Zincimpi 14 - Libuka Lya Kuyela

¹ Mukazi wangana wazikanga litala lyendi, ngoboni shileya wanyemunanga na maboko wendi.

² Muntu ukwenda mukwoloka wenga mukakuyuvwila Nyambi ya Ngula bowa, ngoboni mukakutalyangila ukumushampula.

³ Bileya bikakuliyemeza byashushuliwanga ha nyambilo yabo ya wuleya, ngoboni mazu a muntu wangana amulamwinanga.

⁴ Kwakubula mapulu a kulima, mu shishete mu kubula kwikala byakulya, ngoboni ndi ukwikala na mapulu akushuma, pe shishete shikenzala na byakulya.

⁵ Paki wakwoloka kaliha wongezanga, ngoboni paki wa mahalo wenga mukakwongeza.

⁶ Muntu wa wuncengwe washinganga ku wana ngana, ngoboni muka ku yuvwishisha wawananga kalimukisho.

⁷ Fuma kuli shileya, ndaba ku wanako mazu a ngana wufwako.

⁸ Ngana za muntu wakukeya zamuhanganikishanga mwakwendela mu nzila yendi, ngoboni kuyeba kwa shileya kwamu yongeshanga.

⁹ Bileya bafwayo ndaba hinge ndi banabipishi, Nyambi wayamizizanga bakulunga.

¹⁰ Mutima walimukanga wukalu wawo, kami kowa ukutwesha kuwu wahililisha.

¹¹ Litala lya mukawubi likanyemuniwa, ngoboni ntanda ya wakwoloka yikemana.

¹² Kuli nzila yamonekanga wuwahe ku muntu, ngoboni mamanino ayo enga lufu.

¹³ Hinge mu kuhepa, mutima watweshanga kukola, kami mamanino aku wahilila enga manyengo.

¹⁴ Muntu wamubi wawananga binamufwanini, ngoboni muntu wamuwahe ukalya ku mikabo ya milimo yendi.

¹⁵ Shileya wakulupilanga byuma nimwabyo, ngoboni muntu wakukeya wapenzesheshanga oku akuya.

¹⁶ Muntu wangana wekalanga na bowa wa Nyambi kami wafumanga ku wubi, ngoboni shileya waliyemezanga kami wekalanga mu mpoza.

¹⁷ Muntu wakapilamina watendanga byuma bya wuleya, kowa uku haka ndi bafwako kukukulupila.

¹⁸ Bantu bakubula kalimukisho bakawana binafwanini wuleya wabo, ngoboni ba kukeya banavwikiwi na kalimukisho.

¹⁹ Bantu bababi bakafunkama hanci ku meho a babawahe. Bantu bakuluwa bakafunkama ku mapangati a bantu bakulunga.

²⁰ Ncepwe ukuzimbiwa hinge ku ndambo yendi, ngoboni mukakuheta wekala na bahoni babengi.

²¹ Muntu ukushampula ndambo yendi wenga mukawubi, ngoboni natandala muntu ou wekala na shishemo na bancepwe.

²² Bantu bakakuyongola byabibi kati Kubipisha bafwako ndi? Bantu bayongolanga byabiwahe ba kuwana maleema na kwoloka.

²³ Mu mulimo nimwamo mwekala bya kuwaninamo, ngoboni kanwa kaletanga wuncepwe.

²⁴ Wuheti niwo munana wa bantu bangana, ngoboni wuleya niyo ngala ya bantu bakubula ngana.

²⁵ Paki wa kupwisha walamwinanga wumi wa bantu, ngoboni mukakwamba mahalo wenga libeba.

²⁶ Muntu ukutina Nyambi ya Ngula uli na shipata sha ku shuma, kami bana bendi bakawana shiholamino.

²⁷ Kuyuvwila Nyambi ya Ngula bowa nilyo lishima lya wumi, likufumisha ku tuntamba twa lufu.

²⁸ Kuvula kwa bantu niwo maleema a mwene, ngoboni kubula bantu kwenga kuloba kwa mwana mwene.

²⁹ Muntu wabulanga kupilama shawangu wekala na kalimukisho shikuma, ngoboni wakapilamina wahololanga wuleya.

³⁰ Mutima wawuwahe ukuletesha lutu kwikala shiwahe, ngoboni mwili waboleshanga bifupa.

³¹ Muntu ukulyatilila ncepwe, ukuhandula Shakalenga wendi, ngoboni ou uli na shishemo ku mukakuyanda ukulemeeka Nyambi.

³² Mubikati byabikalu bakuluwa ba kuloba, ngoboni hinge mu lufu bakulunga ba kuwana shiholamino.

³³ Ngana zekalanga ku muka ku yuvwishisha, ngoboni kaliha zekalanga ku shibulangana.

³⁴ Kulunga kwa katulanga litunga, ngoboni wubi waletanga lisheni ku bantu.

³⁵ Mwene wa wahililanga na muka mulimo ukutenda bya ngana, ngoboni wukali wendi watulilanga ha uya ukutenda bya lisheni.