Zincimpi 1 - Libuka Lya Kuyela

Wuwahe wa Zincimpi

¹ Zincimpi za Sholomoni, mwene wa Ishalela, mwana Ndavita.

² Zincimpi ezi zikuyavwa bantu kwikala na ngana, na ku longesha ngayi bayuvwishishe nyambilo ya zinguli,

³ Ziku ku longesha kwinga wakukeya, na kwoloka na kulunga na kupwisha.

⁴ Ziku panika ngana za kutenda byabiwahe ku baya bali mu wulube, na kupanika ku bandumbana ngana na kukeya.

⁵ Zincimpi ezi zikuwezelela ku ngana ku baya bali na zo, na kutwaminina bakakulilongesha,

⁶ ngayi bayuvwishishe zincimpi na zinguli, za bakakukeya na tushau twabo.

Kulongesha Bandumbana

⁷ Kuyuvwila Nyambi ya Ngula bowa niwo mabalikilo a ngana, ngoboni muntu wakuyeba ukukana ngana na bilongesha.

⁸ Mwanami, yuvwilila bilongesha bya tatiyobe, pe hinga ukana ebye akukulongesha mandiyobe,

⁹ ndaba bilongesha byabo byafweka ngonehe ngala za ku mutwe wobe, na mukali wawuwahe mu ncingo yobe.

¹⁰ Mwanami, ndi bakawubi ba kukwongeza, hinga wuyitabila.

¹¹ Ndi bakwamba ngayi, “Yeka tubelamine muntu mwanga tumuzihe, yeka tushintikize muntu wakubula mulandu.

¹² Yeka tubamine hibayoya, ngonehe shinzimbi, tubamine banzimba ngonehe bayo banaminiwi na kaye.

¹³ Pe tukashimba byuma byabingi bya kulishiyashiya, na kwinzalisha matala wetu na byuma bya kupukula.

¹⁴ Yeka ulifungile netu, pe tukalitapile nimwabyo tukawana.”

¹⁵ Mwanami, hinga wenda nabo bantu banoho, hinge kutenda biya ba kutenda.

¹⁶ Ndaba bantu aba bikati nimwabyo bakakutenda byabibi, ba kunyankupila na kuziha.

¹⁷ Kaliha shashiwahe, ku manyika kantamba, ndi tuyoni otu ukumanyika hitumona.

¹⁸ Bantu bakakutenda nehe, ba ku li manyikila kapeto nibo bamwine, mu kapeto muya bakafwamo.

¹⁹ Nibyo byaholokanga ku bakakuheta mu zinzila zazibi, balobeshiwanga na wuheti uya banatongokele.

Ngana Zili na kwihana

²⁰ Ngana zili na kubilikiza mu mikwakwa, na ku myanya ya kulandishila.

²¹ Ngana zili na kubilikiza, ku mapangati a zinkena nanoku kunakungulukili bantu babengi.

²² “Kati shikati sha kukuma hati enu bakuyeba, mukatwalilila na kutenda byuma byowa? Kati shikati sha kukuma hati enu bakuyeba mukazimba ngana? Kati kulilongesha mufwako ndi?

²³ Yuvwilililenu oho nikumilongesha, nikamitongweza bihanganiko byami, na kumi tontwelela mazu wami.

²⁴ Namihanine ngoboni kaliha mwanyuvwile, pe nolwele liboko lyami ngoboni kaliha mwatwalileko ngana,

²⁵ ndaba munalimbwilishi mazu wami, na kubula kutenguluka oho namishuzu.

²⁶ Nanami kami, nikamihepa ha shikati sha makalikiza wenu. Nikamihengamina, oho mukekala mu makando.

²⁷ Oho makando akamishintikiza ngonehe nkuli, na makalikiza akamizilila ngonehe kakundukundu na wukalu na malwa.

²⁸ Niho mukanyihana, ngoboni nifwako kuka kumbula, bakancingancinga ngoboni bafwako kukangwana.

²⁹ Ndaba mwakanine ngana, pe kaliha mwalihatilile kuyuvwila Nyambi ya Ngula bowa.

³⁰ Enu kaliha mwombatalile mazu wami, kami mwayinishile ku shuza kwami nimwako.

³¹ Nohobene mukalya mikabo yinafwanini, ntendelo yenu. Pe mukekuta na mikabo ya ntendelo yenu.

³² Bantu bakuyeba balobanga, ndaba ya kukanangana.

³³ Ngoboni ou ukayuvwilila kukwami ukawana kulamwina, pe ukekala mu ku mwena na kubula kulikekula.”