Zincimpi 26 - Libuka Lya Kuyela

¹ Shinafweke ngo makelengo akwiza ha shikati sha mvumbi na mvula ha shikati sha kuteza, pe maleema ku fwanina ku muntu wakuyeba afwako.

² Ngonehe kantungisha kakupapazala, hinge ngonehe kambimbi ha kutuka kwendi, pe nisho shili na shikuto sha kubula mulandu kukwata muntu shifwako shikafuma kukwobe.

³ Lunyanzi lunafwanini kulukamisha mbishi na lumingo lunafwanini mbongolo, kami muwana wafwanini ha mongo wa bantu bakuyeba.

⁴ Hinga ukumbula muntu wakuyeba kwezeka ngo kuyeba kwendi, kutina ulifweka nendi nobe kami.

⁵ Kumbula muntu wakuyeba kwezeka ngo kuyeba kwendi, kutina alimona ngayi uli na ngana.

⁶ Ou ukutuma lizu na muntu wakuyeba, unafweke ngo ukuliketula liwulu niyemwine hinge ndi muntu unanu wulembe.

⁷ Shinafweke ngo mawulu a muntu wakupenga akunyenzela tuhu a kubula ngovu, nisho yili ncimpi mukanwa ka muntu wakuyeba.

⁸ Muntu ukupana maleema ku muntu wakuyeba, ukufweka ngo muntu ukumangila limanya ku shilangwa.

⁹ Ncimpi mukanwa ka muntu wakuyeba yinafweke, ngo muhongela ukwingina mu liboko lya wakukolwa.

¹⁰ Muntu mukakupana mulimo ku shileya hinge ku lipita mu nzila, nafweke ngo muntu ukupuha shipando sha mukunzi na kuziha bantu babengi.

¹¹ Ngonehe kawa nabokele ebye analuku, shuma shimo na muntu wa shileya ukubokela bya wuleya wendi.

¹² Kati unamono muntu ou ukulimona kukeya niyemwine ndi? Kuli kulumbeza kwakunene ku shileya kupitakana uya muntu.

¹³ Muvwa ukwamba ngayi, “Mu nzila muli shimbwi. Kuli shimbwi ku mukwakwa.”

¹⁴ Ngonehe shatengulukanga shihala ku makwatilo asho, nisho kami afutozokanga muvwa ha wulili wendi.

¹⁵ Muvwa wengizanga liboko lyendi mu lulonga, ngoboni wakwanganga kubwesha liboko lyendi ku kanwa.

¹⁶ Muvwa nengi wakukeya shikuma mu meho wendi niyemwine, kupitakana bantu mutanu na babili ba kutwesha kukumbula shiwahe na ngana.

¹⁷ Muntu ukwingina ha nkani eze zikubula kumukundama, nafweke ngo muntu ukukwata ku litu lya kawa wakulyendela.

¹⁸ Muntu wakupempela ukupuha bishinzi bya mundilo na mivwi na lufu,

¹⁹ nisho ali muntu ukwongeza ndambo yendi, pe hakwamba ngayi, “Nikushengwiza tuhu.”

²⁰ Kwakubula nkuni mundilo ukuzima, kwakubula katungwila kulyamba kukamana.

²¹ Mashanga akubangiza shikuma hamo na nkuni, nisho kami anafweke muntu wa nkani ukushonkomona mangunga.

²² Mukakutungula, mazu wendi afweka ngo byakulya byabitobe, bikwingina mu bimamo bya lutu lwa muntu.

²³ Ngo makango a shiliva anafwiki ha ntesho ya lima, nisho ili mivumbo ya kwamba na kutekenyesha na mutima wa wubi.

²⁴ Muntu wa mutima wa nzimbo waliholekanga ku nyambilo yendi, oku ha bumba bya kwongeza mu mutima wendi.

²⁵ Oho akwamba bya nceshe hinga umukulupila, ndaba kuli byuma mutanu na bibili mu mutima wendi bya wunyengwe.

²⁶ Hinge unafwiki nzimbo yendi na ku shoshoka, kuluwa kwendi kukahololiwa mu shikungulukilo.

²⁷ Ou ukakaba liteke ukawilamo, kami limanya likalindika ou wukatatika kulyandumuna.

²⁸ Lulimi lwa kwongeza lwa zimba baya lunalemeke, kami kanwa ka kalakulaku kaletanga kuloba.