Zakaliya 4 - Libuka Lya Kuyela

Shimono sha Lyeyeko

¹ Lingeloyi ou nambilenga nendi, wezile kami, pe wantoneshele ngo muntu ba kutonesha ha tulo.

² Niho anyipwile ngayi, “Kati uku mona bishini?” Nambile ngayi, “Niku mona lyeyeko lya mimuni lya ngolinde na lulonga hayilu yalyo lya mimuni mutanu na yibili yili hahalyo na myahi mutanu nayibili ya mimuni.

³ Kami kuli mitondo yibili ya olive, umo ku shilyo sha lulonga, wamina uli ku shimoho.”

⁴ Niho nepwile lingeloyi nambilenga nendi ngayi, “Kati ebye bishini obe hekulyami?”

⁵ Lingeloyi nambilenga nalyo lyankumbwile ngayi, “Kati ebye kubilimuka ufwako ndi?” Nakumbwile ngayi, “Byo hekulyami kubilimuka nifwako.”

⁶ Lingeloyi lyambile kukwami ngayi, “Elye nilyo lizu lya Nyambi ya Ngula, kuli Zelumbambelu. Kaliha ngayi mukakoma na nyala, hinge ngayi na ngovu, ngoboni na Moyo wami, nisho anamba Nyambi wa Makunge.

⁷ Obe yani, obe lipili lyalinene? Kumbili ya Zelumbambelu, ukafutuka mbuwa. Zelumbambelu ukaleta limanya lya hayilu kumbili na kubilikiza ngayi, ‘Nceshe, kwikale nceshe.’ ”

⁸ Niho kami lizu lya Nyambi ya Ngula lyezile kukwami ngayi,

⁹ “Maboko a Zelumbambelu niwo ayalile mwimbi wa nelye Litala, niwo kami akalimanisha. Mukalimuka ngayi, Nyambi wa Makunge niye unantumu kukwenu.

¹⁰ Baya bashampwilenga ha mutena kwatendiwile byuma byabishe bakawahilila, oho bakamona shipimisho sha kupimisha litala shili mu liboko lya Zelumbambelu. Aba mutanu na babili, nibo meho a Nyambi ya Ngula, anakumu hano hanci nimwaho.”

¹¹ Niho nepwile kami ngayi, “Kati eye mitondo yibili ya olive yili ku shilyo naku shimoho sha lyeyeko lya zimuni yikutontoloka bishini?”

¹² Niho namwipwile kami ngayi, “Kati eye myahi yibili ya mutondo wa olive yili hahepi na miyengo yibili ya ngolinde iya yikuvwisha mazi, nibyo bishini?”

¹³ Wankumbwile ngayi, “Kati kulimuka ebye ufwako ndi?” Nambile ngayi, “Byo hekulyami.”

¹⁴ Niho ambile ngayi, “Aba wubili wabo, nibo banawabishiwi ngayi benge bakamilimo ba mwene wa hano hanci.”