Zincimpi 25 - Libuka Lya Kuyela

Zincimpi zimina za Sholomoni

¹ Eze kami zinengi zincimpi za Sholomoni batikitile bantu ba mwene Hezekiya wa litunga lya Yunda.

² Wenga wuwahe wa Nyambi wakuholeka byuma, ngoboni wuwahe wa bamyene wenga wakufwatula byuma.

³ Nehi mayilu ekala kwakutali shikuma na hanci henga ha kunonka, nisho kami yekala mitima ya bamyene, kowa ukutwesha kufwatula byuma mu mitima yabo.

⁴ Fumisha makango ku shiliva, pe muka kufula ukawanaho ebye akafula.

⁵ Fumisha wakuluwa ku meho a mwene, pe litanda lyendi likazikiwa mukwoloka.

⁶ Hinga ulikatula ku meho a mwene, hinge kwimana muya bemananga babalemu.

⁷ Ndaba shenga shashiwahe kutongweziwa ngayi, “Yeka wikale kuno,” kupitakana ku shepeshiwa ku meho a mwene.

⁸ Hinga unyankupila ku nkuta ha shuma unamono na meho wobe, ndi paki wamina akuwana ngayi uli na mulandu, haya ukatenda nahiti?

⁹ Ndi obe na ndambo yobe mwalishempe ku mazu, shimanishenu mukatikenu hinga mukaholola bya kuwi.

¹⁰ Ndelewa muntu nimwendi ukatosha ngayi kulama bya kuwi mufwako, pe mpupo yenu yayibi kukamifuma yifwako.

¹¹ Lizu linambiwi shiwahe, linafweke ngo mukabo wa ma apulu wafwikiwi na ngolinde mu shikwatilo sha shiliva.

¹² Ngonehe kambalamunwe ka ngolinde, hinge mukali wawuwahe wa ngolinde yayiwahe ya muno mukaye ka bantu ba kushipa, linengi lizu lya ngana lya kutengulula baya ba kuyuvwako.

¹³ Linafweke ngo mbundu yaletanga kubombola shikati sha kuteza, unengi ngo ntumwana wa kupwisha ku baya banamutumu, watulishanga mutima bahekulyendi.

¹⁴ Muntu wakuliyemeza na shiya anabulu kupana, unafweke ngo makumbi na mpepo bya kubula mvula.

¹⁵ Ku mwena na lunzewe bikutwesha kukandamika kalela, kami nyambilo yayiboto yikutwesha kutengulula muntu wamukalu mutima.

¹⁶ Ndi unawana wushi, lyaho kwezekesha na livumo lyobe, kutina kuwu luka ndi ukuwulya shikuma.

¹⁷ Hinga uvulishako myanza ku litala lya ndambo yobe, ndelewa ukakuzimba ndi wakunyikwakale.

¹⁸ Muntu waku bangila ndambo yendi bya mahalo, unafweke ngo muwana wakunzita, hinge mpoko ya mukwale hinge muvwi wawutwe.

¹⁹ Kukulupila muntu wakubula kupwisha ha bikati bya makando, shinafweke ngo liyewe lya ku bola hinge liwulu lya kushonkonoka.

²⁰ Muntu ukwimbila lwimbo ku muntu uli mu wukalu, unalifweke nanou ukuvula shivwalo shendi ha mutena wa mashika, nanou ukuyaka mululwe ha shitombo.

²¹ Ndi mukankole wobe uli na nzala, mupane bya kulya alye, ndi uli na linyontwa, mupane mema anwe.

²² Ndaba ndi ukwinga noho, ukabungika mashanga a mundilo ha mutwe wendi, pe Nyambi ya Ngula ukakupana ncuungu.

²³ Lulimi lwa katungwila lwapilamishanga, nehi mpepo yaku ncelele yaletanga mvula.

²⁴ Shashiwahe kwikala mu nkomi kuyilu ya litala kupitakana kwikala mu litala limo na mbuyama wa kanwa.

²⁵ Kutambula lushango lwa lu wahe ku litunga lya kwakutali, shinengi shuma shimo ngonehe mema a kubombola ku muntu nafu linyontwa.

²⁶ Ngonehi kaheloke ka mema kanenzala ndoba na lishima likwikala na mema amabi, shinengi shuma shimo ku muntu wakulunga ukupana nzila ku muntu wakuluwa.

²⁷ Kaliha shashiwahe kulya wushi wawingi, nehi kami muntu ukulinenehesha niyemwine.

²⁸ Muntu wakubula kukwata mutima, ukufweka ngo munzi wawunene ou mamota wawo bananyemunu na kuwu shiya nahiya.