Zincimpi 6 - Libuka Lya Kuyela

Mazu Amina Akushiwulula

¹ Mwanami, hinge ndi wakulupishile kwimanina mukuli wa muntu wamina, ou una kwanga kuyumba mukuli wendi.

² Niho unafumo mukapeto, ka bikulupisho byobe.

³ Mwanami, ndi unatende noho, pe uli mu maboko a uya ndambo yobe, haya tenda ebye, ngayi ulishobolemo. Yanga kukwendi, lishishe na kulomba ngayi akuyatile.

⁴ Unafwanini kutenda ebye shilolokale ulale hinge kuya mutulo.

⁵ Lilamwine obemwine, ngonehe kayoni ka kutina mukakubebula, hinge ngonehe kapunza ukutina shibinda.

⁶ Obe muvwa, hanganika nyinkalo ya mashenze, ngayi ulilongesheho mwanga wikale na ngana.

⁷ Niwo kaliha ekala na mwene, hinge ntwamina, hinge kalela,

⁸ ngoboni akungulanga byakulya ha shikati sha kuteza, kuliwahishila byakulya bya mayinza.

⁹ Ukalangana shikati sha kukuma hati obe muvwa? Kati ukapinduka shikati ngani mutulo?

¹⁰ Ukwamba ngayi, “Nishulubaleko taha, nikatulukeko shashishe.”

¹¹ Oho muvwa ashili kulangana, wuncepwe ukamushintikiza, ngonehe mwizi uli na bilwisho.

¹² Shileya, hinge muntu wakuluwa wakulankanyanga haya na kwamba mazu a mahalo.

¹³ Wanyantizanga na meho na kuhobweza na mawulu, na kulabiza na minwe.

¹⁴ Bikati nimwabyo ukuyongola kutenda byabibi, mukakuleta mishunga nimwako oku akuya.

¹⁵ Nohobene, malwa akamushintikiza, pe wanguwangu ukaloba, kami wufwako kukamoneka.

¹⁶ Kwekala byuma mutanu na shimo ebye Nyambi azimba, hinge mutanu na bibili byenga bya wunyengwe kukwendi.

¹⁷ Wazimba muntu wakuliyemeza, muntu wa mahalo, kuziha muntu wakubula mulandu,

¹⁸ mutima wabihanganiko byabibi, muntu ukwitukila mukutenda byabibi.

¹⁹ Muntu ukupaka mahalo, na muntu ukuleta mushunga mukati ka bawushinda wendi.

Mazu Akukanisha habya Wumambe

²⁰ Mwanami, lama mazu a tatiyobe, kami hinga ukana ebye mandiyobe akukulongesha.

²¹ Lama awa mazu shikati nimwasho, amangilile mu ncingo yobe.

²² Oho ukwenda aka kutwaminina, oho ukulangana aka kulama, oho ukupinduka aka kwambila.

²³ Ndaba mazu enga lumuni, na bilongesha byenga liyeye. Pe kami mazu akushiwulula muntu, enga nzila ya wumi.

²⁴ Aka kulamwina kuli mbuyama walwiholwiho, naku mazu akwongeza, a mukaza minobe.

²⁵ Hinga ulishoza ha wuwahe wendi, hinga ukokiwa na meho wendi.

²⁶ Ndaba mbuyama walwiholwiho, mulume ukutwesha kutenda nendi wumambe ha ndando ya linkende. Ngoboni kutenda wumambe na mukaza muntu, ukutwesha kulobesha wumi wobe.

²⁷ Kati muntu ukutwesha kushimba mundilo, ha kapumpo ha bivwalo byendi, na kubula kuhoka ndi?

²⁸ Kati muntu ukutwesha kwenda ha mashanga a mundilo na kubula kuhoka mu mawulu ndi?

²⁹ Nohobene, nimwendi ukutenda wumambe na mukaza muntu, unafwanini ku shushuliwa.

³⁰ Bantu kaliha bahandulanga mwizi, uya ukuyiba na kulya oho ndi uli na nzala.

³¹ Ngoboni ndi unakwatiwi, ayumbe uya mulandu bikati mutanu na bibili, pe bakamuyangula byuma byendi nimwabyo bya mu litala.

³² Muntu nimwendi ukutenda wumambe wufwazo ngana, uli na kulilobesha niyemwine.

³³ Muntu wanoho walifumishanga maleema. Kami lisheni kaliha likamumana.

³⁴ Ndaba mwine mukazi lihungu lya koleshanga shikuma, pe kutwesha kuyuvwila nceshe uya unamubipishili wufwako.

³⁵ Kukatambula ebye bakamuyumbila wufwako, kowa ndando yiya yikutwesha kumanisha kupilama kwendi.