Zincimpi 7 - Libuka Lya Kuyela

¹ Mwanami, yuvwilila kunebye nikwamba, hinga uvulama ebye nikukutongweza.

² Lama mazu wami pe ukayoya, ulame ku longesha kwami ngonehe walamanga wuheti wa ndando yayinene shikuma.

³ Ayake mu mutima wobe bikati nimwabyo ngonehe kambalamunwe kobe, pe atikite ha litapa lya ha mutima wobe.

⁴ Wambe ku ngana ngayi, “uli mpanzami,” kami toya ku yuvwishisha ngayi hilanyobe.

⁵ Zikakulama kuli mukaza muntu wa wumambe, naku nyambilo yendi ya kutekenyesha.

Bya Mukazi Walwiholwiho

⁶ Mutena wamina napenzelele mu limpananga lya litala lyami, ha munkanda,

⁷ namonene bandumbana babengi bakuyeba, mukati ka bandumbana natosheleho ndumbana umo wakubula ngana.

⁸ Wayilenga mu mukwakwa wa hahepi na noku ekala uya mbuyama walwiholwiho, wendelenga mu nzila yikulumba ku litala lyendi.

⁹ Ha shikati sha kulela kwa mutena, ha kaboko bwii.

¹⁰ Niho mu litala mwatutikile mbuyama na kumushimbawila, wavwalile bivwalo ngonehe walwiholwiho, wengile walikeyelela.

¹¹ Ou mbuyama wengile tenkuma, mukakuheheza lutu lwendi kami kaliha wekalishilenga ha litala lyendi.

¹² Aha ukuwaniwa mu mikwakwa, aha ukuwaniwa mu myanya ya kulandishila, wonzelanga kuholazama ku zinkomi nimwazo.

¹³ Pe uya mbuyama wavumbatilile uya ndumbana naku mu zupeza, na lupala lwa kubula lisheni wambile kukwendi ngayi,

¹⁴ “Lelo ninakombelele nkombela, ya kulilumikila haya nikutenda ebye nalibezele.

¹⁵ Nohobene ninezi ngayi nilimone nobe, nekalile naku ku shingashinga haya nakuwanakale.

¹⁶ Nayala wulili wami, na makwiza a mishombela amawahe akulelema aku Engepita.

¹⁷ Namyanzili ha wulili wami na lukumba lwa kunuka shiwahe, lwa miila na lilambwe na shinamoni.

¹⁸ Yeka, haya twikale hamo wushiku nimwawo, tulitekenyeshe na kulihaka.

¹⁹ Mukokwami kowa ku litala, unayi mukala wawutali.

²⁰ Unashimbi mali amengi mushikwama, pe ukaboka munyima ya zishunda zibili.”

²¹ Nohobene uya mbuyama wabengezekele uya ndumbana, kami wamutweshele na mazu akumutekenyesha.

²² Hohobene wakonkele uya mbuyama, ngonehe ngombe ukuya mu kuzihiwa, hinge ngonehe lusha wunafu mu linkambwila,

²³ kukuma ha kuyahiwa muvwi ku litima. Ndumbana nafweke ngonehe kayoni kakwitukila mu kapeto, kubula kulimuka ngayi ukaleyekamo wumi wendi.

²⁴ Haya, enu bana bami yuvwililenu, tengekenu matu wenu kunebye nikwamba.

²⁵ Hinga mwitabila mbuyama wanoho ngayi amitengulule ku zinzila zendi, hinga mu konkezeka.

²⁶ Ndaba ou mbuyama unapukalishi balume bangovu, kami naleyekemo bantu babengi shikuma.

²⁷ Litala lyendi unengi mukwakwa, uku kunkulukila ku kalunga ka bafu.