Zincimpi 12 - Libuka Lya Kuyela

¹ Nimwendi wahaka ku shuziwa oho na bipishi wenga wangana, ngoboni ou wazimba ku shiwululiwa wenga wakuyeba.

² Muntu wamuwahe wa wananga kuyamiziziwa kuli Nyambi ya Ngula, ngoboni muntu wa biyongola byabibi ukawana mulandu.

³ Muntu wufwako kutwesha ku shumishiwa na kutenda bya kuluwa, ngoboni wakulunga wenga wakushuma ngonehe mutondo uli na mipishi yawo.

⁴ Mukazi uli shiwahe wenga munana wa mukokwendi, ngoboni mukazi ukuleta lisheni nafweke ngo wulweli ukubolesha bifupa byendi.

⁵ Bihanganiko bya wakulunga byenga bya kupwisha, ngoboni kubela kwa wakuluwa kwenga kwa kwongeza.

⁶ Mazu a wakuluwa a belamina kuyita mukeza, ngoboni kanwa ka wakulunga ka ku balamwina.

⁷ Bakuluwa bakafumishiwa pe kukamoneka bafwako, ngoboni litala lya wakulunga likemana.

⁸ Muntu ukuyemeziwa ku ngana zendi zaziwahe, ngoboni muntu wa mutima wakutengama ukashampuliwa.

⁹ Shashiwahe ku muntu ou ukulishepesha, ngoboni haliwanina byendi, kupitakana uli na mpupo ngoboni afwabyo byakulya.

¹⁰ Muntu wakulunga ukalifulankana ha wumi wa shimuna shendi, ngoboni nceshe za wakuluwa zenga za nguma.

¹¹ Ou ukulima mfuba yendi ukekala na byakulya byabingi, ngoboni unengi wuleya Kubipisha shikati ha byuma byowa.

¹² Bakuluwa balishozanga lipuku lya bantu bababi, ngoboni bakulunga benga ngo mitondo ya kuyima mikabo.

¹³ Muntu wamubi walimanyikanga na bya kutengama bya mu kanwa kendi, ngoboni wakulunga walifumishanga niye mwine mu wukalu.

¹⁴ Muntu wekutanga byabiwahe ku mazu akufuma mu kanwa kendi, kami mulimo wa maboko a muntu wabokanga kukwendi.

¹⁵ Nzila ya shileya yenga yayiwahe ku meho wendi niyemwine, ngoboni wangana wayuvwanga ebye ba kumubela.

¹⁶ Shileya ndi napilama ukulimukiwa shawangu, ngoboni muntu wangana walimbululanga bya matuka.

¹⁷ Ou ukwamba bya kupwisha wahololanga wupaki wawuwahe, ngoboni paki wa mahalo wambanga bya kwongeza.

¹⁸ Kwali wambanga mazu a kulokomoka alemekanga ngo mpoko ya mukwale, ngoboni lulimi lwa wangana lukutulisha mutima.

¹⁹ Mivumbo ya kupwisha yikekala mwaya myaka, ngoboni lulimi lwa kwongeza lwekalanga tuhu shikati shashishe.

²⁰ Kwongeza kuli mu mitima ya nobo ba kuyongola byabibi, ngoboni obo bafunga byabiwahe bali na ku wahilila.

²¹ Makando kukawila wakulunga afwako, ngoboni bakuluwa benzala na byabikalu.

²² Mivumbo ya kwongeza yinengi ya wunyengwe kuli Nyambi ya Ngula, ngoboni bakulunga ba kumuwahililisha.

²³ Muntu wa kukeya ukulama kalimukisho, ngoboni bileya babilikanga bya wuleya.

²⁴ Liboko lya wakukalamana likalela, ngoboni liya lya wuvwa likayakiwa ku wulungo.

²⁵ Mahanganiko amu mutima wa muntu amuletelanga kuhomba, ngoboni lizu lyaliwahe lya mutangalishanga.

²⁶ Muntu wakulunga wenga mwanza ku bahoni bendi, ngoboni nzila ya muntu wakuluwa yikubayongesha.

²⁷ Muvwa kutwesha wufwako kuwana ebye akushinga, ngoboni waku kalamana wukawana wuheti wawunene.

²⁸ Mu nzila ya kulunga mwekala wumi, iya nzila kutwaminina ku lufu yifwako.