Zincimpi 28 - Libuka Lya Kuyela

¹ Bakuluwa betukanga oho waku batanda kowa, ngoboni bakulunga benga ba kukanca ngo shimbwi.

² Oho litunga liku bipisha likuleliwa na batulela banungunanungu, ngoboni litunga likashuma na kwikala shiwahe ndi likwikala na batulela ba kukeya.

³ Muntu nimwendi ukulyatilila bancepwe, nafweke ngo mvula wa nkuli uku bipisha byakulya.

⁴ Obo bakana kutenda mwayila ndayano ba kuyemeza muntu wakuluwa, ngoboni bakakulama ndayano ba kukona bantu bakuluwa.

⁵ Bantu bababi kaliha bayuvwishishanga byakwoloka, ngoboni baya bashinga Nyambi ya Ngula ba ku yuvwishisha shiwahe nimwabyo.

⁶ Shashiwahe ncepwe ukwenda mu nzila ya kupwisha, kupitakana muntu wakuheta ou uli na biheka byabibi.

⁷ Mwana ukulama ndayano za Nyambi wenga wangana, ngoboni wakutenda wuhoni na muntu wakubula ku fwanina ukuyeneshesha tatiyendi.

⁸ Ndi ukuwezelela wuheti wobe na nkambiko yayinene shikuma ya kukeyela bantu, pe wuheti wobe ukaya kuli uya uli na nceshe na bancepwe.

⁹ Ndi muntu umo ukuzika matu wendi ngayi abule kuyuvwa mulao, hinge malombelo endi akwinga a wunyengwe kuli Nyambi.

¹⁰ Ou ukushanwisha muntu wakwoloka na kumutwala mu nzila yayibi, ukawila mu liteke lyendi niyemwine, ngoboni bakubula nyanco bakekala na likona lyaliwahe.

¹¹ Mukakuheta walimonanga ngayi uli na ngana, ngoboni ncepwe uya mukaku yuvwishisha ukamupitakana.

¹² Oho kalela wakulunga akukona kukwikala ku wahilila kwakunene, ngoboni oho kalela wakuluwa a kulela bantu ba kupanzana.

¹³ Ou ukuholeka milandu yendi kukatangama wufwako, ngoboni ou ukulitabila na kuwu futamina Nyambi ukamuyuvwila nceshe.

¹⁴ Uli na mfuywezi uya ukuyuvwila Nyambi ya Ngula bowa shikati nimwasho, ngoboni ou ukukaluhisha mutima wendi ukekala mu malwa.

¹⁵ Kalela wakuluwa, kulela bantu ba kuyanda nafweke ngo shimbwi ukubuluma na mbeya ukuhashoka.

¹⁶ Kalela wakubula ngana nengi mukakulyatilila wanguma, ngoboni ou ukuzimba wuheti wakubula kuwana mu kupwisha ukayoya matena amengi.

¹⁷ Ndi muntu nayiti mukeza waminendi, ukenga wakutampwa kutwala kulufu lwendi, kowa wamina ukamuyavwa.

¹⁸ Muntu ukwenda mukwoloka ukapuluka, ngoboni muntu wakuluwa ukawa.

¹⁹ Ou ukulima mfuba yendi ukekala na byakulya byabingi, ngoboni wakukonka byowa ukenga ncepwe shikuma.

²⁰ Muntu wakulunga ukekala na mfuywezi, ngoboni wakunyankupila ngayi ahete ukashushuliwa.

²¹ Ku monesha shihota kaliha shashiwahe, ngoboni muntu ukutwesha kutenda shibi ndaba ya kalizika kanwa.

²² Muntu wa lukatwa wanyankupila ngayi awane wuheti, kulimuka ngayi wuncepwe ukamwizililila wufwako.

²³ Ou ukwambila muntu ku mamaninino ukayemeziwa, kupitakana wa lulimi lwa mazu a kutekenyesha.

²⁴ Wakuyibila tatiyendi hinge mandiyendi pe hakwamba ngayi, “Owe kaliha mulandu,” unengi muhoni wa mukakunongesha.

²⁵ Muntu wa mutongo washonkomonanga mangunga, ngoboni ou ukukulupila muli Nyambi ya Ngula ukatangama.

²⁶ Ou ukulimona ngayi wakukeya niyemwine wenga wakuyeba, ngoboni ou ukwenda na ngana ukapulwishiwa.

²⁷ Ou ukupana ku bakakuyanda kukabula shuma wufwako, ngoboni ou ukuvunga liboko lyendi kukwabo ukekala na bikuto.

²⁸ Oho batulela bakuluwa ba kulela, bantu ba kupanzana nibo bamwine, ngoboni oho batulela bakuluwa ba kuloba, bakulunga ba kuvula.