Zincimpi 24 - Libuka Lya Kuyela

Kushiwulula 19

¹ Hinga uyuvwila mwili bantu bababi, hinge kwikala na nyumwa nabo hamo,

² ndaba bifungo byabo bya kutenda mishunga, kami mivumbo yabo ya kwamba bya kutenda wukalu.

Kushiwulula 20

³ Litala lyazikiwanga na ngana, kami lyazikiwanga na ku yuvwishisha.

⁴ Kuli kalimukisho tumpenci twenzalanga na wuheti na byuma nimwabyo bya kuwahilisha.

Kushiwulula 21

⁵ Muntu wangana wenga wakushuma shikuma kupitakana muntu wa ngovu, kami muntu wa kalimukisho na pitakana muntu wa nyala,

⁶ ha kuya mu kulwa nzita ukushinga kutwamininiwa, ndaba kuli kukona kuya kuli bakakubela babengi.

Kushiwulula 22

⁷ Ku muntu wakuyeba byuma bya ngana shashikalu kubiyuvwishisha. Kutwesha kuliwana na kanzunga ka bakulwane wufwako ku lipangati lya munzi wawunene.

Kushiwulula 23

⁸ Muntu wayongolanga kutenda byabibi ukatumbiwa mukakuleta wukalu.

⁹ Bihanganiko bya wakuyeba byenga byabibi, kami muntu wa wuncengwe wenga wa wunyengwe ku bantu.

Kushiwulula 24

¹⁰ Ndi ukupukala ha shikati sha wukalu, pe nyala zobe zenga zazishe.

Kushiwulula 25

¹¹ Lamwina bantu bali na kutwaliwa ku lufu, kami kwata obo bali na kutalyangila kuya mu kuzihiwa.

¹² Ndi ukwamba ngayi, “Kaliha twashilimukile,” Kati ou walamanga mutima ku shimona wufwako ndi? Kati ou walamanga moyo wobe kulimuka wufwako ndi? Kati niye kukabweshela muntu kwezekesha na milimo yendi wufwako ndi?

Kushiwulula 26

¹³ Mwanami, lyanga wushi ndaba wenga wawuwahe, kami mwenzu wa mulikanza wenga wawutobe.

¹⁴ Limuka ngayi ngana zenga zaziwahe munyinkalo yobe, ndi ukuziwana pe ukekala shiwahe kumbili ya matena, kami kulumbeza kwobe kukamana kufwako.

Kushiwulula 27

¹⁵ Obe muntu wakuluwa, hinga wongeza kubelamina ku litala lya muntu wakulunga, hinga uleta mishunga ku litala lyendi.

¹⁶ Hinga ndi wakulunga wawanga mutanu na kabili, pe ha kukatukamo kami, ngoboni bantu bakuluwa bakekala mu makando.

Kushiwulula 28

¹⁷ Hinga uwahilila oho mukankole wobe akupukala, kami mutima wobe hinga uwahilila oho akutalangila.

¹⁸ Nyambi ya Ngula amonasho ukapilama, pe ukalehasho kumushushula.

Kushiwulula 29

¹⁹ Hinga utina ndaba ya bakakutenda byabibi, kami hinga ulishoza bya bakuluwa,

²⁰ ndaba mukakutenda byabibi kukekala shiwahe kumbili wufwako. Lumuni lwa bantu bakuluwa lukazimiwa.

Kushiwulula 30

²¹ Mwanami, yuvwila Nyambi ya Ngula na mwene bowa. Kami hinga ulifungila na bantu bakakufutulukila,

²² ndaba bali na ngovu za kuleta makando sha wanguwangu, kami kowa walimukanga malwa aya afumanga kuli Nyambi ya Ngula na mwene.

Zinyambilo Zamina za Ngana

²³ Ezi kami nizo zinyambilo zamina za bantu bangana. Kuyata na shihota kaliha shenga shashiwahe.

²⁴ Nimwendi ukwamba ku muntu wakuluwa ngayi, “Mulandu wufwawo.” Ukakutiwa ku bantu na kuzimbiwa mu matunga.

²⁵ Ngoboni nimwabo ba kushushula muntu wakuluwa bakawahilila, kami bakawana mfuywezi zazinene.

²⁶ Muntu ukukumbula shiwahe, ukwinga ngo ukukuzupeza mu liboko.

²⁷ Wahisha mulimo wobe wa ha munkanda, tenda mulimo wobe shiwahe ku mafuba, nohoboni uzike litala lyobe.

²⁸ Hinga ubangila ndambo yobe byambo kwakubula mulandu, kami hinga wongeza.

²⁹ Hinga wamba ngayi, “Nikamutenda ngonehe anantende, nikabweshela kukwendi ebye anantende.”

³⁰ Napitile ku mfuba ya muvwa, ku mfuba ya shinyanca ya muntu wakubula ngana,

³¹ nimwayo yakupukile na mihongela. Nimwamo mwekalile nkululumbe, kami liyo limota lya mamanya lyanyemukile.

³² Nahanganikile shikuma kunebye namonene, kami nalilongeshele hanebye namonene.

³³ Ashulubaleko taha, akatulukeko shashishe, na kulivunga maboko kukwanguluka shashishe.

³⁴ Oho muvwa ashili kulangana, wuncepwe ukamushintikiza, ngonehe mwizi uli na bilwisho.