1 Zinghomo 16 - Luganuzi Luswanu Kuli Wanhu Wose 2002

¹ Wakalitegula Lisanduku lye Cilagane, wakalinjiza mwihema lyono Dawudi yali yakondya kuliwikaniza so mulimo wuwo. Hanyuma ya zizo, wakalavya makumbiko, hamonga ne vilavywa vyo mulamu kuli Mulungu.

² Nayo Dawudi, yali yeza kukondya kulavya makumbiko, yakawalugutiza wanhu mwi'tagwa lyo Muwaha Mulungu,

³ hanyuma yakawa kuwagawila wanhu wose Waisilayeli, walume ne wacekulu, munhu mukate we cilagane ne ciponje ca nyama, hamonga no mukate we zabibu nghavu.

⁴ Hanyuma Dawudi, yakawahagula Walawi wanji, wawe walongoza wuhembi wo kumuhemba Muwaha Mulungu, u Mulungu we Waisilayeli, ha mwande ye Lisanduku lye Cilagane, mu nzila yo kwimba, hamonga no kumukumya Muwaha Mulungu we Waisilayeli.

⁵ Asafu yakawikwa yawe yo muwaha wawo, nayo Zekaliya, yakawa yo mutazi wakwe. Nayo Yeyiyeli, na Shemilamoti, Yehiyeli, Matitiya, Eliyabi, Benaya, na Obedi Edomu, hamonga na Yeyiyeli, awa wali wo watowa zindonondo.

⁶ Nawo i wakohani wejete, Benaya na Yahaziyeli, wali wo watowa zindulele kenji na kenji, ha mwande ye Lisanduku lye Cilagane.

⁷ Lulo mwizuwa lilyo, wali wo mwamulizo Dawudi ho yamulajiliziza Asafu ne wanduguze Walawi, wawe wo wembi wo kumwimbila Muwaha Mulungu nyimbo zo kumulumba.

Lwimbo lo wulumbe

⁸ Mumulumbe Muwaha Mulungu, mwanze zo wuwaha wakwe. Mugalonjele makungugo zinghani zono yetumile

⁹ Mwimbilenyi Muwaha zinyimbo zo lukumyo, mwanze zinghani zo wizine zono yetumile,

¹⁰ Cisangalale vyono ase cili wakwe. Wasangalale wose wono wamuhembaga mwene.

¹¹ Mubitilenyi Muwaha Mulungu mutuje wutazi kanyhi muwe kumuhemba nhondo zose.

¹² Nanye mo wana wa Yakobo, mo wetumami wakwe, mo wana wa Isilayeli mono mwahagulwa no Mulungu,

¹³ Mweze kukumbucila ze mapoto gono Mulungu yaganoza hamonga ne ning'aniza yono yayilavya.

¹⁴ U Muwaha Mulungu, yo Mulungu wetu, ne malajilizo gakwe go ge yinze yose.

¹⁵ Holeka mulece kucisemwa cilagane co Mulungu cono yacinoza cikale cibitilila.

¹⁶ I cilagane cono yacinoza na Abulahamu no wihuwizo wono yamwihuwiza Isaka.

¹⁷ Muwaha Mulungu yanoza cilagane na Yakobo ciwe cilagane cono cokwikala cibitilila.

¹⁸ “Yakatya, nokupela yisi ya Kanani.” “Nayo yowa yako gwegwe.”

¹⁹ I wanhu wo Mulungu, wali wacefu ku wuwale, kanyhi wali wajenzi, mu yisi ya Kanani.

²⁰ Wakapilima pilima ku wulawa yisi na yisi ku wulawa mu wutemi awu, sunga ko ku wutemi wuyagwe.

²¹ Ninga Mulungu si yawaleceleza wewonelwe na cinji, langa yawasugula watemi, ho yawacitile wene, yakawatya,

²² “Mulece kuwatamisa wetumami wangu wahagulwa, mulece kuwapamiza i wawizi wangu.”

²³ Mwimbilenyi Muwaha Mulungu nye nyo yinze yose! Nhondo zose mweze kwanza ze mhonelo yakwe yono yaciponya.

²⁴ Mwanze zo lukumyo lwakwe kuli makungugo gose, ze metumo gakwe mawaha kuli wanhu wose.

²⁵ Muwaha Mulungu nha yo yalawiliciye, yo munya lilumbo liwaha, kanyhi yo we cogopo kuciza milungu yose.

²⁶ Ne milungu ye zinghungugo zose, nha vihwani du, ninga u Muwaha Mulungu, yo yawumba wulanga.

²⁷ Lilumbo no lukumyo, zimupilime mwene, Vilungo ne nyemo, vimemile mu Nyumba yakwe.

²⁸ Mulumbenyi Muwaha Mulungu, anye nyo we yinze wose, wulumbenyi lukumyo lwakwe ne vilungo vyakwe.

²⁹ Mumupele Muwaha Mulungu lukumyo lwe litagwa lyakwe, mulete vilavywa, mwinjile mu Nyumba yakwe, mumuhembe Muwaha Mulungu ko wuswanu no wele.

³⁰ Nyo yisi yose, mucicime hali mwene, Heya, yinze yawikwa ho yilece kusinjiswa.

³¹ Musecelele nyo yisi yose no wulanga! Mugalonjele makungugo gose, vyono Muwaha Mulungu yo mutemi.

³² Ale, go lilenga wutunhume, hamonga na vyose vyono vili muli'gwe. Nayo migunda yisanghuce, hamonga na vyose vyono vili mumo.

³³ Holeka mibici yose ya mu mbago, yimbe ne nyemo, lono Muwaha Mulungu yakuza kuyitema yinze.

³⁴ Mulumbenyi Muwaha Mulungu, hambi nha yali 'hewa hambi lusungu lwakwe nha lwa cibitilila.

³⁵ Nanye mutye “Gwe Mulungu we mhonelo yetu, wuciponye. Wucikonghole no kucilavyaniza muli we makungugo, ho cikulumbe no kulikumya litagwa lyako lyono lyelile.”

³⁶ Yalumbizwe Muwaha Mulungu wa Isilayeli! Yalumbizwe ku wulawa lulu, sunga cibitilila! Ne wanhu wose wakatya, “Heya” wakamulumbiza Muwaha Mulungu.

Wuhembi wa ku Yelusalemi, na ku Gibeyoni

³⁷ Mutemi Dawudi yakawawika Asafu hamonga ne Walawi wayagwe, wawe wo walanjilizi we nhondo zose, wo wuhembi wono walongozwaga, i hanhu hono lyali yiwice Lisanduku lye Cilagane. Nawo welecelaga yizuwa ne 'zuwa mu mulimo wawo.

³⁸ Nayo Obedi Edomu, u mwana wa Yedutuni, hamonga ne wayagwe, waficile wanhu makumi mutandatu na munana, we mhuga yakwe, wali wo watazi wawo. Hosa na Obedi Edomu, wali wo walindilizi we milango.

³⁹ Nayo Zadoki u mukohani, hamonga ne wanduguze wakohani, wene wali wo walanjilizi wo wuhembi wo Muwaha Mulungu, ku wuhembelo wono wali wuli ku Gibeyoni.

⁴⁰ Nawo wawezaga no mulimo wo kulavywa vilavywa vinyanywe mu cikumbicilo, nhondo zose hakali mitondo na ha cinyamihe, nha vyono zandicigwe mu Wulajilize.

⁴¹ Hamonga na wana, hakawa ho yuli Hemani ne Yedutuni hamonga ne wayawo wanji wono wahagulwa so mulimo wo kwimba du, ho wamukumye Muwaha Mulungu so lusungu lwakwe lwe cibitilila.

⁴² Na muli wene, Hemani na Yedutuni, wo wali walanjilizi we watowa zindulele ne zimbilili, hamonga ne viya vinji vyono vyatowaga lono zinyimbo zo lukumyo zikwimbwa. Nawo we mhuga ya Yedutuni, wali wo walindilizi we milango.

⁴³ Hanyuma ya zose, wose wakawuya ku zikaya zawo, nayo Dawudi yakabita ku kaya yakwe vilo vicefu, yakekalana ne mhuga yakwe.