Zefwaniya 1 - Libuka Lya Kuyela

¹ Elye nilyo lizu ambile Nyambi ya Ngula kuli Zefwaniya ha shikati, oho Yoshiya mwana Amoni engile mwene mu Yunda. Zefwaniya wengile mwana Kushi, Kushi wengile mwana Ngendaliya, Ngendaliya wengile mwana Amaliya, Amaliya wengile mwana Hezekiya.

Mutena wa Nyambi

² Nikakomba byuma nimwabyo bili hanci. Eshe nisho anamba Nyambi ya Ngula.

³ Nikakomba bantu na tuyamana, nikakomba tuyoni twatukanga muyilu na zinci zamu liwate. Nikapukalisha bakakuluwa nimwabo na kulobesha bantu nimwabo hano hanci. Eshe nisho anamba Nyambi ya Ngula.

⁴ Nikolola liboko lyami ha bantu bali mu Yunda namu Yelushalema nimwamo. Nikalobesha bakakulemesha Mbaalu baya balimo na bakankombela baka mazina atunankishi.

⁵ Nikalobesha bakakufunkama manungo hayilu ya matala wabo na kulemesha mutena, ngonda na nyenye na baya bafunkamanga manungo na kulibeza kuli Nyambi ya Ngula, ngoboni bakulibeza kami mu lizina lya nyambi Moleki.

⁶ Nikalobesha baya banamfutamini na kubula kunkonkezeka, hinge kwipula ngayi nibatwaminine.

⁷ Mwenenu ku meho a Nyambi wa Makunge, ndaba ha mutena uyo wa Nyambi ya Ngula uli hahepi. Nyambi ya Ngula unawahishi nkombela na kuzilika nimwabo aba anehana.

⁸ Nyambi ya Ngula unakwamba ngayi, “Ha mutena uyo wa nkombela, nikashushula babilolo na bana ba bamyene na baya nimwabo bashinga kuvwala bivwalo bya bakamatunga ashenge.

⁹ Ha mutena uyo, nikashushula nimwabo bakakukana kulyata ha shikwiliti, na mbuto nabaka kwinzalisha litala lya nyambi yabo na byuma banawana mu mangunga namu nzila ya kwongeza.”

¹⁰ Nyambi ya Ngula ukwamba ngayi, “Ha mutena uyo, malila akayuvwanika ku Lipangati lya zinci, na mbingo zikayuvwanika ku mbalila yayipya yili mu lukena. Na mushindo wawunene wakupabuka ukayuvwanika ku binkanda.

¹¹ Lilenu na kutuwa mbingo, enu mwekala ku zinkunzu, bakamikwebo benu nimwabo bakazihiwa, nimwabo bakakulanda na kulandisha na shiliva bakalobeshiwa.

¹² Ha shikati shiyo, nika shingashinga mu Yelushalema na mimuni na kushushula nimwabo bali mumpoza, baya bakwamba mu mitima yabo ngayi, ‘Nyambi ya Ngula kukatenda shashiwahe hinge sha shibi wufwako.’

¹³ Wuheti wabo ukapukuliwa na matala wabo akanyemuniwa. Hinge ndi bakazika matala kukalalamo bafwako, hinge ndi bakalima mafuba a shinyanca, kuka nwako waine bafwako.”

¹⁴ Mutena wawunene wa Nyambi ya Ngula uli hahepi, mwa shikuma ulinakwiza wanguwangu, kukekala mungunina ha mutena wa Nyambi ya Ngula wawululu, hinge muntu wangovu ukakaloka na kulila.

¹⁵ Niwo ukenga mutena wa wukali, ukenga mutena wa makando na malwa, mutena wa mishunga na kuloba, mutena wa mincimpwe na ku shipa. Mutena wa makumbi na mincimpwe ya ku shipa shikuma.

¹⁶ Mutena wakuvuma kwa mpandula na miyoyo ya nzita na kulwisha zinkena zekala mu bipata na baya bali kuyilu ya tupeshi.

¹⁷ Nyambi ya Ngula unakwamba ngayi, “Nikaleta makando ku bantu ngayi mwanga bakende ngo batushishitwa, ndaba banatende wubi kukwami. Mukeza wabo bakawuyita ngo mema na mituntu yabo yikabungana ngo wutoko.”

¹⁸ Shiliva hinge ngolinde yabo kuka balamwina yifwako, ha mutena uyo wa wukali wa Nyambi ya Ngula. Na lihungu lya wukali wendi, hanci nimwaho ha kahoka na mundilo, ndaba nimwabo bekala hanci ukabalobesha.