo mugati, wakatya, “Ale, mwilangaje hono yo nyenye wose du mo wahembi wa Baali, na hawe hasina yunji wo wose mono kamuhembaga Muwaha Mulungu muli nyenye, mono nayo yawe kenjila mono nyumba yiyi.”

²⁴ Hodu mwene Yehu hamonga na Yonadabu, wakawa kwinjila ho walavye likumbiko hamonga ne vilavywa vinyanywe kuli Baali. Ninga hamba nhavivyo, Yehu yali yakondya kuwawikaniza wanhu makumi munana hanze yo wuhembelo, yakawa yawaloloseza zono wonoza, yawatya, “Alu anye mulimo wenyu, nghusaka muwawulaje wanhu wawa wose, mulece kuleceleza yunji hamba monga yatize. Na hono yunji wa muli nyenye yamuponye yunji, ale yuyo kowulagwa yahalile ho munhu yuyo!”

²⁵ Nayo Yehu lono yalavyaga vilavywa, hobaho yakawa kuwalonjela walindilizi hamonga ne wetumami wakwe, yakawatya, “Ale mwinjile muwawulaje wose, mulece kusigaza hamba monga yaye!” Nawo wetumami wakenjila lwa kamonga, akuno webate ne mimaje yawo mu mawoko, wakawawulaga wanhu wose, wakawa kuyigumilanga mivimba yawo kunze. Zizo zali kukondya, wakabita kwinjila mu nyumba ya Baali, mugati ye nyumba yiyo yo wuhembelo,

²⁶ wakagalavyaniza kunze i masumbili go wuhembi ga mumo mu nyumba ya Baali, wakagakongoga mu moto.

²⁷ Wakavitakamiza vyose, i masumbili hamonga sunga ne nyumba yeneco yo wuhembelo wa Baali, wakayinoza cikawa coloni sunga nalu.

²⁸ Na mu nzila yiyo, Yehu yakawuwusiza lukulu wuhembi wa Baali mu Isilayeli.

²⁹ Ninga langa yakawutyatya wubi wo mutemi Yelobowamu, wono yawasutizya wa Isilayeli, wubi wo kuhemba i vihwani vye zing'ombe ze zahabu, zono monga yali mbikwe ku Beteli, ne nzagwe nayo ku Dani.

³⁰ Muwaha Mulungu yakamulonjela Yehu yakatya, “Alu vyono wakondya kwituma mu wana wa Ahabu zose zono nali kusaka witume, holeka nane nghukwihuwiza nha vyono, i wanago wowa watemi wa Isilayeli sunga ko ku lulelo lwe kane.”

³¹ Ninga Yehu siyasaka kulikamisa lilajilizo lyo Muwaha Mulungu, u Mulungu wa Isilayeli kwe nhumbula yakwe yose. Langa mwene yakatyatya zi nzila zimbi za Yelobowamu mono yawasutizya Waisilayeli.

U wufwe wa Yehu

³² Na ku wulawilila baho, hodu Muwaha Mulungu yakanza kuwucepula wuwaha we yisi ya Isilayeli. U mutemi Hazayeli wa Siliya, yakayihoma yisi ya Isilayeli yose,

³³ yakayisola yose ku lubavu lwa kucilima ye likolongo lya Yoludani, sunga ko ku lubavu lwa kutakama kwi 'kaya lya Aloweli, kwi'kolongo lya Alinoni, hamonga ne yisi ya Gileyadi na Bashani, hono wekalaga we milango ya Gadi na Lubeni hamonga na wa Manase wo lubavu lwa kucilima.

³⁴ Ne zinghani zose zono mutemi Yehu yetuma, hamonga ne metumo gakwe ge vilungo, zose zandicigwe mu citabu ce zinghomo ze Metumo ge watemi wa Isilayeli.

³⁵ Yehu yakafwa, yakazikwa mu Samaliya. Nayo Yehowahazi u mwanagwe, yakahala wutemi wakwe.

³⁶ Yehu yakatema mu Isilayeli myaka makumi mejete na munana.