Zincimpi 30 - Libuka Lya Kuyela

Mazu a Angule

¹ Mazu wa Angule mwana Yake, waku Masha, Nyambi kaliha uli na nami, Nyambi kaliha uli na nami, napopo shikuma.

² Mwa shikuma, nenga wakuyeba shikuma kupitakana bantu nimwabo, nifwazo ngana za kufweka ngo za bantu.

³ Shilolo nililongeshe ngana, hinge kulimuka nifwako niye wa Kuyela.

⁴ Kati yani nakandama kuyilu na ku huluka? Kati yani wakungula mpepo mu liboko lyendi na kuyikamatila? Kati yani wavungila mema mu shivwalo shendi? Kati yani wazikanga zinkumo za hano hanci? Kati lizina lyendi yani? Kami lizina lya mwanendi kati yani? Ndi hiwulimuka ntongweze.

⁵ Mazu a Nyambi nimwawo enga akupwisha, Nyambi wenga likebo lya baya ba kutinina mumwendi.

⁶ Hinga uyakila ku mazu wendi boha, kutina akukalihila, pe ukuwaniwa kwinga wa mahalo.

⁷ Na kukunyepa byuma bibili, kami hinga unkanina oho shilolo nifwe.

⁸ Fumisha mumwami mahalo na makula, hinga uncepwesha kami hinga umpana wuheti, ndeleshe na byakulya ninafwanini kulya,

⁹ kutina niyikuta shikuma, pe nika kukana na kwamba ngayi, “Kati Nyambi ya Ngula nengi yani? Ndi nikushepwa kami pe nikuyiba na Kubipisha lizina lya Nyambi yami.”

¹⁰ Hinga utungwila mukamulimo kuli hekulyendi, kutina akukuta pe ukawana mulandu.

¹¹ Kubali bantu bamo ba kutanga batatizabo, na kubula kutandalisha bamandizabo.

¹² Kubali bantu bamo ba kulimona ngayi ba kuyela, ngoboni shilolo bayoweshiwe mazilo wabo.

¹³ Kubali bantu bamo meho wabo akwimana, kami bikuku bya meho wabo bya kukabalala.

¹⁴ Kubali bantu bamo mayewe wabo anengi mukwale, mayewe wabo anengi zimpoko, akuvwota bancepwe kubafumisha hano hanci, akuvwota ba kuyanda na kubafumisha mukati ka bantu.

¹⁵ Linzambo wahuminanga kubili, nimwako kwa lilanga ngayi, “Mpane, wamina kami ngayi, mpane.” Byuma bihatu byabulanga kwikuta, hinge binaa byabulanga kwamba ngayi, “Nanyikwakale.”

¹⁶ Kalunga ka bafu, mbuyama wa mumba na hanci habulanga kwikuta mema, na mundilo wabulanga kwamba ngayi, “Nanyikwakale.”

¹⁷ Muntu uya ukushilawiza tatiyendi, na kukendula mandiyendi, ukaliwa ku makwangala amu mukulo, kami ukaliwa ku makubi.

¹⁸ Kuli byuma bihatu byenga bya kukomokesha, hinge binaa ebye nabula ku yuvwishisha.

¹⁹ Eshe atukanga ngonga mu mbimbayilu, eshe endanga liyoka ha limanya, eshe shishepe shendanga mu mawate, naneshe endanga mulume ahakanga mbuyama.

²⁰ Eye niyo nzila atendanga mbuyama walwiholwiho, watendanga wumambe amanisha akuyowela pe hakwamba ngayi, “Kowa ebye nabipishi.”

²¹ Kuli byuma bihatu byakankishanga kaye, hinge binaa ebye nabula kutwesha kuliyuvwa nabyo.

²² Ndungo oho akwinga mwene, wakuyeba oho anekutu byakulya,

²³ mbuyama wakubula kuhakiwa oho akuyekiwa ku maluwo, ndungo yendi uya mukazi ukamuyanga maluwo.

²⁴ Kuli byuma binaa byabishe shikuma hano hanci, ngoboni bya kukeya shikuma.

²⁵ Mashenze enga tulongolo twa kubula ngovu, ngoboni akonganga byakulya ha shikati sha kuteza.

²⁶ Masheha enga tuyamana twa kubula ngovu, ngoboni bayaka munzi wabo mu mamanya.

²⁷ Mikumbi kaliha bekala na mwene, ngoboni bendanga mu bipani.

²⁸ Ukutwesha kukwata muholobozi na maboko, ngoboni ukuwaniwa namu musheke.

²⁹ Kubili byuma bihatu byangwahilishanga oho byendanga na wulolo, binaa biya byendanga shiwahewahe,

³⁰ shimbwi wa ngovu shikuma hakati ka tunzama, mukakubula kutina shuma shamina.

³¹ Likombwe wakwituka shikuma, na shikungwe wa mpongo na mwene ukwenda kumbili ya bakanzita bendi.

³² Ndi wenga wakuyeba na kulilundumika, hinge ndi wavumbanga byabibi, fwika ku kanwa kobe.

³³ Ngonehe muntu ukufweta mahwe, ukawana mazi, na kukondolola muzulu wa muntu, kwatutwishanga mukeza, ukupilama shawangu, pe ukekala mu wukalu.