Zakaliya 11 - Libuka Lya Kuyela

Kuloba kwa bamalamo ba Ishalela

¹ Shinkulula bihala byobe, obe Lembanoni, ngayi mwanga mundilo utweshe kuhokesha mitondo yobe ya shinda.

² Lilenu shikuma enu mitondo ya Shayipulashi, ndaba mitondo ya shinda yinawu, mitondo yayiwahe, yinalobo! Lilenu enu mitondo ya Oka yaku Mbashani, ndaba lishaka lya kuzika linatemiwi.

³ Yuvwililenu kulila kwa balishani, mabuyishilo wabo a wilo, analobeshiwi! Yuvwililenu kukangoka kwa babimbwi, ndaba shimbundu sha Yondana shinalobo.

Balishani babili

⁴ Nyambi ya Ngula, Nyambi yami ukwamba ngayi, “Buyisha litanga lya bambelele likuya na kuzihiwa.

⁵ Aba ba kubalanda, ba kubaziha, ngoboni ku shushuliwa bafwako. Pe obo ba kubalandisha, bakwamba ngayi, ‘Yemezenu Nyambi ya Ngula, Ami nahetakale,’ Niho balishani babo kubayuvwila nceshe bafwako.”

⁶ Nyambi ya Ngula ukwamba ngayi, “Haya kuyuvwila nceshe aba bazika mu litunga nifwako. Nikayaka bantu nimwabo mu maboko anaba bazika nabo hahepi naku mwene yabo uya ukalobesha litunga. Pe kuka balamwina nifwako.”

⁷ Niho nengile mulishani wa bambelele baya balandiwile kuya mukuzihiwa. Nashimbile miwana yibili ya wulishani, muwana umo nawutumbile ngayi, “Nceshe,” wamina ngayi, “Umo” pe nabuyishilenga bambelele.

⁸ Nafumishile balishani bahatu mu ngonda yimo. Ndaba nayongeshele shikulupisho, kami bazimbile.

⁹ Nambile ngayi, “Nifwako kukenga mulishani wenu. Haya aba ba kulifwila, bafwenga tuhu. Aba ba kuyongala, bayongwelenga tuhu, pe aba ba kushalaho, balivwote umo na wamina.”

¹⁰ Niho nashimbile muwana watumbiwile ngayi, “Nceshe,” nawupokwele na kumanisha kulimama kuya nalimamine na matunga nimwawo.

¹¹ Kuya kulimama, kwamanine wawuya mutena, pe bambelele baya bayandishiwilenga, baya bamonene ebye natendele, balimuke ngayi, linengi lizu lya Nyambi ya Ngula.

¹² Nambile kukwabo ngayi, “Ndi shinawaha kukwenu, mpanenu ncuungu yami. Ndi shilolo shiwahe, pe hinga mumpanika.” Niho bampanine, makumi ahatu a muwayawaya wa shiliva.

¹³ Niho Nyambi ya Ngula ambile kukwami ngayi, “Wupuhile ku mukakubumba.” Pe nashimbile makumi ahatu a muwayawaya wa shiliva, ndando yayiwahe eye bahanganikile ngayi niyo yafwanina kwinga ncuungu yami na kupuhila mu Litala lya Nyambi ya Ngula.

¹⁴ Niho napokwele muwana wawubili watumbile ngayi, “Umo,” kupokola shikonzi mukati ka Yunda na Ishalela.

¹⁵ Nyambi ya Ngula niho ambile kukwami ngayi, “Shimba bya kuliyavwisha bya mulishani wakuyeba.

¹⁶ Ndaba nikayaka mulishani mu litunga, ou ukabula kutwala mutima ku bambelele ba kuyongala, hinge kukafwatula babashe, hinge kupanga ba kukola, hinge kulisha balishiwahe, ngoboni ukalya nyama ya bambelele babawahe na kutabula zimpazi zabo.

¹⁷ Makando wendi ou mulishani wakuyeba, ou unashiyi bambelele! Mukwale mwanga uketule liboko lyendi na liho lyendi lya shilyo, liboko lyendi mwanga linyate na liho lyendi lya shilyo mwanga lifwe!”