Zakaliya 9 - Libuka Lya Kuyela

Nyambi ya Ngula ukushushula bamalamo ba Yunda

¹ Lizu lya Nyambi ya Ngula likulwisha litunga lya Handilaki, kami likakuma naku munzi wa Ndamashika. Ndaba muntu ukapenza hali Nyambi ya Ngula, ngonehe mishobo ya Ishalela ya penza hahendi.

² Na munzi wa Hamati, uya walitabwila nginza na Handalaki, naniwo kami wenga wendi. Hamo na minzi ya Tile na Shindoni na bantu bawutungu bekalamo.

³ Munzi wa Tile unatende shipata sha ku shuma, kami unabungiki shiliva yayingi ngonehi limvu, na ngolinde yayingi ngonehe ndoba yamu mikwakwa.

⁴ Ngoboni monenu taha, mwene ukabayangula wuheti wabo na kuwu yumbila mu liwate, pe niye ukahokeshiwa na mundilo.

⁵ Baka Ashikeloni bakashimona, pe bakatina, lukena lwa Ngaza kami, lukakanka shikuma na kwikala na mutentu, na Ekiloni kami ukakanka, ndaba kulumbeza kwendi kukamana. Lukena lwa Ngaza lukayawa mwene walwo, pe munzi wa Ashikiloni ukashala wakubula bantu.

⁶ Mapukwenda bakazika mu Ashindondi, pe kami nikamanisha kulilundumika kwa Fwilishitiya.

⁷ Bafwako kami kukalya nyama na mukeza wayo, hinge byakulya nimwabyo bya kanishiwa. Pe mashaliza nimwabo bakenga bantu bami, bakafutuka kwinga lupashi lwa Yunda. Pe nabo kami Baekiloni bakafweka ngo Bayembushi.

⁸ Niho nikalama litala lyami, ngayi kukabule banzita ba kupitangako, Mukakubalyatilila kuka bayandisha kami ufwako, ndaba haya nikabalama amimwine.

Mwene ukalela kumbili

⁹ Obe mwana wa mbuyama wa Ziyoni, wahilila shikuma! Obe mwana wa mbuyama wa Yelushalema, wulumwina tunkelenkele! Mona mwene yobe ulinakwiza kukwobe, wakwoloka, uli na kupulwisha, wakubomba hinga akandama ha mbongolo, mbongolo wamushe, mwana mbongolo.

¹⁰ Nikashepesha makoloyi a Efulemu, na bambishi mu Yelushalema, na bipando bya mukunzi bikapokozoka. Pe ukabilika ku mwena ku matunga, wene wendi ukabalika ku liwate kukakuma kami ku liwate lyamina, ku balika ku mushinzi kutwala na kwakumina hanci.

¹¹ Nehi boni enu kami, ndaba ya kulimama kwami nanenu kwa mukeza, nikafumisha bantapwa benu mu liteke lya kubula mema.

¹² Enu batuyili bakakulumbeza, bokenu ku bipata byenu bya ku shuma, nikubilika ngayi, lelo, nikabweshela kukwenu kabili.

¹³ Nikakonteka Yunda ngo nehi shipando sha mukunzi, kami natende Efulemu ngo muvwi wakuyakaho. Nikatumeza bana bobe babalume, obe Ziyoni, ngayi bakalwishe Bangilishi, nikabenga mukwale wa kanzita wangovu.

¹⁴ Niho Nyambi ya Ngula ukabaholokela, na muvwi wendi ukapita ngo lumuni lwa mvula. Mwene Nyambi ya Ngula ukashiba mpandula, pe ukendela mu nkuli yaku mabukubuku,

¹⁵ Nyambi wa Makunge ukabalama, pe bakabalobesha na kulyatangila bamalamo babo aba bapuhanga mamanya na malekeni, Bakanwa mukeza wabo ngo muntu ukunwa waine, bakenzala ngonehe lwenzalanga lulonga na mukeza, waku myanzila ku zinkomi za kaala.

¹⁶ Ha mutena uyo Nyambi ya Ngula Nyambi yabo ukabapulwisha, ndaba bantu bendi, banafweke ngo bambelele. Bakabyazima mu litunga lyabo, ngonehe mamanya a ndando yayinene.

¹⁷ Litunga likenga lyaliwahe shikuma, byakulya bya mpeka bikashumisha bandumbana, pe waine yayipya yikashumisha batunkanga.