Yunda 1 - Libuka Lya Kuyela

¹ Ami Yunda, mukamulimo wa Yeshu Kilishitu na kawushinda wa Yakoba. Nikutikitila liñwati elye kuli aba Nyambi anehana bali mu shishemo sha Nyambi na mu kulamiwa kwa Yeshu Kilishitu.

² Nceshe na ku mwena na shishemo, bihanye kukwenu.

Baka ku longesha mahalo

³ Enu bahoni ba kuhakiwa, nili na shizundami sha kumitikitila bya kupuluka oku tuna konkana nimwetu, ami nahanganikile ngayi shikwinga shashiwahe kumitikitila bya kumishumankanisha ndaba ya kukulupila oku Nyambi apanikile kamo ku bakakuyela.

⁴ Ndaba bantu bamo bakubula Wunyambi banengini mukati kenu kuwi, aba mwaka bemikiwile ku kuyata oku, banengi bakamashewinizi, bakufutula nceshe za Nyambi kwinga nzila ya kutendelamo wunjenge na kukana Yeshu Kilishitu, niye Hekulyetu na Mwene umo tuhu.

⁵ Hinge ndi ngayi nimwabyo ebye mu kubilimuka, nikushinga kumyanukisha, ngayi Mwene wapulwishile bantu bendi Baishalela kubafumisha mu litunga lya Engepita, ngoboni walobeshele aba babulile kukulupila.

⁶ Na mangeloyi awa abulile kwikalisha mu myanya yawo ya kutatika, ashiyile myanya yawo, eye Nyambi awapanikile. Nyambi unawamanga na mawenge a mwaya myaka, kami unawayaka mu mwanya wa mincimpwe kutatilila kuyatiwa ha mutena wawunene.

⁷ Anukenu kami Shondoma na Ngomola na minzi ya hahepi, bantu ba muyo batendele nehi aya mangeloyi, balingizile mu wunjenge na kukonka mahungu a lutu. Banengi shifwanikizo sha bantu aba bakashushuliwa na mundilo wa mwaya myaka.

⁸ Nohobene kami aba bantu banengi ngo bakakulota tuhu bali na bihanganiko biku bipisha zinyutu zabo, ba kukana ngovu za Nyambi na kuhandula wuwahe wa byuma bya muyilu.

⁹ Ngoboni hinge Mayikulu mukulwane wa mangeloyi, kaliha watendele noho, oho balikananganishile na Shatana ha mutuntu wa Moshesha. Mayikulu kaliha wamwambishile na mazu a lihandu, ngoboni wambile ngayi, “Mwene akuyate!”

¹⁰ Ngoboni aba bantu bakuhandula byuma biya bakubula ku yuvwishisha na byuma ba ku yuvwishisha na shihemwa, ngonehe tuyamana twa mu lishaka twa kubula ngana, nibyo bikubabipisha.

¹¹ Makando kukwabo! Ndaba banakonko nzila ya Kaina, ndaba ya ku haka mali, banaliyaka mu mulandu uya atendele Mbalaamu, nimwabo banalobo ndaba ya kufutulukila Nyambi, ngonehe atendele Kola.

¹² Aba bantu nibo babipishanga bimbo byenu bya mayambwayambwa, oho balyanga balifulankananga tuhu nibo bamwine, banafweke ngo makumbi a kubula mema akupepoka na mpepo. Banafweke ngo mitondo yikubula kuyima mikabo hinge ndi ha shikati shayo, mitondo yiyo yinazuliwi, yinafwililili.

¹³ Banafweke ngonehe mankanyi amakali a liwate, kami milimo yabo ya lisheni yiku moneka ngo lifulututu. Banafweke ngonehe nyenye za mwendelela, pe Nyambi unabakongele mwanya wa mincimpwe wa mwaya myaka.

¹⁴ Enoki wa mukoka wa mutanu na yibili kufuma kuli Andama, walubulwile byabo ngayi, “Monenu! Mwene ulinakwiza na mangeloyi endi akuyela amengi a kubula kutwesha kulabiwa,

¹⁵ ngayi eze na kuyata bantu nimwabo. Ukayata bakakubula Wunyambi ndaba ya milimo yabo yayibi eye banatendenga na nyambilo yabo yayibi eye bakawubi banambanga kukwendi.”

¹⁶ Aba bantu banengi bakakungunguta na bakantongawushi, bali na kwenda mu biheka bya mahungu abo a wuntu. Bakakulilundumika, kami bakakuhonga baminabo ngayi mwanga bawane ebye bakushinga.

Kushiwulula na kufundiziza

¹⁷ Enu bakakuhakiwa, anukenu mazu bamitongwezele mwaka bantumwana ba Mwene wetu Yeshu Kilishitu.

¹⁸ Bamitongwezele ngayi, “Ha matena aku kotoka kukekala bakakukumangiza, aba bakakonka biheka byabo bya mahungu a wuntu.”

¹⁹ Aba bantu nibo bakakuleta katapulula, bantu bali mu mahungu a wuntu, baya banabulu Moyo wa Kuyela.

²⁰ Ngoboni enu bakakuhakiwa, lishumishenu mu kukulupila kwenu kwa kuyela. Lombelenu mu ngovu za Moyo wa Kuyela.

²¹ Yikalenu mu shishemo sha Nyambi, oho muli na kutatilila wumi wa mwaya myaka, ou Mwene wetu Yeshu Kilishitu akamipana mu nceshe zendi.

²² Moneshenu nceshe ku baya ba kucincoka,

²³ pulwishenu bamo, bayokolenu mu mundilo. Bamina bamoneshenu nceshe hinga mwashoshoka, ngoboni zimbenu bivwalo byabo binatampakana na wubi wa makwilu a wuntu.

Lilombelo lya kuyemeza

²⁴ Kuyemeziwe Nyambi ou ukutwesha kumi holeka ngayi mubule kupukala, ou ukutwesha kumi leta ku meho a wuwahe wendi, hinga mwawahilila na kubula shihepwa.

²⁵ Nyambi, niye tuhu Mupulwishi wetu kupitila muli Yeshu Kilishitu Mwene wetu, kukwendi kwekala wuwahe na maleema na nyala na ngovu, kufuma ku myaka nimwayo ya kunyima na shikati shino na mwaya myaka. Ameni.