Zincimpi 5 - Libuka Lya Kuyela

Mazu Akwamba ha Wumambe

¹ Mwanami, yuvwilila ku ngana zami, bengwila matu wobe ku bihanganiko byami,

² ngayi mwanga wikale na bihanganiko byabiwahe, pe ebye ukamba bikamonesha ngayi uli na ngana.

³ Ndaba nyambilo ya mbuyama wa wumambe yenga yayiwahe ngonehe wushi. Pe nyambilo yendi ya kuzemoka kupitakana mazi.

⁴ Ngoboni ku mamaninino anyambilo yendi, ukulula ngonehe ndulu, na kutwepa ngonehe mpoko ya mukwale.

⁵ Mawulu wendi aku kutwaminina ku lufu, nzila eye akwenda, yikuya ku shinzimbi.

⁶ Mukazi ou kwenda mu nzila ya wumi wufwako, ngoboni ukuyambangila pe kulimuka ebye bili na kutendiwa wufwako.

⁷ Haya nyuvwililenu enu bana bami, hinga muvulama mazu wami.

⁸ Hinga uhenyena hahepi na mbuyama wa noho, hinga uhenyena hahepi na shipana sha litala lyendi.

⁹ Kutina wupana maleema wobe ku baminobe, na kufwa wanguwangu ku bankole.

¹⁰ Nohobene, bayeni bakashimba wuheti wobe nimwawo, pe biya unayandili bikaya ku muntu washenge.

¹¹ Ku mamaninino a wumi wobe, ukalangana ha wulili na ku shunga, oho lutu lwobe lunapopo.

¹² Pe ukamba ngayi, “Shumangani shankwangishile kulilongesha? Bishini nakaninine bantu kunyambila.

¹³ Kaliha nombatalile balongeshi bami, hinge kubayuvwilila.

¹⁴ Wuluno nili na lisheni mukati, ka shikungulukilo nimwasho.”

¹⁵ Yikala wa kupwisha ku mukazobe, monesha shishemo shobe kukwendi ninkayendi.

¹⁶ Bana ukubeleka ku bakazi bashenge, bafwako kuka kuyavwa.

¹⁷ Bana benge bobe ninkayobe na mukazobe, hinga benga ba kuliwanikila na bantu bashenge.

¹⁸ Nohobene, wahilila na mukazi uya wayekele mu wundumbana wobe.

¹⁹ Enge wamuwahe kukwobe ngonehe shineke, wuwahe wendi ukuwahililishe, pe shishemo shendi shikuzinguluke.

²⁰ Mwanami, shumangani uku wahilila na mbuyama wawumambe, shumangani ukuhakila mukaza minobe?

²¹ Nyambi ya Ngula, wamonanga nimwabyo ebye atendanga muntu. Kami wamonanga zinzila nimwazo eze endanga muntu.

²² Muntu wakuluwa, wakwatiwanga mu wuleya wendi. Walikolekanga niyemwine mu linkambwila lya wubi wendi.

²³ Muntu wakuluwa wafwanga ndaba ya kubula kulilama, wuleya wabo wabatwalanga ku kufwa.