Zincimpi 27 - Libuka Lya Kuyela

¹ Hinga ulilundumika ha bya nzona, ndaba kulimuka ebye eze bikatendiwe ha mutena uyo ufwako.

² Leha muntu washenge akuyemeze, kaliha obe mwine, kufume ku muyeni, kaliha mukanwa kobe.

³ Limanya lyenga lyalilemu, lihekelela kami lyalilemu ngoboni eshe akushonkomona muntu wakuyeba shenga sha kulema kupitakana wubili wabyo.

⁴ Wukali wenga nguma na kunongesha, ngoboni kowa shinafwanikizi na lihungu.

⁵ Shashiwahe kwambila muntu shintwantwa kupitakana, shishemo sha kumuholamina.

⁶ Bitombo bya muhoni wa muntu bilishiwahe, kupitakana ku zupeza kwa mukankole.

⁷ Wushi kaliha watobalanga ku muntu nekutu, ngoboni ku muntu uli na nzala nebye byabilulu byenga byabitobe.

⁸ Nehe kayoni ka shiyanga lihwa lyako, na muntu washiyanga munzi wendi.

⁹ Mazi na lukumba bya wahilishanga ku mutima, ngoboni wukalu wamanishanga ku mwena.

¹⁰ Ha shikati sha makalikiza hinga ukana muhoni wobe na muhoni wa batatiyobe oho ukushinga kuyavwiwa. Kami hinga uya ku litala lya kawushinda wobe, shashiwahe kuhenyena ku minobe uli nendi hahepi kupitakana kawushinda wobe uli kwakutali.

¹¹ Obe mwanami, yikala na ngana pe mutima wami ukawahilila, ngayi nitweshe kukumbula baya ba kunyanca.

¹² Muntu wangana waholamanga ndi namono malamo, ngoboni shibulangana ukuhenyenako pe hakwikala mu wukalu.

¹³ Muntu nimwendi ukukulupisha kwimanina mukuli wa muyeni wakuyeba, pe wafwanina kuyumba wuheti wendi nimwawo.

¹⁴ Muntu ukutandalisha minendi na lizu lya kukangoka ku shikati sha lumenemene shikuma, bakamutoya ngayi uli na kukutula.

¹⁵ Mbuyama wa nkani, wafweka ngo mvula wa muvumbi.

¹⁶ Kukanisha mbuyama owe kunalifweke ngo kukanisha mpepo, hinge kwinzalisha mazi a mema mu liboko lya shilyo.

¹⁷ Shondo shikukumba shondo shimina, kami muntu uku longesha minendi muntu.

¹⁸ Muntu ukukobelela mutondo wa mukuyu, ukalya mikabo yawo, kami muntu nimwendi ukulama hekulyendi ukatambula maleema.

¹⁹ Ngonehe muntu alimonanga lupala lwendi ha shimboni, na mutima wendi nisho wahololanga eshe ekala.

²⁰ Kalunga ka bafu na ngehena kukahuputuka bifwako, ngonehe kami meho a muntu abulanga ku huputuka nanebye aku mona.

²¹ Shiliva na ngolinde bayiyungululanga na mundilo, kami muntu ba kumuyata na maleema aya akutambula ku bantu.

²² Hinge ndi ukushimba mumba na kutwa wakuyeba hamo naheke mu nkunzu, ngoboni wuleya wendi kukamumana wufwako.

²³ Kobelela shiwahe muhoko wa bambelele bobe, hamo na matanga a zingombe zobe.

²⁴ Ndaba wuheti wabulanga kwihala mwaya myaka, ngonehe matunga a kubula kutwesha kwikala kubikati nimwabyo?

²⁵ Oho mwila unayumu, kwamenanga wawupya, pe mwila ukumena kunkumo ya mapili bakawukungwila hamo.

²⁶ Bambelele ba kukuletela bivwalo, pe ha bampongo ukalandaho mfuba.

²⁷ Kami ukekala na mahwe a bampongo amengi, a kulya hamo na bakalupashi lwobe na bakamilimo bobe babambuyama.