Zincimpi 21 - Libuka Lya Kuyela

¹ Mutima wa mwene wenga ngo kashinzi ka mema mu liboko lya Nyambi ya Ngula, wawutengulwilanga oku nimwako akushinga.

² Nzila ya muntu yenga ya kwoloka ku meho wendi, ngoboni Nyambi ya Ngula wapimanga mutima.

³ Ntendelo ya kwoloka na kupwisha yikutambuliwa shikuma kuli Nyambi ya Ngula kupitakana nkombela.

⁴ Meho akuyemeza na mutima wakulilundumika, niyo mimuni ya bakuluwa, pe nimwabyo byenga wubi.

⁵ Bihanganiko bya muntu wakukalamana bya mu twamininanga ku kutangama, ngoboni mukakutenda byuma wanguwangu ukenga wakushepwa.

⁶ Kuwana wuheti mu nzila ya kwongeza, shinafweke ngo mbundu yikukakumuka hinge ngo kantamba ka lufu.

⁷ Mishunga ya bantu bakuluwa yikabatwala kwakutali, ndaba ba kukana kutenda bya kupwisha.

⁸ Nzila ya muntu uli na mulandu yenga ya kukontama, ngoboni nyinkalo ya wa kuyela yenga ya kwoloka.

⁹ Shashiwahe kwikala mu nkomi kuyilu ya litala, kupitakana kwikala mu litala limo na mbuyama wa kanwa.

¹⁰ Muntu wakuluwa watwalanga mutima ku byabibi, kaliha wayuvwilanga nceshe ndambo yendi.

¹¹ Oho muntu wa wuncengwe akushushuliwa, muntu wakuyeba ukulilongesha ngana, oho muntu wangana akufundiziziwa, wawananga kalimukisho.

¹² Nyambi wenga wakulunga, wapenzesheshanga litala lya bantu bakuluwa, pe walobeshanga bantu bakuluwa.

¹³ Muntu wakubula kuyuvwa kulila kwa bancepwe, naniye kami akalila kowa ou eze akamuyuvwe.

¹⁴ Bishemo bya kupanina muntu kumbali kwakubula bantu byafwomonanga wukali, lizika kanwa lya kushimba mu lyambangubo lyamanishanga wukali.

¹⁵ Ndi shambo shinayatiwi mu kupwisha bantu bakulunga bawahililanga, ngoboni bakakutenda byabibi batampwanga.

¹⁶ Muntu ukushiya nzila ya ngana, ukakatalila mu shikungulukilo sha bafu.

¹⁷ Muntu wahaka myelembo ukenga ncepwe, ou wahaka waine na byakulya bya mazi kukaheta wufwako.

¹⁸ Bantu bakuluwa bakenga shikulizisho sha bantu bakulunga, na bakakubula kukulupila bakenga shikulizo sha bantu ba kupwisha.

¹⁹ Shashiwahe kuyoya mu libelelengwa, kupitakana kwikala na mbuyama wa kanwa na kupilazama.

²⁰ Muntu wangana wakonga wuheti wa ndando yayinene mu litala lyendi, ngoboni shibulangana wapanzanishanga ebye alinabyo nimwabyo.

²¹ Muntu ukukonka kulunga na nceshe, ukawana wumi na kwoloka na maleema.

²² Muntu wangana walwishanga munzi wa wawunene uli mu limota bantu bangovu, washiwululanga bipata byabo bya ku shuma biya banakulupili.

²³ Mukakulama nyambilo yendi, ukulifumisha ku makando.

²⁴ Muka wuncengwe wenga mukakuliyemeza na kulilundumika, kami wenga wa lihandu, pe walihaka niyemwine.

²⁵ Bavwa bakubula kutenda milimo, ba kuliziha nibo bamwine.

²⁶ Muntu wakuluwa wenga wakulishoza bikati nimwabyo, ngoboni wakulunga ukwolola liboko kupana na kubula kuyumina.

²⁷ Nyambi ya Ngula wazimba zikombela za bakakuluwa, shinene ndi ba kutendazo na bihanganiko byabibi.

²⁸ Paki wa mahalo ukashushuliwa, ngoboni nyambilo ya muntu wa kupwisha bakayitabila.

²⁹ Bakuluwa baliyongolanga kwinga babawahe, ngoboni ba kupwisha bayongolanga ha zinzila zabo.

³⁰ Ngana za muntu na ku yuvwishisha na kalimukisho, kuyavwa bifwako ndi Nyambi ya Ngula na kana.

³¹ Ukutwesha kutwala bambishi ku nzita, ngoboni wenga Nyambi ya Ngula wabatwesheshenga.