Zincimpi 17 - Libuka Lya Kuyela

¹ Shashiwahe kulya linkende lya kuyuminina hinga mwekala mu ku mwena, kupitakana litala linenzala na mayambwayambwa ngoboni hinga lyenzala na mangunga.

² Ndungo uli na ngana ukenga kalela ka mwana hekulyendi uya watendanga bya lisheni, kami ukalitapila likona na bana bahekulyendi.

³ Shiliva na ngolinde bayiyungululanga na mundilo, ngoboni Nyambi ya Ngula niye wayeleshanga mitima.

⁴ Muntu wakuluwa wayuvwililanga ku mukamahalo, kami muntu wa mahalo wayuvwililanga ku muntu wa kapele.

⁵ Muntu ukuhenda ncepwe ukuhandula Shakalenga wendi, ou uku wahilila makando a minendi ukashushuliwa.

⁶ Bazukulu niwo munana wakakulukazi, kami bana ba ku wahilila muli bahemizabo.

⁷ Nyambilo yayiwahe ku fwanina ku shileya yifwako, kami kalela ku fwanina kwamba bya mahalo wufwako.

⁸ Lizika kanwa lyenga ngonehe limanya lya ndando yayinene ku muntu uya uli nalyo, oku akufutukila nimwako ukatangama.

⁹ Muntu ou ukuyatila mulandu washinga shishemo, ngoboni uya wabokelanga shambo watapanga bahoni bendi.

¹⁰ Mazu akwambila mukaku yuvwishisha enginanga mukati ka mutima wendi, kupitakana mwanda wa zinyanzi za ku zipola wakuyeba.

¹¹ Muntu wamubi washinga tuhu bya kulifutulukila, nohobene ntumwana wanguma ukutumiwa kwiza mu kumulwisha.

¹² Shashiwahe muntu kuliwana na nkaziwa wa mbeya uya banayangulu bana bendi, kupitakana kuliwana na muntu wakuyeba uya ukutenda bya wuleya.

¹³ Ndi muntu ukubwesha byabibi ku wuwahe, byabibi kukafuma mu litala lyendi bifwako.

¹⁴ Kushonkomona nkani kunengi ngonehe kuzikula liziba linatimbilili na mema, shashiwahe ku mwena oho nkani shilolo zinenehe.

¹⁵ Ou ukushambisha muntu wakuluwa na nowu ukunyanca muntu wakubula mulandu, nimwabo hamo banengi bawunyengwe kuli Nyambi ya Ngula.

¹⁶ Mali ali mu liboko lya muntu wakuyeba akumuyavwa nahiti, ndi niye kaliha uli na bihanganiko bya kwikala na ngana?

¹⁷ Wuhoni wenga kulihaka shikati nimwasho, ngoboni kawushinda wahemuwila ngayi muliyavwe mu makando.

¹⁸ Muntu wakubula ngana wakulupishanga tuhu na lukushi, kami wakulupishanga kuyumba mukuli wa ndambo yendi.

¹⁹ Muntu washinga kulyamba na bantu wahaka mangunga, mukakulilundumika walishingishilanga malwa.

²⁰ Muntu wa mutima wawubi kutangama wufwako, kami mukakwongeza waliwananga mu wukalu.

²¹ Mwana wakuyeba waletelanga wunginga bahemi bendi, kami tatiyendi ku wahilila wufwako.

²² Mutima wa mahepo wenga wanga wawuwahe, ngoboni moyo wakapilamina wabombweshanga bifupa.

²³ Muntu wakuluwa watambulanga lizika kanwa mu kulimba, ngayi ashanwishe kuyata kwa kupwisha.

²⁴ Muntu wangana washingishishanga byuma bya ngana, ngoboni meho a muntu wakuyeba apenzanga kwakumina hanci.

²⁵ Mwana wakuyeba waletanga wunginga kuli tatiyendi, kami wakoleshanga mutima wa mandiyendi uya wamubelekele.

²⁶ Kaliha shashiwahe kushushula muntu wakubula mulandu, kami sha shibi kukama babilolo ndaba ya kwoloka kwabo.

²⁷ Muntu wacincikanga hakwamba wekala na kalimukisho, kami muntu wa mutima wakuwa mushali wenga mukaku yuvwishisha.

²⁸ Hinge wakuyeba bantu ba kutwesha kumuhanganikila ngayi muka ngana ndi ukwikala hinga a mwena, ba kumuhanganikila ngayi muka kalimukisho ndi ukushinka kanwa kendi.