Zincimpi 8 - Libuka Lya Kuyela

Ngana Zikuyemeziwa

¹ Yuvwilila! Ngana zili na kwihana. Kuyuvwishisha kuli na kubilikiza.

² Ngana zinemana ha binkanda kunkumo ya mukwakwa, naha mahambanzila.

³ Hahepi na lipangati lya mu munzi, likwihana ku menginino ngayi,

⁴ “Nili na kwihana enu bantu, enu nimwenu ba hano hanci.

⁵ Enu bakuyeba, lilongeshenu ngana, enu bileya, nenu kami yuvwishishenu.

⁶ Yuvwililenu, ndaba nikwamba byuma byabinene, mu kanwa kami mwa fumanga byambo bya kupwisha.

⁷ Nambanga bya kupwisha, mahalo shuma sha wunyengwe mu kanwa kami.

⁸ Mazu ami nimwawo enga a kwoloka, kaliha nambanga mahalo hinge kwamba bya ku shanwisha.

⁹ Mazu nimwawo enga akupwisha kuli ou ukuwayuvwishisha, enga amawahe kuli baya bali na ngana.

¹⁰ Hata bilongesha byami kupitakana shiliva, hinge kalimukisho kupitakana ngolinde.”

¹¹ “Ndaba ngana zinapitakana mamanya a ndando yayinene, kami ku byuma twashinganga kowa sha kulifwanikiza na ngana.

¹² Ami ngana na zika hamo na kukeya, nekala na kalimukisho kakuhalula byambo.

¹³ Kutina Nyambi ya Ngula, kunengi kuzimba wubi. Nazimba kuliyemeza na kulilundumika, biheka byabibi na nyambilo ya kuluwanganisha.

¹⁴ Kubela na ngana byenga byami, nayuvwishishanga kami nekala na ngovu.

¹⁵ Bamyene ba kulela ndaba ya nami, kami batulela ba kuyaka ndayano za kupwisha.

¹⁶ Nimwabo bantwamina ba kupwisha ba kulela ndaba ya nami.

¹⁷ Niku haka baya bahaka, kami baya ba kuncinga ba kungwana.

¹⁸ Wuheti na maleema nekala nabyo, wuheti wa mwaya myaka na kutangama.

¹⁹ Mikabo yami yayiwahe kupitakana ngolinde yayiwahe shikuma, nanebye nikuwaninamo byabiwahe shikuma kupitakana shiliva yayiwahe shikuma.

²⁰ Nendanga mu nzila ya kulunga, na nzila ya kupwisha,

²¹ ngayi mwanga baya ba ku haka nibaheteshe, mwanga bikongelo byabo binzale na wuheti.”

²² Nyambi ya Ngula walengele ami ngana, niko nekalile oho shilolo alenge hanci.

²³ Nengile wendi ku balika kushikale, kufuma ku kutatika oho kaye shilolo katatike.

²⁴ Niko nekalile oho shilolo kwikale mawate, oho shilolo kwikale tuheloke twa mema.

²⁵ Niko nekalile oho mapili shilolo atendiwe, na binkanda oho shilolo bikaleko.

²⁶ Oho shilolo alenge hano hanci na mafuba, na lukungu oho shilolo lubalike kwikala hanci.

²⁷ Niko nekalile oho ayakile mayilu mu mwanya, oho azingwilishile nginza ku mampunga.

²⁸ Oho ayakile makumbi kuyilu, pe wayakile tuheloke twa mema mu mampunga.

²⁹ Oho afundilile liwate nginza, ngayi mema abule kukiluka mazu, zendi kami oho afundikile mwimbi wa hanci.

³⁰ Ami nekalile kumbalila yendi ngonehe muntu mukakuyavwa wamanono, uya awahililanga nendi ha mutena ha mutena, nengile waku wahilila shikati nimwasho ku meho wendi.

³¹ Ku wahilila mu kaye kendi mwazika bantu, na ku wahilila na bantu.

³² “Haya yuvwililenu kukwami, enu bana bami, mfuywezi za nobo ba kulama zinzila zami.

³³ Yuvwililenu ku longesha kwami, pe mwikale na ngana hinga muzikana.

³⁴ Mfuywezi za muntu ou ukuyuvwilila kukwami. Walamanga ku mapangati wami ha mutena ha mutena, ukutatilila ku shipana shami.

³⁵ Ndaba ou nimwendi ukungwana pe nawana wumi, kami ukuyamiziziwa kuli Nyambi ya Ngula.

³⁶ Ngoboni ou nimwendi ukukwanga kungwana ukulikolesha niye mwine, nimwabo banzimba ba ku haka lufu.”