Zincimpi 13 - Libuka Lya Kuyela

¹ Mwana wangana wayuvwanga ebye akumutongweza tatiyendi, ngoboni wa wuncengwe kaliha wayuvwanga ebye a kumwambila.

² Muntu wa muwahe walyanga byabiwahe ku mikabo yaku kanwa kendi, ngoboni bihanganiko bya wa mahalo byaletanga mushunga.

³ Ou ukulama kanwa kendi ukukoweza wumi wendi, ngoboni ou ukwamba na kulokomoka ukaloba.

⁴ Muvwa walishozanga, kami kowa ebye awananga, ngoboni muntu wakukalamana wawananga byabingi.

⁵ Wakulunga wazimba bya mahalo, ngoboni wakuluwa watendanga bya kuleta lisheni na ku shampuliwa.

⁶ Kulunga kwalamanga uya ukwenda mu nzila ya kupwisha, ngoboni wubi walobeshanga wakuluwa.

⁷ Muntu umo ukulingisha ngo wakuheta, kati wabulanga nihani. Wamina ukulingisha ngo ncepwe, kati uli na wuheti wawingi.

⁸ Muntu wakuheta ukutwesha kukuliza wumi wendi, ngoboni ncepwe kutwesha kulilamwina wufwako.

⁹ Liyeye lya wakulunga lya banganga shikuma, ngoboni lumuni lwa wakuluwa lwazimanga.

¹⁰ Kuliyemeza kwaletanga mangunga, ngoboni ngana zili kukwabo bakwitabila ku batengulula.

¹¹ Wuheti wakuwana mu nzila ya mahalo, ukupanzana kanikani, ngoboni ou ukutolatola kanikani ukekala na byabingi.

¹² Kulumbeza shuma sha kubula ku mona sha koleshanga ku mutima, ngoboni eshe alishozanga ndi shinawaniwi shinengi mutondo wa wumi.

¹³ Ou ukulimbulula lizu ukuliletela kunonga hahendi niyemwine, ngoboni ou ukutina ndayano ukapanikiwa ncuungu.

¹⁴ Bilongesha bya muntu wangana byenga kaheloke ka wumi, byafumishanga muntu mu lunyimbwa lwa lufu.

¹⁵ Muntu waku yuvwishisha wayemeziwanga, ngoboni nzila ya bantu bakuluwa yinengi kuloba kwabo.

¹⁶ Mu byuma nimwabyo muntu wangana watendanga na kalimukisho, ngoboni shileya wahololanga bya wuleya.

¹⁷ Ntumwana wakuluwa waletanga wukalu, ngoboni uya wa kupwisha waletanga ku nyongomana.

¹⁸ Wuncempwe na ku shampuliwa byezanga ku muntu ukulimbulula ku longesha, ngoboni ou ukwitabila kumutengulula ukalemeekiwa.

¹⁹ Kuwana shiya walishozanga shikuleta wuwahe mu mutima, ngoboni bileya bya kananga kufuma ku byabibi.

²⁰ Ou ukutenda wuhoni na bantu bangana ukafutuka wangana, ngoboni muka kulilama na bileya ukayanda.

²¹ Kutamwa kwa konka bababi, ngoboni bya kutangamisha bikuya ku wakulunga.

²² Muntu wamuwahe washiyanga likona ku bazukulyendi, ngoboni wuheti wa mukawubi bakawushimba kuli ba kupwisha.

²³ Mfuba ya wakuyanda yayimanga byakulya byabingi, ngoboni bakubula kupwisha babipanzanishanga.

²⁴ Ou ukubula kuzipola mwanendi lunyanzi ndi unabipishi wamu zimba, ngoboni ou wamuhaka ukumukeyesha na kumuzipola.

²⁵ Wakulunga ukulya na kwikuta shikuma, ngoboni mavumo a bakuluwa akakefwangila na nzala.