Zefwaniya 2 - Libuka Lya Kuyela

Kulambilila kutenguluka

¹ Enu matunga a kubula lisheni, kungulukenu, kungulukenu hamo,

² oho shikati shilolo shikume shakwimikiwa kwa mutena uyo ukeza ngonehe muzungu wapepukanga na mpepo, oho ku bamba kwa wukali wa Nyambi ya Ngula shilolo kwize hahenu, oho mutena waku monesha kupilama kwa Nyambi ya Ngula shilolo ukume.

³ Shingenu Nyambi ya Ngula, enu bamu litunga nimwenu, enu mwombatalanga na kutenda ndayano zendi, shingenu byakwoloka, shingenu kubomba. Kampe mukaholekiwa ha mutena wakupilama kwa Nyambi ya Ngula.

Kushushuliwa kwa matunga azinguluka Yunda

⁴ Kowa ukashalaho mu munzi wa Ngaza na Ashikeloni ukafutuka lipembe mutena wakekala hakati ka mutwe munzi wa Ashindondi ukenga lipembe na munzi wa Ekiloni ukapukuliwa.

⁵ Makando wenu enu mwazika ha shibumbo sha liwate, enu mukoka wa Bakeleta. Lizu lya Nyambi ya Ngula lina kumilwisha, enu Bakenaani, muli mu litunga lya Bafwilishitina nenu kami nikaminongesha, kukabule hinge umo ukashalaho.

⁶ Enu bibumbo bya liwate mukafutuka mabuyishilo a bambelele na bilembalemba bya balishani na kwa kulala bambelele.

⁷ Shibumbo sha liwate likenga litunga lya mashaliza aba litala lya Yunda, omu nimo bakabuyishilanga matanga wabo. Kami mu matala amu Ashikeloni nimo bakalangananga ku mazolo. Ndaba Nyambi ya Ngula, Nyambi yabo, ukabafulankana na kubweshela kutangama kwabo.

⁸ Nyambi ya Ngula unakwamba ngayi, “Nayuvwu lihandu lya Mowambi na matuka a Baamoni, eshe banahandulu bantu bami na kulilundumika ha litunga lyabo.

⁹ Nohobene, ngonehe nikuyoya Ami Nyambi wa Makunge, Nyambi wa Ishalela, Nikulibeza ngayi, Mowambi na Baamoni bakalobeshiwa ngonehe Shondoma na Ngomola, kukekala mwanya wa kayuwa nzovu na mateke a mushele. Likenga lya kuloba mwaya myaka, mashaliza a bantu bami bakabapukula, pe bampuluki ba matunga wami bakakona litunga lyabo.”

¹⁰ Eshe nisho bakatambula ha kuliyemeza kwabo, ndaba bashilawizile na kuliyemezela ha bantu ba Nyambi wa Makunge.

¹¹ Nyambi ya Ngula ukenga wakutinisha na kubalwisha, oho akalobesha banyambi ba hano hanci, pe matunga nimwawo hano hanci akafunkama na kumulemesha.

¹² Nanenu kami Kushi, mukazihiwa na mukwale wami.

¹³ Pe ukatandubula liboko lyendi na kulwisha ba ku ncelele na kunongesha Ashiliya, kami ukafutula Neniva ku mwinga wakunonga, ukafutuka kwinga nyuminine ngonehe libelelengwa.

¹⁴ Matanga a bambelele na zingombe akalala mukati ka munzi na tuyamana nimwato twa lishaka, likubi na shishaka bakatentama ha bishimi byawo, kulila kwa makungulu kukayuvwanika mu mampananga na makwangala akayuvwanika ku shikwiliti, ndaba mikambo ya mutondo wa shenda yikashandoliwa.

¹⁵ Shiya nisho shikamoneka ku lukena luya lwekalile mu myelembo, na kuhanganika ngayi luli shiwahe mu ku mwena, bantu balwo bakuhanganika ngayi kampe lunengi lwalunene mu kaye nimwako. Haya monenu eshe lukaloba, lukafutuka mwakwikala tuyamana twa lishaka. Bantu nimwabo ba kupitamo bakashiba milozi na kulikama mu maboko.