Zincimpi 22 - Libuka Lya Kuyela

¹ Lizina lyaliwahe likupitakana wuheti wawingi, kami kuyamiziziwa kunengi kwakuwahe kupitakana shiliva hinge ngolinde.

² Bakakuheta na bancepwe bakwezekela hamo, Nyambi ya Ngula niye wa balengele nimwabo.

³ Muntu wangana waholamanga ndi namono malamo, ngoboni shibulangana ukuhenyenako pe hakwikala mu wukalu.

⁴ Kulilimbwilisha na kuyuvwila Nyambi ya Ngula bowa, byaletanga wuheti na maleema na wumi.

⁵ Mu nzila ya muntu wakuluwa muli mihongela na tuntamba, ou ukulilama ukwikala hahatali nabyo.

⁶ Longesha kanuke nzila ya ku fwanina, pe akakula kukafumamo wufwako.

⁷ Mukakuheta wenga hekulya ncepwe, mukakutambula mukuli wenga ndungo ya uya namupana.

⁸ Muntu ukushanga kuluwa ukateza makando, pe kuyandisha kwa baminobe kukamana.

⁹ Mukakuhana ukatambula mfuywezi, ndaba wapananga byakulya byendi ku bancepwe.

¹⁰ Tanda muntu wa wuncengwe, pe nkani na kulyamba bikamana na lihandu likapita.

¹¹ Ndi muntu uku haka mutima na nyambilo ya nceshe, ukenga muhoni wa mwene.

¹² Meho a Nyambi ya Ngula apenzanga ha uya uli na kalimukisho, ngoboni wakanangananga mazu a muntu wa mahalo.

¹³ Muvwa ukwamba ngayi, “Ha munkanda hali shimbwi, nikazihiwila mu mikwakwa.”

¹⁴ Kanwa ka mbuyama walwiholwiho kanengi linkwina lya kunonka, Nyambi ya Ngula ukapilamina muntu ndaba ukawilamo.

¹⁵ Kuyeba kwekalanga mu mutima wa kanuke, ngoboni lunyanzi luka mushangamisha na kufumisha kuyeba mumwendi.

¹⁶ Ou ukulyatilila bancepwe ngayi mwanga avulishe wuheti wendi, na nou ukupana bakakuheta, wuncepwe ukabezilila nimwabo.

Mazu Makumi Ahatu a Ngana

¹⁷ Tengeka litu lyobe, mwanga uyuvwe mazu a bantu bangana, na kuyaka mutima wobe ku bya kalimukisho.

¹⁸ Ndaba shikenga sha kuwahilisha kubilama mushali shobe, ndi nimwabyo bikwikalanga ha mivumbo yobe.

¹⁹ Nikushinga ngayi ukulupile muli Nyambi ya Ngula, nisho shuma nika kutongwezelabyo.

²⁰ Kati shilolo nikutikitile zinyambilo makumi ahatu, za ngana naza kalimukisho,

²¹ kuku monesha ebye byenga byabiwahe na kupwisha, ngayi uka ba kumbule na kupwisha obo bakakutuma ndi?

Kushiwulula 1

²² Hinga uyibila ncepwe ndaba ngayi nengi ncepwe, hinge kuyandisha bakakuyanda mu nkuta.

²³ Nyambi ya Ngula ukemanina shambo shabo, uku bipisha wumi wa baya ba kubabipisha.

Kushiwulula 2

²⁴ Hinga ulimama wuhoni na muntu wa kapilamina, hinge kwenda na muntu wamukali,

²⁵ kutina ulilongesha zinzila zendi na kulimanga obe mwine mu lunyimbwa.

Kushiwulula 3

²⁶ Hinga winga umo wanibo ba kukulupisha na lukushi kuyavwa muntu ku mulandu wendi, hinge kwimanina muntu ku mikuli yendi.

²⁷ Ndi wufwabyo byuma bya kuyumba, bakakuyangula wulili wobe oho hinga walanganaho?

Kushiwulula 4

²⁸ Hinga uhenyesha nginza iya bayakile batatizobe bashikale.

Kushiwulula 5

²⁹ Kati mwamona wawuntungu mu mulimo wendi ndi? Wanoho ukemana kumbili ya bamyene, kukemana kumbili ya bantu tuhu wufwako.