Zincimpi 29 - Libuka Lya Kuyela

¹ Muntu nimwendi bakwambila shikati nimwasho, ngoboni niye hinga akaluhisha mutima wendi, pe wanguwangu ukaloba pe wufwako kukamoneka.

² Oho kalela wakulunga akwendesha litunga, bantu ba ku wahilila, ngoboni oho kalela wakuluwa akwendesha litunga bantu ba kushunga.

³ Ou uku haka ngana, wawahilishanga tatiyendi, ngoboni muntu wakulilama na balwiholwiho wapanzanishanga wuheti wendi.

⁴ Mwene ukwendesha litunga lyendi mu kwoloka, waletanga ku mwena, ngoboni ou ukutambula lizika kanwa walobeshangalyo.

⁵ Muntu ukwongeza ndambo yendi, ukulitandubwila kanyanzi ku mawulu endi niyemwine.

⁶ Muntu wakuluwa wa livwimanga lunyimbwa lwa milandu niyemwine, ngoboni muntu wakulunga wembilanga na kutangala.

⁷ Muntu wakulunga walimukanga likona lya mukakushepwa, ngoboni muntu wakuluwa kaliha wekalanga na kalimukisho kaku yuvwishisha bya nehe.

⁸ Muntu wawuncengwe wahokesheshanga munzi, ngoboni muntu wangana watulumanishanga wukali.

⁹ Ndi muntu wangana ba kulikananganisha na wakuyeba, wakuyeba wapilamanga na kukendula, kami kaliha wamwenanga.

¹⁰ Bakakuyita mukeza bazimba muntu wakubula mulandu, nibo bashinga tuhu kuziha bakwoloka.

¹¹ Muntu wakuyeba wamoneshanga kupilama kwendi, ngoboni muntu wangana wakwatanga mutima.

¹² Ndi kalela ukuyuvwilila mahalo, pe babilolo bendi nimwabo bakenga bakuluwa.

¹³ Ncepwe namukakulyatilila minendi bakwezekela hamo, Nyambi ya Ngula niye wabalengele nimwabo.

¹⁴ Ndi mwene ukuyata shiwahe mukakushepwa, litanda lyendi likashuma mwaya myaka.

¹⁵ Lunyanzi lwa kuzipola kanuke lwamupananga ngana, ngoboni kanuke wakuleliwa mpoza waletelanga mandiyendi lisheni.

¹⁶ Oho bakuluwa bali mu ngovu za kwendesha litunga, wubi wahanyanga, ngoboni bakulunga bakekala na ku mona kuwa kwabo.

¹⁷ Keyesha mwanobe, pe ukakuletela ku mwena, kami ukawahilisha mutima wobe.

¹⁸ Bantu bakubula kutwamininiwa na lizu lya Nyambi, ba kuloba, ngoboni mfuywezi za uya ukulama mulao wa Nyambi.

¹⁹ Mukamulimo kutwesha kukeyeshiwa na mazu anahiya wufwako. Hinge ndi nayuvwu ebye bakwamba ngoboni kuyakako ngana wufwako.

²⁰ Muli kulumbeza shikuma muli muntu wakuyeba kupitakana muntu wakwamba na kulokomoka.

²¹ Ou ukulela mukamulimo wendi ku balika kuwanuke, akakula ukakona byuma bya hekulyendi nimwabyo.

²² Muntu wamukali washonkomonanga ngunga, kami muntu wakapilamina waleteshanga wukalu na kulyamba.

²³ Muntu mukakulilundumika washepeshiwanga, ngoboni mukakulilimbwilisha mu mutima wawananga maleema.

²⁴ Wakulilumikila na mwizi, wazimba wumi wendi, ndaba oho akuyuvwa shambo walibezanga ngoboni niye ku shimika wufwako.

²⁵ Kuyuvwila muntu bowa kwenga kulivwima lunyimbwa, ngoboni mukakukulupila muli Nyambi ya Ngula ukekala shiwahe.

²⁶ Bantu bashinganga kuyemeziwa kuli kalela, ngoboni kuli Nyambi ya Ngula niko ba kuwana kupwisha.

²⁷ Muntu wakubula kupwisha wenga wa wunyengwe ku muntu wakulunga, ngoboni muntu wa nzila ya kuluwa wenga wawunyengwe ku muntu wakulunga.