Zakaliya 10 - Libuka Lya Kuyela

Nyambi ya Ngula ukukulupisha kulamwina

¹ Nyepenu Nyambi ya Ngula ngayi alokeshe mvula. Nyambi ya Ngula, niye watendanga makumbi a mvula. Niye walokeshanga mvula ku muntu nimwendi, na kumbuto nimwayo ya mu mafuba.

² Ndaba tunankishi twa mu matala, twambanga byowa, bakakwawula bamonanga bya mahalo, kami bambanga milo ya mahalo. Babengezekanga na mazu a kubula kuyavwa. Nohobene, bantu ba kuyebangila ngo bambelele, bakuyandishiwa, ndaba ya kubula mulishani.

³ Nyambi ya Ngula ukwamba ngayi, “Ninapilamini shikuma balishani, pe nikashushula bakakutwaminina. Ndaba Nyambi wa Makunge, ukalama litanga lyendi, baka litala lya Yunda. Nikabenga ngonehe akeyukanga mbishi mu nzita.”

⁴ Kuli Yunda niko kukafuma limanya lya mu nkomi, kukafuma mpimpi yaku ntanda, kukafuma shipando sha mukunzi sha nzita, niko kukafuma mukakutwaminina nimwendi.

⁵ Nimwabo bakenga ngo balume ba kukanca mu nzita, ba kulyatangila bamalamo babo mu lukungu lwamu mikwakwa. Ndaba Nyambi ya Ngula ukekala nabo, pe bakayuvwisha lisheni baya bakakandama ha bambishi.

⁶ Nikashumisha litala lya Yunda, na kupulwisha litala lya Yoshefwa. Nikababwesha, ndaba nili na nceshe hahabo, bakamoneka ngo kaliha nabakanine, ndaba Ami Nyambi ya Ngula Nyambi yabo, pe nikaba kumbula.

⁷ Baefulemu, bakenga ngo banzita ba kukanca, kami mitima yabo yikawahilila ngo bantu bananu waine. Bana babo bakashimona bakawahilila, mitima yabo yikawahilila muli Nyambi ya Ngula.

⁸ Nikabashibila mulozi na ku bawanika hamo, ndaba naba kulizi, kami bakenga babengi ngonehe bekalile mwaka.

⁹ Hinge ngayi na bapanzanishilile ku matunga ashenge, ngoboni hinge kuyo ku matunga akwakutali, bakanyanuka. Nohobene, nibo na bana babo bakapuluka, pe bakaboka.

¹⁰ Nikabafumisha ku Engepita na kubabwesha ku kwabo, nikaba kungula na kubafumisha ku Ashiliya, na kubabwesha ku litunga lya Ngiliyande na Lembanoni, kutwala noho bakenzala mu litunga nimwalyo.

¹¹ Bakapita mu liwate lya makando, pe mankanyi a liwate akakomiwa, na mampunga a mushinzi wa Nayilo akayuma. Kutangala kwa Ashiliya kukashepa na muwana wa ngovu za Engepita ukaloba.

¹² Nikabashumisha muli Nyambi ya Ngula, kami bakenda mu lizina lyendi, eshe nisho akwamba Nyambi ya Ngula.