1 Watemi 14 - Luganuzi Luswanu Kuli Wanhu Wose 2002

U wufwe wo mwana wa Yelobowamu

¹ Na mu mapango gago, Abiya u mwana wa Yelobowamu yakawa yatamwa.

² Nayo Yelobowamu yakamulonjela mugolece wakwe yakamutya, “Alu winozaje wuwe nha wuli yunji, wanhu ho walece kukumanya, wubite ku Shilo kono kekalaga muwizi Ahiya, mono yanonjela vyono ane nowa mutemi wa Isilayeli.

³ Wumutegulilaje mikate yikumi na keki nyhefu, hamonga ne njilo yo wuci. Wubite wukamuwuze cono comwijelela mwana wetu Abiya, nayo kokulonjela.”

⁴ Hodu yuyo mugolece wakwe, yakawa kumubitila Ahiya ku Shilo. Nayo Ahiya yali yakondya kubofula so wukombi wakwe.

⁵ Ninga Muwaha Mulungu yali yakondya kumulonjela nha vyono, u mugolece wa Yelobowamu yakuza kumuwona, ku soko yo mwanagwe mono yatamigwe. Nayo Muwaha Mulungu yakamulonjela Ahiya zono kolonga. Nayo mugolece wa Yelobowamu yali yeza kufika, yakawa yenozize nha munhu yunji.

⁶ Ninga Ahiya yali yeza kuhulika sesele ha mulango, yakamanya vyono yo mweneco yaza, holeka yakamutya, “Wuhelele. Ane manyile vyono yo gwegwe mugolece wa Yelobowamu, alu nhawule wukwinoza nha wuli munhu yunji? Ninga ane nina nghani kuli'gwe yono si yokwendeza yaye.

⁷ Wubite wukamuloloseze Yelobowamu nha vyono Muwaha Mulungu, u Mulungu wa Isilayeli yakumutya nhavi, ‘Ane nakuhagula muli wanhu, nghakunoza wuwe mutemi muli wanhu wangu Waisilayeli.

⁸ Nghawuwusa wutemi kuli lulelo lwa Dawudi, nghawa kukupela agwe. Ninga nagwe si wasaka wihwane nho mwitumami wangu Dawudi, mono yali yahulicile muno muno, kanyhi yetuma zo wuhile wangu.

⁹ Ninga agwe wakondya kwituma wubi kuciza wose wono wakulongolela kutema. Agwe wakondya kunema'ne, kanyhi wakondya kulisagala likuwo lyangu so wunoza vihwani viseswe, hamonga ne vihwani vyenjedulwe, no kvuihemba.

¹⁰ Holeka nane ku soko yiyo, nokuletela wongomele munyumba yako, nowawulaga we cilume wose wa mu nyumba yako, i wana wadodo, hamonga ne wanhu mututu wose. Nane nowaleka wa mu mhuga yako wafwagulwe nhe matakataka.

¹¹ No munhu wo wose wa mu mhuga yako mono kofwila mwi'kaya, muwili wakwe woligwa ne mabwa, nayo mono kofwila mwi'hala, muwili wakwe woligwa ne zi'ndi. Nene no Muwaha Mulungu vyo nakondya kutya.’ ”

¹² Ahiya yakajendelela kumulonjela mugolece wa Yelobowamu, yakutya, “Alu mudala, wuwuye ku kaya, ninga vyono wukulikanyaga likaya du, baho baho no mwanago kofwa.

¹³ Ne wanhu wa Isilayeli wose womuzika no kumulilila. Nayo kowa yo yuyo yumonga du wa mu mhuga ya Yelobowamu mono kozikwa, hambi nha yo yuyo du mono u Muwaha Mulungu, u Mulungu wa Isilayeli yendezwe nayo.

¹⁴ U Muwaha Mulungu komwinulila mutemi yunji muli Waisilayeli mono kowudumizya lukulu wutemi wa Yelobowamu.

¹⁵ Muwaha Mulungu kolowalipiciza Waisilayeli, kolowasinjisa nha vyono cikolongo cisinjisaga madete mu'gati yaco. Kowawusa Waisilayeli mu yisi yiyi swanu muno, yono yawapela walezi wawo. Nayo koloweyagaziza ku nhumbi ye likolongo lya Efulata, hambi nha walisagala likuwo lyakwe, so wusesa vihwani vyo mulungu we cicekulu Ashela.

¹⁶ Nayo Muwaha Mulungu kolowaleka Waisilayeli vyono Yelobowamu yetuma wubi no kuwanoza Waisilayeli wetume wubi nhavivyo.”

¹⁷ U mugolece wa Yelobowamu yakawa kutuluka, yakafika ku Tiliza. Ninga yali yeza kufika du ha mulango, nayo mwana yakawa kutajika.

¹⁸ I wanhu wa Isilayeli wakamuzika, kanyhi wakamulilila muno, nha vyono Muwaha Mulungu yalonjela muli mwitumami wakwe, u muwizi Ahiya.

U wugwe wa Yelobowamu

¹⁹ Ne zinghani zose zo mutemi Yelobowamu, zinghani zo wulugu wono yehomaga, na zo wuteme wakwe, zose zandicigwe mu citabu ce zinghomo ze Metumo go mutemi Yelobowamu wa Isilayeli.

²⁰ Nayo Yelobowamu yatema myaka makumi mejete na myejete. Yakafwa, yakazikwa. No mwanagwe mono yacemwaga Nadabu yo yakahala wutemi wakwe.

U mutemi Lehobowamu wa Yuda

²¹ Lehobowamu u mwana wa Solomona, yali yaficila myaka makumi mane na monga, lono yatemela mu Yuda. Nayo yakatema myaka yikumi na mupunghati mu Yelusalemi, mwi' kaya lyono Muwaha Mulungu yalihagula mu wulawa mu yisi yose ya Isilayeli, hawe ho hanhu hakwe hono kowa kuhembelwa. U nyina wa Lehobowamu yacemwaga Nama, munya Amoni.

²² I wanhu wa Yuda nawo wakamusutizya Muwaha Mulungu, wakamusagahiza Mulungu likuwo lyakwe, yakawakolelwa likuwo muno ku soko yowubi wono wetuma kuciza ne walezi wawo.

²³ Hambi nha wazenga hanhu ho kuhembela milungu yo wulambi, wakasimya masumbili ga mabwe, hamonga ne cihwani co mulungu we cicekulu Ashela, no kucihemba mumo mu vigongo vitali, na mu mibeho hasi ye mibici.

²⁴ Ne nghani yono yali 'mbi muno, hakawa ho wali walume wono wagonaga ne walume wayawo, hamonga ne wacekulu wasenyha, wono wetumamaga mu wuhembelo we milungu yo wulambi. I wanhu wa Yuda waketuma makani ga cevu muno, gono wetumaga i wanhu wono Muwaha Mulungu yawawinga mu yisi, lono Waisilayeli wenjilaga mu yisi yiyo.

²⁵ Na mu mwaka we hano wo wutemi wa Lehobowamu, Shishaki u mutemi wa Misili, yakayihoma Yelusalemi.

²⁶ Yakayisola sawo yose ya mu Nyumba yo Mulungu, hamonga ne sawo yose ya mwi'kulu, hamonga ne zingula zose ze zahabu zono Solomona yazinoza.

²⁷ U mutemi Lehobowamu, yakanoza ngula zinji za shaba yakahaliza. Yakawalajiliza wetumami wakwe wawaha, walindilize milango ye likulu.

²⁸ Na mu mapango gose gono mutemi yenjilaga mu Nyumba yo Mulungu, i walindilizi nawo wazidinghulaga zingula, na hanyuma kanyhi wawa kuzigomola mu cinyumba co kuzikamisiza.

²⁹ Ne zinghani zose zono mutemi Lehobowamu yetuma, zandicigwe mu citabu ce zinghomo ze Metumo ga watemi wa Yuda.

³⁰ Na mu mapango gose gago, Lehobowamu na Yelobowamu, wekalaga wakwihoma du.

³¹ Lehobowamu yakafwa, yakazikwa mu vitenjelo vye citemi, mu kaya ya Dawudi. Na Abiya u mwanagwe yakahala wutemi wakwe.