1 Watemi 8 - Luganuzi Luswanu Kuli Wanhu Wose 2002

Lisanduku lye Cilagane, likwinjizwa mu Nyumba yo Mulungu

¹ Mutemi Solomona yakawacema i walongola we milango, na we zimhuga ze wanhu wose wa Isilayeli, wamuzize ku Yelusalemi, waliwuse Lisanduku lye Cilagane ku Siyoni mu kaya ya Dawudi, wakalinjize mu Nyumba yo Mulungu.

² Na wose wakekongholela hamonga, mu cipango ce sikukuu ye vibanda mu mwezi wo mupunghati, wo mwezi wa Etanimu.

³ Nawo walongola wose wali weza kuwa wekonghola, i wakohani wakalidinghula Lisanduku lye Cilagane,

⁴ wakalinjiza mu Nyumba yo Mulungu. Walawi hamonga ne wakohani, nawo wakalikula Lihema lyono Lyelile, wakalisola hamonga ne vitumamilwa vyose, wakavinjiza mu Nyumba yo Mulungu.

⁵ Nayo mutemi Solomona, hamonga ne wanhu wose wa Isilayeli, wakekongholela ha mwande ye Lisanduku lye Cilagane, wakalavya makumbiko ge zingholo nyinji muno, hamonga ne zing'ombe nyinji muno, hamba si za kuwala.

⁶ Nawo wakohani wono wali walidinghuye Lisanduku lye Cilagane, wakalinjiza mu Nyumba yo Mulungu, wakaliwika Hanhu Hono Helile, Helile muno, hasi ye makelubi.

⁷ Ne makelubi, gali gagoloye mabawa gayo mucanyha ye Lisanduku, gakagafunika ne mabici gayo gono wali walidinghuliye.

⁸ Ninga mabici vyono gali matali, masonje gayo gejelaga hono munhu yawe yemile ha mwande ye Hanhu Hono Helile, Helile muno, nago gali baho du sunga nalu.

⁹ Na mugati ye Lisanduku mwali musina cinji, langa mabwe mejete du go wupamba, gono Musa yagawika mumo mugati, kuko kwi'tunda lya Sinayi, lono Muwaha Mulungu yanozeza Cilagane ne wanhu wa Isilayeli, lono wawucila mu yisi ya Misili.

¹⁰ Ne wakohani lono wawukaga mugati ye Nyumba yo Mulungu, i Nyumba yo Mulungu yikamema nhinicizo livunde,

¹¹ likung'alala nhojo yo Muwaha Mulungu, sunga ne wakohani siwasuma kanyhi kwinjila ho wetume milimo yawo.

¹² Nayo Solomona yakalomba yakutya, “Gwe go Muwaha Mulungu, yo gwegwe mono walisimya lizuwa mu mwanya, ninga hamba nhavivyo wukahagula go mweneco wikale mu mavunde no wutitu.

¹³ Ninga aluno nakondya kukuzenjela nyumba yako yo lukumyo lwako, i hanhu hono kokwikala cibitilila.”

Zinghani za Solomona kuli wanhu

¹⁴ Nawo wanhu lono wali wakali wemile baho, mutemi Solomona yakawapitucila, yakawalugutiza.

¹⁵ Hanyuma yakawa kutya, “Yalumbwe Muwaha Mulungu, u Mulungu wa Isilayeli! Hambi nha yakamisa wihuwizo wakwe wono yamwihuwiziza baba Dawudi lono yatela.

¹⁶ ‘Ku wulawa lono nawawusiza wanhu wangu ku Misili, nali nghali nalihagula likaya mu yisi yose ya Isilayeli, i hanhu hono hanojeye Nyumba yangu yizengwe, i hanhu hono howa hanojeye ane hembelwe. Ninga nghakuhagula agwe Dawudi, wuteme muli wanhu wangu.’ ”

¹⁷ Kanyhi Solomona yakajendelela kutya, “Baba Dawudi yali yehwesize yazenje Nyumba yo Mulungu yo kumuhembela Muwaha Mulungu wa Isilayeli,

¹⁸ ninga Muwaha Mulungu yakamutya, ‘Heya, mahweso gako maswanu go kuhila wunzenjele nyumba,

¹⁹ ninga'lu agwe yo si koyizenga yaye. Langa mwanago mono komulela, yuyo yo kolonzenjela Nyumba yangu.’ ”

²⁰ “Alu nalu u Muwaha Mulungu kuwakamisa wihuwizo wakwe. Nghani nongozi, nakondya kuwuhala wutemi wa baba Dawudi, wo kuwatema Waisilayeli, kanyhi nakondya kuzenga ne Nyumba yo Mulungu yo kumuhembela Muwaha Mulungu, u Mulungu wa Isilayeli.

²¹ Nakondya kuwika ne hanhu ho kuliwika Lisanduku lye Cilagane mu Nyumba yo Mulungu, lyono mugati yilyo, lina mabwe mejete du go wupamba, ge cilagane cono Muwaha Mulungu yalaganila ne walezi wetu lono yawawusiza ku Misili.”

Wulombe wa Solomona

²² Solomona yakawa kubita kwima ha Cikumbicilo, ha meso ge wanhu wose, yakawa kuyigolola miwoko yakwe kucanyha,

²³ yakalomba yakutya, “Gwe go Muwaha Mulungu, go Mulungu wa Isilayeli, hasina Mulungu yunji mono yehwanile gwegwe kuko ku wulanga, hamba mono 'si hasi! Hambi agwe nha kukamisaga wihuwizo wako kuli wanhu wako, no kuwulajila u lusungu lwako kuli wene, lono wakukuhulika kwe zinhumbula zawo zose.

²⁴ Kanyhi kuwukamisa no wihuwizo wako wono wamwihuwiziza baba Dawudi, nalu kwi zuwali zinghani zose zakondya kuficilicila.

²⁵ Nalu go Muwaha Mulungu, go Mulungu wa Isilayeli, alu kanyhi nghukulomba wufisilize no wihuwizo wono wamwihuwiza baba Dawudi, lono wamulonjela nha vyono vilo vyose wa mu lulelo lwako wojendelela kutema muli Isilayeli, hono wakuhulice gwegwe nha vyono mwene Dawudi yakuhulika.

²⁶ Holeka aluno Gwe go Mulungu wa Isilayeli, nghukulomba wuzinoze zose ziwe za mbeka, nha vyono wamwihuwiza baba Dawudi u mwitumami wako.

²⁷ “Gwe go Mulungu, alu mbeka, kosuma kwikala mono yinze? Wulanje vyono wulanga hamba si wukukwiliye yaye, alu Nyumba yiyi yono nzenjile yo yokukwila?

²⁸ Gwe go Muwaha Mulungu, u Mulungu wangu, ane nili mwitumami wako. Holeka wuhulice wulombe wangu, wumhele ne visakwa vyangu vyono nghukulomba izuwali.

²⁹ Weze kuyilanga Nyumba yiyi misi ne cilo, i hanhu baha hono gwegwe wahahagula, ho wuwe kuhembelwa. Alu, wuhulicize 'ne, lono cidomile ne Nyumba yako yiyi nghukulomba.

³⁰ Wuhulice wulombe wangu, hamonga no wulombe we wanhu wako, lono nawo wowa wakukulomba vidomile wusu wawo ne hanhu baha. Gwe go Mulungu mono wikaye kuko ku wulanga, wucihulice kanyhi wucinenele.

³¹ “Na hono munhu yasitakwe vyono kamusutizya yunji, na hono yaletwe ha cikumbicilo mu Nyumba yako, yaze yelahize nha vyono mwene yasina masutya.

³² Gwe go Muwaha Mulungu, wuhulice kuko ku wulanga wumuling'anize mwitumami wako. Wumulipicize musutyi, wumulecele ayulya mono yasina lisutya.

³³ “Ne wanhu wako wa Isilayeli, kolo wasumwa ne walugu wawo ku soko vyono wakusutizya, ninga kolo wakukuwuyila, no kuza mono Nyumba yiyi, wakukulomba ko winenenyhezi, wakuhila wuwanenele,

³⁴ ale wuwahulikaje kuko ku wulanga. Wuwanenele wanhu wako wubi wawo, wuwagomole kanyhi ku yisi yono wawapela walezi wawo.

³⁵ “Na hono wikale si wutonyeze mvula ku soko yo wubi we wanhu wako wono wakutendeye, ninga kolo wakunena, wedome ne Nyumba yiyi wakulombe ko winenenyhezi,

³⁶ wuwahulicizaje kuko ku wulanga. Wuwunenele wubi wo mutemi, sunga na we wanhu wa Isilayeli. Wuwejize wetume ze ling'ani. Hanyuma wutonyeze mvula mu yisi yako yono wawapela wanhu wako yiwe yawo.

³⁷ “Na hono yigwe nzala mu yisi, hamba lihuhuji, lunji gagwe mawumbi ga nzije, hamba lunji wanhu wako wahomwe ne walugu wawo, hamba lunji hono hawe ho gali matamwa, hamba wutamwa muli wene,

³⁸ wuwahulikaje wulombe wawo. Na hono hawe ho yuli yunji wa muli wanhu wako wa Isilayeli yena wusungu mu nhumbula yakwe, wagolole miwoko yawo wakulombe baha hono Nyumba yako,

³⁹ wuwahulikaje wulombe wawo, wuwahulice kuko ku wikalo wako ku wulanga, wuwanenele, kanyhi wuwataze. Nagwe nha yo gwegwe du wuli wene mono wugamanyile mahweso ga mu nhumbula yo munhu. Holeka wumulangaje munhu wo wose nha vyono yimunojeye,

⁴⁰ I wanhu wako ho wakuhulice gwegwe vilo vyose vyo wikale wawo wa mono yisi, yono wawapela walezi wetu.

⁴¹ “Na kolo mujenzi mono yekaye ku yisi ya kutali, yakuhulika zo lukumyo lwako, hamonga na ze mawaha gono wawatendela wanhu wako,

⁴² nayo yawe kuza kukuhemba no kulomba mu Nyumba yiyi,

⁴³ wumuhulice wulombe wakwe. Wamuhulice wulombe wakwe kuko ku wulanga kono wikaye, kanyhi wumutendele zose zono yakukulomba. Ne wanhu wose wa mono'nze holeka wakumanye no kukuhulika gwegwe, nha vyono wanhu wako wa Isilayeli wakukuhulika. Kanyhi ho womanya nha vyono Nyumba yiyi yono nzenjile, ho hanhu hono hanojeye wakuhembele gwegwe.

⁴⁴ “Nagwe lono wukuwalajiliza wanhu wako wabite ku wulugu wakehome ne walugu wawo, na hono wakulombe wemile ho hose hono wowa, ninga wawe walilanjile likaya lili lyono walihagula, ne Nyumba yako yono nakuzenjela,

⁴⁵ wuhulice wulombe wawo. Wuwahulice kuko ku wulanga, wuwapele wusume kuli walugu wawo.

⁴⁶ “Na kolo wanhu wako wakukusutizya, hambi nha hasina munhu mono si ketumaga wubi, nagwe mwi'kuwo lyako wuwalece walugu wawo wawasume, kanyhi wawasole wenha wafungwa wawategule ku yisi yinji, hamba yisi yiyo yiwe yili kutali muno muno,

⁴⁷ ninga wuhulice wulombe we wanhu wako. Na hamba wawe wali ku yisi yiyo, ninga hono wanene, wakulombe, wakuvumila nha vyono mbeka wetuma wubi kanyhi wali cibede, ale wuhulice wulombe wawo Gwe go Muwaha Mulungu.

⁴⁸ Na hono wanene kwe nhumbula ye mbeka lono wali ku yisi yiyo, ho wakulombe akuno wadomizye wusu wawo ku lubavu lwa kono yisi yiyi, yisi yono wawapela i walezi wetu, ne likaya lili lyono gwegwe walihagula, ne Nyumba yiyi yono nakuzenjela gwegwe,

⁴⁹ ale wuhulicize wulombe wawo. Wuwahulice kuko kono wikaye ku wulanga, kanyhi wuwawonele lusungu.

⁵⁰ Wuwanenele wubi wawo wose, hamonga ne cibede cawo ca kuli'gwe, kanyhi wuwanoze walugu wawo wawatendele viswanu.

⁵¹ Hambi wene nha wanhu wako wono wawawusa ku yisi ya Misili mwi 'lambi lyo moto.

⁵² “Gwe go Muwaha Mulungu, nghukulomba wuwalanje wanhu wako, hamonga no mutemi wawo, ko lusungu, wuhulice no wulombe wawo lono wakukulomba wutazi.

⁵³ Agwe yo gwegwe mono wawahagula ku wulawa muli wanhu wose, ho wawe wanhu wako, nha vyono wawalonjela muli Musa u mwitumami wako, lono wawawusiza i walezi wetu ku Misili.”

Lilombo lya Solomona, lye ndumilizo

⁵⁴ Nayo Solomona yali yeza kukondya kumulomba Muwaha Mulungu, yakema ha mwande ye cikumbicilo, baho hono yali yafugame akuno yagoloye ne miwoko yakwe.

⁵⁵ Yakenula lizi lyakwe muno muno, yakawa kuwa lugutiza wanhu wose wono wali wehangulize baho, yakatya,

⁵⁶ “Muwaha Mulungu yalumbwe mono yawapelile wanhu wakwe mulamu, nha vyono yehuwiza yiwe. Nayo kawukamisa wihuwizo wakwe wono yehuwiziza muli Musa u mwitumami wakwe.

⁵⁷ Muwaha Mulungu wetu yeze yali hamonga nase, na vyono yali yali hamonga ne walezi wetu, yalece kucilecela lukulu, hamba kucisemwa yaye.

⁵⁸ Yacipele cogopo ca kuli mwene, nhondo zose, ho cikale mu mikalile yono yikumwendeza mwene, kanyhi cibate no wulajilize wakwe, hamonga ne malajilizo gakwe, gono yawapela walezi wetu.

⁵⁹ Muwaha Mulungu, u Mulungu wetu, yeze kuwukumbucila wulombe wetu, hamonga ne malombo gose gaga gono nimulombile. Nhondo zose, yeze no lusungu kuli wanhu wakwe Waisilayeli na kuli mutemi wawo, muli visakwa vyawo vye nhondo zose.

⁶⁰ Ne makungugo gose ga kononze ho gomanya nha vyono, Muwaha Mulungu yo Mulungu du yali wene, hasina yunji kanyhi.

⁶¹ Holeka nanye mo wanhu wakwe, munojeye mweze wehuwilwa kuli Muwaha Mulungu u Mulungu wenyu, mweze na cihuliko kuli mulajilize wakwe hamonga ne malajilizo gakwe nha vyono munozize zuwali.”

Wusiwanulwe we Nyumba yo Mulungu

⁶² Hanyuma mutemi Solomona, hamonga ne wanhu wose wono wali wali baho, wakamulavizya Muwaha Mulungu makumbiko.

⁶³ Yakalavya yitewa lya ng'ombe zificile elufu makumi mejete na nyejete, hamonga na ngholo elufu yigana limonga na makumi mejete, ku so cilavywa co mulamu. Hanyuma nhondo, mutemi hamonga ne wanhu wose, wakayisiwanula Nyumba yo Mulungu.

⁶⁴ Na mwizuwa lilyo du, yakalisiwanula ne likumbo lya hagati, lyono lyali ha mwande ye Nyumba yo Mulungu, yakalavya baho ne makumbiko ge cilavywa cinyanywe, ne vilavywa vyo wusaje, ne mhama ye zimitugo so cilavywa co mulamu. Nayo yanoza zizino vyono cikumbicilo ce shaba cali cidodo ku wulavizya vilavywa vivino vyose.

⁶⁵ Nayo Solomona hamonga ne Waisilayeli wose, wakayisangalalila sikukuu ye vibanda, vilo mupunghati baho ha Nyumba yo Mulungu, kanyhi yakonjeza ne vilo mupunghati vinji, vikawa hamonga vilo yikumu na vine. Ne wanhu wono wali wali baho, wali wanhu wenji muno muno, wanji walawilila kutali muno muno kotya wanya Hamati Pasi, kusumuka, ne Wamisili wulawa ku mupaka wa kutakama.

⁶⁶ Na mwi'zuwa lyo munana nhondo Solomona ho yakawa kuwakombola wanhu wawuye ku zikwawo. Ne wanhu wose wakamulumba muno Solomona, wakawuya ku zikwawo wena nyemo mbaha, ku soko yo wulugutwe wose wono Muwaha Mulungu yamupela Dawudi mwitumami wakwe, hamonga ne wanhu wakwe wa Isilayeli.