Zakaliya 14 - Libuka Lya Kuyela

Yelushalema na matunga amina

¹ Monenu, mutena wa Nyambi ya Ngula ulinakwiza, oho ebye byapukuliwile kukwenu bikatapishiwa mukati kenu.

² Ndaba nika kungula mikoka nimwayo kwiza na kulwisha Yelushalema, lukena lwa Yelushalema lukakomiwa na matala wamo akapukuliwa na bambuyama bakahanduliwa, shitika sha bantu ba lukena bakatwaliwa mu wuntapwa, ngoboni wingi wa bantu bakashala mu lukena bakekalilila.

³ Niho Nyambi ya Ngula ukaya na kulwisha aya matunga ngonehi alwanga ha mutena wa nzita.

⁴ Ha mutena uyo ukalyata mawulu wendi ha lipili lya mitondo ya Olive elye lyekala mu Yelushalema ku mbalila ya mushamuko, kami lipili lya mitondo ya Olive likalitapa hakati ku balika ku mushamuko kukakuma naku mponci na ku shiya mbuwa yayinene hakati, mbalila yimo ya lipili yikahenyena ku ncelele pe mbalila yamina yikahenyena ku mabukubuku.

⁵ Niho mukatinina ku mukulo wa mapili ami, ndaba mukulo ukatandubuka kukakuma naku Azela. Mukatina ngonehe mwatinine ha kukanka kwa hanci ha mutena wa Uziya mwene wa Yunda. Nyambi ya Ngula, Nyambi yenu ukeza, hamo na bakakuyela bendi.

⁶ Ha mutena uyo, mwaana na mashiku, hinge makelengo kukekalako bifwako.

⁷ Ukenga mutena ukalitapulula na matena amina, mutena wakubula shikati sha mwaana hinge shikati sha wushiku. (Ukenga mutena wakulimukiwa kuli Nyambi ya Ngula.) Hinge ku shikati sha mazolo kukekalanga tuhu mwaana.

⁸ Ha mutena uyo mema a wumi akakunkula kufuma mu Yelushalema, amo akakunkulukila ku liwate lya ku mushamuko, pe amina akakunkulukila ku liwate lya ku mponci, awa mema akatutikanga mayinza na mvumbi.

⁹ Nyambi ya Ngula ukenga mwene wa hano hanci nimwaho. Ha mutena uyo, kukekala tuhu mwene umo Nyambi ya Ngula, kami lizina lyendi likenga limo.

¹⁰ Litunga nimwalyo likafutuka mbuwa, iya yikabalikila ku Ngemba kukakuma naku Limoni, ku mabukubuku a Yelushalema. Ngoboni Yelushalema ukekala haya ekalile mwaka ha kukankama, ku balika ku lipangati lya Mbenjamani kukakuma na ku lipangati lya kutatika, kukakuma na ku lipangati lya ku nkomi, pe ku balika ku kapeshi ka Hananela kukakuma na kubizongelo bya mwene.

¹¹ Yelushalema ukekala na bantu, kami kowa mishunga yikekalamo. Yelushalema ukazika mu ku mwena.

¹² Awa niwo malwa akatuma Nyambi ya Ngula, ku matunga nimwawo aya alwishile Yelushalema. Zinyutu zabo zikabola oho benda, meho wabo akabola mu mitwe yabo na zindimi zabo zikabolela mu tunwa twabo.

¹³ Ha mutena uyo, Nyambi ya Ngula ukatampwisha bantu, pe bakekala mulumpa. Bakalikolobela ku maboko umo na wamina na kulilwisha.

¹⁴ Yunda ukalwisha Yelushalema. Wuheti nimwawo wa mu matunga azinguluka Yelushalema ukashimbiwa, ngolinde yayingi naya shiliva na bivwalo byabingi bikashimbiwa.

¹⁵ Malwa akufweka ngonehe awa, akeza ku bambishi na mambema na makamela naku bambongolo naku tuyamana nimwato tukawaniwa mu zintanda.

¹⁶ Niho mashaliza nimwabo obo bakapuluka ku malwa a kulwisha Yelushalema, bakayanga ku Yelushalema na kulemesha Mwene, Nyambi wa Makunge mu mwaka na mwaka, kami bakawahililanga shimbo sha Minkungwa.

¹⁷ Ndi bamo ku mikoka ya hano hanci kukekala aba bakabula kuya na kulemesha Mwene Nyambi wa Makunge, ku Yelushalema, pe bafwako kukekala na mvula.

¹⁸ Ndi bantu ba ku Engepita bakabula kuya na kulemesha, pe bafwako kukekala na mvula. Nyambi ya Ngula ukaleta hahabo malwa aya akezilila matunga a bantu nimwabo, baya bakabula kuya ku shimbo sha Minkungwa.

¹⁹ Aka niko kashushwilo kakeza ku Engepita naku matunga nimwawo aya akabula kuya ku shimbo sha Minkungwa na ku wahilila.

²⁰ Ha mutena uya awa mazu, “ANAFUNGULIWI KULI NYAMBI YA NGULA.” Akatikitiwa ha milangu za bambishi, pe zinyungu za mu Litala lya Nyambi ya Ngula, zikenga ngo zindonga za kuyela zili hahepi na kaala.

²¹ Nyungu nimwayo yamu Yelushalema namu Yunda, yikenga ya kuyela kuli Nyambi wa Makunge, pe nimwabo bakeza na kukombelela, bakatelekamo nyama ya nkombela. Ha mutena uyo, kowa bakamikwebo bakekala mu Litala lya Nyambi wa Makunge.