1 Zinghomo 1 - Luganuzi Luswanu Kuli Wanhu Wose 2002

Kuwulawilila Adamu sunga kuli Abulahamu

¹ Adamu yali yo sogwe wa Seti, nayo Seti yo sogwe wa Enosi, nayo Enosi yo sogwe wa Kenani,

² Nayo Kenani yo sogwe wa Mahalaleli, nayo Mahalaleli yo sogwe wa Yaledi.

³ Yaledi yo sogwe wa Enoci, nayo Enoci yo sogwe wa Metusela, nayo Metusela yo sogwe wa Lameki.

⁴ Nayo Lameki yo sogwe wa Noha. Noha yakalela wana wadatu, Shemu, Hamu na Yafeti.

⁵ Iwana wa Yafeti wali awano, Gomeli, na Magogi, na Madayi, na Yavani, na Tubali, na Mesheki na Tilasi. Wawano wali wo walezi we wanhu wono wasola matagwa gawo.

⁶ I wana wa Gomeli wakawa wo wanhu wono wekalaga ku Ashikenazi na Lifati, na ku Togalima.

⁷ Nawo i wana wa Yavani, wali awa: Elisha, Talishishi na Citimu, na Walodani.

⁸ Nawo i wana wa wa Hamu, wali awano. Kushi, Misili, Putu, na Kanani. Nawo wawano wali wo walezi we wanhu wono wasola matagwa gawo.

⁹ Nawo i wana wa Kushi, wakawa wo wanhu wono wekalaga ku Seba, Havila, Sabuta, Lama na Sabuteka. Nawo i wana wa Lama, wakawa wo wanhu wono wekalaga ku Sheba, na Dedani.

¹⁰ (Nayo Kushi yakamulela mwana litagwa lyakwe Nimulodi. Yuyu Nimulodi yakawa yo munhu mulongozi we vilungo mono yinze.)

¹¹ Nawo i wana wa Misili, wali wo Waludi, Waanamu, Walehabi ne Wanafutuhi.

¹² Patulusi, Kasilu na Kilete. (Na muli mwene mo walawa i Wafilisiti.)

¹³ Nawo i wana wa Kanani, wali awano, Sidoni, yo mwana mulongozi kulelwa, na Heti. Nawo wawa wo wali walezi we wanhu wono wasola matagwa gawo.

¹⁴ Nayo Kanani yali yo mulezi we Wayebusi, ne Waamoli, ne Wagiligashi,

¹⁵ Wahivi ne Waaliki, ne Wasini,

¹⁶ ne Waalivadi, ne Wazemali, hamonga ne Wahamati.

¹⁷ Nawo i wana wa Shemu, wali awano, Elamu, Ashuli, Alipakishadi, Ludi, Alamu, Uzi, Huli, Geteli, na Mesheki. Nawo wali wo walezi we wanhu wono wasola matagwa gawo.

¹⁸ Nayo Alipakishadi yali yo sogwe wa Shela, nayo Shela yali yo sogwe wa Ebeli.

¹⁹ Nayo Ebeli yali yena wana wejete. Yumonga yacemwaga litagwa lyakwe Pelegi, vyono mu vilo vyakwe, i wanhu ho wagawanucila mono yinze. U muyagwe nayo yacemwaga Yokitani.

²⁰ Nawo i wana wa Yokitani, wali wo wanhu wono wekalaga ku Alimodadi, Shelefu, Hazalimaweti, na Yela.

²¹ Hadolamu, Uzali, Dikila,

²² Ebali, Abimayeli na Sheba.

²³ Ofili, Havila, na Yobabu.

²⁴ U wityatye we mhuga ku wulawilila kwa Shemu sunga ko kwa Abulamu wuli nhavi, Shemu, Alipakishadi, Shela,

²⁵ Ebeli, Pelegi, Lewu,

²⁶ Selugi, Naholi, Tela,

²⁷ na Abulamu, (mono yamanyice kwe 'tagwa lya Abulahamu.)

Wo lulelo lwa Ishumayeli

²⁸ Abulahamu, yali yena wana wejete, Isaka na Ishumayeli.

²⁹ I wana wa Ishumayeli, wakawa wo walongola we zimhuga yikumi na nyejete, nha cinji, Nebayoti, wo we mhuga yono litagwa lyali lyo mwana we Ishumayeli, mwana u mulongozi kulelwa. Hanyuma, Kedali, Abudiyeli, Mibisamu.

³⁰ Mishuma, Duma, Masa, Hadadi, Tema,

³¹ Yetuli, Nafishi, na Kedema.

³² Kanyhi Abulahamu, yakawa yena mujitulwa litagwa lyakwe Ketula. Ketula yakamulelela wana mutandatu, nawo wo awano, Zimulani, Yokishani Medani, Midiyani, Ishibaki, Shuwa. Nayo Yokishani, yali yena wana wejete Sheba na Dedani.

³³ Nayo Midiyani yali yena wana wahano, Efa, Efeli, Hanoki, Abida, na Elida.

Wo lulelo lwa Esawu

³⁴ Nayo Isaka u mwana wa Abulahamu, yali yena wana wejete, Esawu na Yakobo.

³⁵ I wana wa Esawu wali wo awa, Elifazi, Lewuyeli, Yewushi, Yalamu na Kola.

³⁶ Nayo Elifazi, yakawa yo sogwe wa Temani, Omali, Zefo, Getamu, Kenezi, Timuna, na Amaleki.

³⁷ Nayo Lewuyeli, yakawa yo sogwe wa Nahati, Zela, Shama, na Miza.

Iwekazi, wanghalaco we yisi ya Edomu

³⁸ I wekazi wanghalaco we yisi ya Edomu, walawilila mu lulelo lwe wana wa Seyili nawo wo awano.

³⁹ Lotani, mono yali yo sogwe we zimhuga za Holi na Homani. (Nayo Lotani yakawa yena lumbulye litagwa lyakwe Timina.)

⁴⁰ Nayo Shoba, yali yo sogwe we zimhuga za Alivani, Manahati, Ebali, Shefi na Onamu. Nayo Zibeyoni, yakawa na wana wejete, Ayiya na Ana.

⁴¹ Nayo yuyu Ana, yali yo sogwe wa Dishoni. Nayo Dishoni, yali yo sogwe we zimhuga za Hamulani, Eshiba, Itilani na Celani.

⁴² Nayo Ezeli, yali yo sogwe we zimhuga za Bilihani, Zawayani, na Yawakani. Nayo Dishani, yali yo sogwe we zimhuga za Uzi na Alani.

I watemi we yisi ya Edomu

⁴³ Awa wono wetyatizye, wali wo watemi we yisi ye Waedomu wono welecelaga wutemi, lono Isilayeli yali yikali sinatuga mutemi wayo wo wose.

⁴⁴ Bela, u mwana wa Beyoli munya Dinihaba

⁴⁵ Yohabu, u mwana wa Zela munya Bozila.

⁴⁶ Hushamu, munya yisi ya Temani. Hadadi, u mwana wa Bedadi munya Aviti. (Nayo yuyu yawasuma Wamidiyani mu wulugu, mu yisi ya Mowabu).

⁴⁷ Samula, munya Masileka

⁴⁸ Shawuli, munya Lehoboti mwikolongo.

⁴⁹ Baali Hanani, u mwana wa Akiboli.

⁵⁰ Hadadi, munya Pawu. (U mugolece wakwe yacemwaga Mehetabeli u mwana we cicekulu wa Matuledi, kanyhi mwizukulu wa Mezahabu.)

⁵¹ Nawo i wanhu wono wekalaga ku Edomu, wakagawanuka zikawa nghungugo nyinji, nha vyono nhavi: We nghungugo ya Timuna, ya Aluva, ya Yeteti,

⁵² ya Oholibama, ya Ela, ya Pinoni,

⁵³ ya Kenazi, ya Temani, ya Mibusali,

⁵⁴ ya Magidiyeli, na ya Ilamu.