Zincimpi 4 - Libuka Lya Kuyela

Zincuungu Zawaniwanga mu Ngana

¹ Bana bami, yuvwililenu ebye tatiyenu akumilongesha, yuvwililenu shiwahe ngayi mwanga muyuvwishishe.

² Ndaba nikumilongesha byabiwahe, hinga muvulama ku longesha kwami.

³ Oho nekalile na batate, nishili ndumbana wamushe, hinga nenga mwana umo wakuyamiziziwa kuli bamawa,

⁴ batate bandongeshelenga ngayi, “Ombatala mazu wami na mutima wobe nimwawo, lama ndayano zami ngayi mwanga uyoye.

⁵ Hinga uvulama hinge kufutamina mazu wami, yikala na ngana na ku yuvwishisha byuma.

⁶ Hinga ukana ngana zikakulama. Zihake, pe zikakukobelela.

⁷ Kwikala na ngana, shinengi shuma shashinene unafwanini, kukobelela ku byuma nimwabyo ukwikala nabyo, yikala na ku yuvwishisha byuma.

⁸ Haka ngana, pe zikakutangamisha. Zibumbatile pe zikakwingisha wa maleema.

⁹ Ngana zikakuvwika munana ku mutwe, kami unengi munana wawuwahe.”

¹⁰ Mwanami, yuvwilila ebye nikwamba, tambula mazu wami, ngayi mwanga uyoye myaka yayingi.

¹¹ Nakulongeshe zinzila za ngana, ninakutwaminini mu zinzila za kwoloka.

¹² Kowa ebye bikakiyama mu zintambo zobe. Hinge ndi ukwituka, kukalituntula wufwako.

¹³ Anuka ebye banakulongeshe shikati nimwasho, zilame shiwahe ndaba nizo wumi wobe.

¹⁴ Hinga wenda mu zinzila za bakakuluwa, kami hinga utenda biya ba kutenda.

¹⁵ Benguka ku bya noho, hinga uhenyena ku byabibi, fumako yanga mu nzila yobe.

¹⁶ Bantu bakuluwa, kutwesha kulangana bafwako, hantu banatende shuma sha shibi ku muntu wamina. Bakushelengela wushiku nimwawo na kubula kulangana, hantu banakoleshe muntu umo.

¹⁷ Ndaba kutenda byabibi nibyo byakulya byabo, kami mushunga nibyo bya kunwa byabo.

¹⁸ Ngoboni zinzila za bantu bakulunga, zikufweka ngonehe kubelangana kwa lumenemene, oku kwahololanga liyeye lya mutena kutwala ha mutena muyilu.

¹⁹ Nzila ya bakuluwa, ya ku shipa ngonehe mincimpwe. Oho bapukalanga, kaliha balimukanga eshe shinabapukalishi.

²⁰ Mwanami, yuvwishisha mazu wami, bengwila matu wobe kunebye nikwamba.

²¹ Hinga witabila ngayi awa mazu, afume kukwobe, anukenga na kuwalama mu mutima wobe.

²² Mazu awa apanikanga wumi, na kunyongomanisha muntu nimwendi ukuwayuvwishisha.

²³ Lama mutima wobe, ndaba niwo wenga kaheloke ka wumi wobe.

²⁴ Hinga wamba mahalo, hinge kwamba mazu a kuluwisha.

²⁵ Meho apenze kumbili aha unalulumana, hinga ulishetoka shetoka.

²⁶ Enda na kukeya mu nzila ya kwoloka, pe ebye nimwabyo ukatenda bikalubuluka.

²⁷ Hinga ushanukila ku shilyo hinge ku shimoho, fuma ku byabibi nimwabyo.