Zakaliya 2 - Libuka Lya Kuyela

Shimono sha lunyimbwa lwa kupimisha

¹ Nayimbwile meho wami, pe namonene muntu hinga ekala na lunyimbwa lwa kupimisha mu liboko lyendi!

² Namwipwile ngayi, “Kati uli na kuya kuti?” Niye wankumbwile ngayi, “Nili na kuya mu kupima Yelushalema, ngayi nimone wunene na wutali wendi.”

³ Monenu, lingeloyi liya lyambile kukwami lyezile kumbili, pe Lingeloyi lyamina niho lyezile mu kuliwana nalyo,

⁴ lyambile kukwendi ngayi, “Yituka ukatongweze uyo ndumbana ngayi, ‘Yelushalema lukenga lukena lukazikiwa ngo minzi ya kubula twimbi ndaba ya wingi wa bantu na zingombe zilimo.

⁵ Ndaba Ami nikenga kukwendi kembi ka mundilo kakamuzinguluka, kami nikaleta wuwahe wami hahendi.’” Eshe nisho anamba Nyambi ya Ngula.

Bantapwa bakwihaniwa kuboka ku munzi

⁶ Nohobene Nyambi ya Ngula unamba ngayi, “Lubukenu! Lubukenu! Na kufuma mu litunga lya ku ncelele,” Tinenumo, ndaba namipanzanishili kuti na kuti ya zimbalila zinaa za mpepo ya mayilu.

⁷ Bembulukilenu ku Ziyoni enu mwekala hamo na mwana Mbambiloniya wa mbuyama.

⁸ Ndaba Nyambi wa Makunge wambile nehi ngayi, “Ha ku monesha wunene wendi wantumine ku matunga a bantu aya apukwile wuheti wenu, ndaba ngayi ukumikwata, ukukwata kantu kaha liho lyendi.”

⁹ Mwa shikuma, nikanyenkanisha liboko lyami na kubalwisha ngayi bandungo babo bakabapukule. Mukalimuka ngayi, Nyambi wa Makunge niye nantumu.

¹⁰ Yimbilenu na ku wahilila enu bantu bamu Ziyoni, ndaba na kumakale mukwikala mukati kenu. Eshe nisho anamba Nyambi ya Ngula.

¹¹ Ha mutena uyo matunga amengi akalifungila na kwiza kuli Nyambi ya Ngula, pe bakenga bantu bami, kami ni kekala mukatikenu, kami niho eze mukalimuke ngayi, Nyambi wa Makunge niye nantumu kukwenu.

¹² Nyambi wa Makunge ukakona litunga lya Yunda kwinga shitapilo sha likona lyendi mu litunga lya kuyela, niho eze akahate kami Yelushalema.

¹³ Haya mwenenu, ku meho a Nyambi ya Ngula, enu bantu nimwenu, ndaba wakuma kale kufuma mu mwanya wendi wa kuyela.