Zincimpi 3 - Libuka Lya Kuyela

Kulongesha Batwanuke

¹ Mwanami, hinga uvulama ebye nikuku longesha, ngoboni ulame mazu wami bikati nimwabyo.

² Ndaba, ndi ukutenda noho, bikakuyavwa kuyoya myaka yayingi, bikakuletesha kuyoya mu ku mwena.

³ Hinga witabila ngayi shishemo na kwoloka bifume kukwobe. Likolekebyo mu ncingo na kubitikita ha litapa lya mu mutima wobe.

⁴ Ndi ukutenda noho, Nyambi na bantu bakakuyemeza pe ukekala na lizina lyaliwahe.

⁵ Kukulupila muli Nyambi ya Ngula na mutima wobe nimwawo, pe hinga uzengamina ku bihanganiko byobe.

⁶ Bikati nimwabyo anuka Nyambi ya Ngula, pe ukakutwaminina mu nzila ya kupwisha.

⁷ Hinga ulimona ngana obemwine, yuvwila Nyambi ya Ngula bowa na kukana wubi.

⁸ Nohobene, lutu lwobe lukekala shiwahe, namu bifupa byobe mukekala minconco.

⁹ Lemeeka Nyambi ya Ngula na wuheti wobe, hamo na mbuto yobe ya kutatika kuteza.

¹⁰ Pe bishete byobe bikenzala nimwabyo, na bizongelo byenu bikahumpoka, na waine

¹¹ Mwanami, hinga upilama oho Nyambi ya Ngula akukushuza, hinge kukana ebye akukwambila.

¹² Ndaba Nyambi wa shuzanga baya ahaka, ngonehe hemi ya muntu ashinga mwanendi ou wa mu wahililishanga.

¹³ Uli na mfuywezi muntu uya ukuwana ngana, uya ukushinga ku yuvwishisha.

¹⁴ Ndaba ndando ya ngana, yinapitakana ndando ya shiliva, ngana zenga za kuyavwa shikuma kupitakana ngolinde.

¹⁵ Ngana zaziwahe shikuma kupitakana mamanya a kulelema, a ndando yayinene, nimwabyo ebye wahaka, kutwesha kulyezeka na ngana bifwako.

¹⁶ Ngana zikuyoyesha myaka yayingi, zekala mu liboko lyazo za shilyo, kami wuheti na maleema byekala mu liboko zalyo, lya shimoho.

¹⁷ Ngana zikutwesha kukuwahililisha mu kuyoya kwobe, kami zinzila zobe nimwazo zenga za ku mwena.

¹⁸ Ngana zenga ngonehe mutondo wawumi ku nimwabo ba kuzizundamina, uli na mfuywezi muntu nimwendi ukuzibumbatila.

¹⁹ Nyambi ya Ngula na ngana zendi walengele kaye, na ku yuvwishisha kwendi walengele mayilu.

²⁰ Na ngana zendi, waholwele mampunga, pe makumbi alokeshele mvula.

²¹ Mwanami, lama eze ngana, hinga witabila ngayi zifume mumwobe.

²² Zikenga wumi wa moyo wobe, na mukali wa nceshe mu ncingo yobe.

²³ Pe ukenda shiwahe mu nzila, kukalituntula wufwako.

²⁴ Oho ukalangana kukayuvwa bowa wufwako, kami ukalala mutulo twatuwahe.

²⁵ Hinga ukalikekula oho makalikiza akakubazumuna, hinge nkuli yikalobesha bakuluwa.

²⁶ Ndaba Nyambi ya Ngula ukakulama, afwako kuka kuleha ngayi wuwile mu linkwina.

²⁷ Hinga uleha kutenda wuwahe, kunobo bashinga kubatendela wuwahe, oho bili mu ngovu zobe za kutenda noho.

²⁸ Hinga wamba ku nowo wazika nendi hamo ngayi, “Boka taha, nzona wakeza niho nikakupanike,” oho shuma akushinga hinga wekala nasho.

²⁹ Hinga uhanganika kutenda byabibi ku muntu wazika nendi, ou wekala nendi shiwahe kami wakukulupila.

³⁰ Hinga ulikanangana na muntu oho kunabulu shuma shinatendiwi, ndi niye kukubipishila afwako.

³¹ Hinga ulishozela muntu wa mangunga, hinge kutenda ebye atendanga.

³² Ndaba Nyambi ya Ngula wazimba mukakutenda byabibi, ngoboni wahaka muntu wakwoloka.

³³ Shikuto sha Nyambi ya Ngula, shekala mu litala lya muntu wakuluwa, ngoboni wafuywelanga minzi ya bakulunga.

³⁴ Nyambi ya Ngula wahepanga bakakukendula baminabo, ngoboni wawahililanga na bakakulilimbwilisha.

³⁵ Bakangana ba kuwana maleema, ngoboni bakuyeba bakayuvwa lisheni.