Zincimpi 2 - Libuka Lya Kuyela

Ncuungu ya Ngana

¹ Mwanami, lilongeshe ebye nikukutongweza, lama mazu wami.

² Tengekela matu wobe kubya ngana, twalako mutima na ku yuvwishisha.

³ Mwa shikuma, lomba ngana, lambilila kulimuka byuma.

⁴ Shingashinga ngana ngonehe shiliva, na kubifwatula ngonehe wuheti wakuholama.

⁵ Ukalimuka kuyuvwila Nyambi ya Ngula bowa, kami ukawana ngana za kulimuka Nyambi.

⁶ Ndaba Nyambi ya Ngula wapanikanga ngana, pe mukanwa kendi mwafumanga kalimukisho na ku yuvwishisha.

⁷ Waholwelanga ngana ku bakakulunga, niye likebo lya bakakwoloka.

⁸ Walamanga zinzila za bantu ba kupwisha, na kulama zinzila za bakakwoloka.

⁹ Nohobene ndi ukunyuvwilila, pe ukalimuka byakwoloka na bya kupwisha, na byabiwahe. Kami ukalimuka ebye unafwanini kutenda.

¹⁰ Ukekala na ngana, kami kalimukisho kakakuwahililisha.

¹¹ Ngana na ku yuvwishisha kwa byuma kuka kulama.

¹² Ngana zikakulamwina ku zinzila za bakakuluwa, naku bantu ba mahalo,

¹³ na bakakufuma mu zinzila za kwoloka, na kwenda mu zinzila za mincimpwe.

¹⁴ Aba ba ku wahilila mukutenda wubi, ba kutangalala mu byuma byabibi.

¹⁵ Zinzila zabo za kuluwa, nantendelo yabo ya mazilo.

¹⁶ Ngana zikakubengula kuli mbuyama walwiholwiho, oho akezeka kukubengezeka na mazu amawahe.

¹⁷ Mukazi wakubula kukulupiliwa kuli mukokwendi, navulama kulimama alimamine na mukokwendi kumbili ya Nyambi, ha mutena baliyekele.

¹⁸ Ndaba ndi ukuya ku litala lyendi, ukulitwala ku lufu ndi ukumukonka, ukulitwala ku kalunga ka bafu.

¹⁹ Kowa ukuya kukwendi, ukutwesha kuboka na wumi.

²⁰ Nohobene, enda mu zinzila za bantu ba kupwisha, na kwenda mu zinzila za bakakwoloka.

²¹ Ndaba bantu ba kupwisha, bakubula shihepwa bakekala mu litunga lino.

²² Ngoboni bakakuluwa, bakafumishiwa mu litunga na bakawubi bakalobeshiwa.