Yowele 3 - Libuka Lya Kuyela

Nyambi ukayata matunga

¹ “Ndaba monenu, mu matena ayo, na shikati shiyo, oho nikabwesha mfuywezi ku Yunda na Yelushalema,

² Nikakungula matunga nimwao na ku baleta ku mukulo wa Yehoshafwati, pe nikabayatishila kuyo, ndaba ya bantu bami ba Ishalela aba benga likona lyami baya banapanzanishi mukati ka matunga, kami banatapa litunga lyami.

³ Banakunu nyela ha bantu bami, kami natambashana ndumbana na mbuyama walwiholwiho, kankanga ba namulandishi na waine pe waine banayinu.”

⁴ “Obe yani kukwami, obe Tile na Shindoni na matunga nimwawo ali mu Fwilishitiya? Muli na kunyumbila ha shuma ninatende ndi? Ndi muli na kunyumbila, nikabweshela milimo yenu yayibi ha mitwe yenu sha wanguwangu.”

⁵ Ndaba munancimbili shiliva na ngolinde, kami munatwala mfuma ya wuheti wami mu matala aba nyambi benu!

⁶ Munalandishi bantu ba Yunda na Yelushalema ku Bangiliki na kubatwala kwakutali na litunga lyabo.

⁷ Ngoboni wuluno nili na kuya naku bashonkomona ku zimbalila nimwazo oko mwabalandishile, pe nikabweshela milimo yenu yayibi ha mitwe yenu.

⁸ Nikalandisha bana benu babalume nanaba ba bambuyama ku bantu ba Yunda, kami nibo bakabalandisha ku litunga lya kwakutali lya Shemba, ebye nibyo anamba Nyambi ya Ngula.

⁹ “Bilika mukati ka matunga ngayi, ‘Liwahishilenu nzita, shonkomonenu bakanzita bangovu, tongweza bakanzita bahenye hahepi na kulwa.

¹⁰ Fulenu zindimi za bikekele byenu kwinga mikwale, na zimpoko zenu kwinga milinga, leha wakupopa ambe ngayi, nili wakushuma.

¹¹ Yekenu wangu, enu matunga nimwenu kufuma ku zimbalila nimwazo, kungulukilenuko.’ ” Obe Nyambi ya Ngula, haya leta bakanzita bobe.

¹² “Leha matunga akalishonkomone niwo ene, pe akeza ku mukulo wa Yehoshafwati, ndaba kuyo nikonikekala na kuyata, matunga aku zimbalila nimwazo.

¹³ Kwata ncekeshi, ndaba bya kuteza byahokakale. Yekenu tulyatangile shinyanca, ndaba mu liteke lya kuzongela munenzala na zintesho zikuhumpoka, ndaba wubi wabo wawunene.”

¹⁴ Makunge na makunge ezile mu mukulo wakuyatisha! Ndaba mutena wa Nyambi ya Ngula uli hahepi, mu mukulo wakuyatisha.

¹⁵ Mutena na ngonda bikashipa, na nyenye zikaleha kubyazima.

Nyambi ukutandilisha bantu bendi

¹⁶ Nyambi ya Ngula ukabulumina mu Ziyoni, kami ukakangokela lizu lyendi mu Yelushalema. Pe mayilu na hano hanci bikakanka. Ngoboni Nyambi ya Ngula ukenga matinino a bantu bendi, shipata sha bantu ba Ishalela.

¹⁷ “Haya mukalimuka ngayi Ami Nyambi ya Ngula, Nyambi yenu, nili mu Ziyoni mu lipili lyami lya Kuyela. Yelushalema ukenga wa kuyela, bayeni bafwako kuka likona.”

¹⁸ Ha mutena uyo, mapili akafwikiwa na mikolobozi ya shinyanca, binkanda bikakuka na mahwe, tushinzi twamu Yunda tukakunkula na mema. Kaheloke ka mema kakafuminina ku Litala lya Nyambi ya Ngula, pe akapita na ku hwenta mu mukulo wa Shitimu.

¹⁹ “Litunga lya Engepita likafutuka mapembe, na litunga lya Endoma likenga libelelengwa lya kubula shuma, ndaba ya mishunga yinatendiwi ku bantu ba mu litunga lya Yunda, ndaba banayiti mukeza wakuluba mulandu mu litunga lyabo.

²⁰ Ngoboni bantu bakazikanga mu Yunda namu Yelushalema ku mikoka nimwayo, mwaya myaka.

²¹ Nikabweshela mulandu kuli baya bayitile mukeza, kuka baleha nahiya nifwako, ndaba Nyambi ya Ngula uli mu Ziyoni.”