Yowele 2 - Libuka Lya Kuyela

Mikumbi kwinga kukeyesha kwa ha Mutena wa Nyambi ya Ngula

¹ Shiba mpandula mu Ziyoni, mbeta ngongi ha lipili lyami lya kuyela, mwanga nimwabo bazika mu litunga lya Yunda bakanke, ndaba mutena wa Nyambi ya Ngula uli hahepi.

² Ukenga mutena wa mincimpwe na ncishilile, ukenga mutena wa makumbi na mincimpwe ya ku shipa. Likunge lya bantu babengi bangovu, bakenzala ha mapili, ngo nehi mincimpwe. Hinga kwatanga ku moneka shuma shanehe, kami, hinga mwaka kukatanga kukamoneka shuma eshe, ku mikoka ya kumbili.

³ Kumbili yabo kukuhoka mundilo, kunyima yabo, kukulasheka milangi ya mundilo, litunga liku moneka ngo mfuba ya Endeni kumbili yabo. Ngoboni kunyima yabo lyengile libelelengwa, pe kowa shuma shikupanza kukwabo.

⁴ Shifwekesha shabo ngo bambishi, bakwituka ngo bambishi ba bakanzita.

⁵ Oho bakukankalala hayilu ya mapili, kukuyuvwanika miyoyo ngo kwenda kwa makoloyi, hinge ndi ngo mundilo ukululuma oho wahokeshanga mwila wakuyuma, hinge ngo ndukusho, ya bakanzita bangovu banaliwahishili kulwa.

⁶ Bantu nimwabo ba kukanka oho ba kubamona, pe ba kuhomba ku meho.

⁷ Ndaba bakwituka ngonehi bakanzita ba kukanca, bakakukandama twimbi ngonehi bakanzita, ku shiya myanya yabo bafwako, kufuma mu zinzila zabo bafwako.

⁸ Kulishindezeka umo na wamina bafwako, bakwenda mu mihoko yabo. Bakupita mukati ka bilwisho, kutwesha kwimikiwa bafwako.

⁹ Bakwitukila mu zinkena, na kwenda ha twimbi, bakwingina mu matala, na kwinginina mu mampananga amatala ngonehi mwizi.

¹⁰ Hanci ha kunyenkana oho bakuya na kulikaka, mayilu akukanka. Mutena na ngonda, bikushipa, na nyenye kukabyazima zifwako.

¹¹ Nyambi ya Ngula ukabilika na kutongweza bakanzita bendi, ndaba bakanzita bendi banengi babengi shikuma, aba bakwombatala mazu wendi bakwinga bangovu. Mutena wa Nyambi ya Ngula wawunene, kami wakutinishiwa. Yani ukutwesha kuwupanza?

Kwihaniwa ku kutenguluka

¹² Nyambi ya Ngula ukwamba ngayi, “Hinge ha shikati shino, tengulukilenu kukwami, na mitima yenu nimwayo na kuzila kulya, na kulila na kutuwa mbingo,

¹³ hinga mutabozola tuhu bya kuvwala, ngoboni mitima yenu yimoneshe kuyena.” Bokenu kuli Nyambi ya Ngula Nyambi yenu, ndaba wenga washikeketima na nceshe, wehalanga kupilama, kami wekala na shishemo sha mwaya mwaka.

¹⁴ Yani ukulimuka ndi ukafutuka hinge ndi ukutenguluka, na kutushiyila mfuywezi za ntupu ya mbuto na ntupu ya waine, ya kuli Nyambi ya Ngula Nyambi yenu?

¹⁵ Shiba mpandula mu Ziyoni, kungula bantu na kubatongweza ngayi bazile kulya,

¹⁶ Kungulenu bantu nimwabo hamo, na kuyelesha shikungulukilo, kungulenu bakulwane, kungulenu na batwanuke, balizilike kuneshe shikungulukilo, na bambututu ba ku mabele nimwabo beze ku shikungulukilo. Hinge banaliyeke sha wuluno, obo bali mu shifupawenga, banafwanini ku shiya litala lyabo, na kwiza ku shikungulukilo.

¹⁷ Bakankombela na bakakutenda milimo ya Nyambi ya Ngula ba ku fwanina kulombela, na kulilila mukati ka kaala na shipana sha Litala lya Nyambi na kwamba ngayi, “Shiyaho bantu bobe, obe Nyambi ya Ngula. Hinga witabila ngayi, bakamatunga, bahepe na kukendula likona lyobe, shumangani eshe enze bakambile ngayi, ‘Haya Nyambi yabo uli kuti?’ ”

Nyambi ukubweshela wilo mu litunga

¹⁸ Niho Nyambi ya Ngula ekalile na shitima ha litunga lyendi, na kuyuvwila nceshe bantu bendi.

¹⁹ Nyambi ya Ngula wakumbwile bantu bendi ngayi, “Haya nili na kumipanika, mbuto ya mpeka, na waine na mazi, ngayi mwikute. Kami kuketabila ngayi mukenduliwe ku matunga nifwako.”

²⁰ Nikafumisha likunge lya bakanzita ba ku ncelele mukatikenu, na kubatandila mu litunga lya nyuminine, na mu libelelengwa. Banzita bendi ba kumbili, nikabatandila mu Liwate lya Mushele, pe bakanzita bendi bamunyima, nikabatandila mu Liwate lyalinene. Nikabalobesha, ndaba yanebye banatende.

²¹ “Obe litunga, hinga utina, ngoboni tangala na ku wahilila, ndaba Nyambi ya Ngula unatende byuma byabinene.

²² Enu tuyamana twa mu lishaka, hinga mutina, ndaba mu mabuyilo amulibelelengwa, muli mwila wakubombola. Mitondo yayimakale mikabo, mitondo ya mikuyu na mikolobozi ya shinyanca, yazongamakale mikabo.

²³ Tangalenu enu bana bamu Ziyoni, na ku wahilila muli Nyambi ya Ngula Nyambi yenu, hanebye anatende. Ndaba unamipaniki shikati shashinene sha mayinza, na kumi lokeshela mvula wamwingi, wa shituwizi na likuhulahoke.

²⁴ Makotwelo akenzala na mbuto, mateke akuzongela akenzala na waine yayipya na mazi a olive.

²⁵ Nikamihingishila myaka iya balile bana bamikumbi, na mikumbi, bakakulobesha nabakakuketozola, bakanzita bami baya natumine hakati kenu.

²⁶ Haya mukekala na byakulya byabingi, kami mukekuta, pe mukalemeesha lizina lya Nyambi ya Ngula Nyambi yenu, ou unatende byabiwahe kukwenu. Ngayi bantu bami, hinga kami bakekala na lisheni kami.

²⁷ Mukalimuka ngayi Ami nili mu Ishalela, Ami, Nyambi ya Ngula Nyambi yenu, kowa wamina kami, pe bantu bami kukekala na lisheni bafwako.”

Nyambi ya Ngula ukuyitila Moyo wa Kuyela

²⁸ “Kwakapita shikati, nikayitila moyo wami ha muntu nimwendi. Bana benu babalume nanaba ba bambuyama, bakalubulula, batukulukazi benu babalume, bakalota milo, pe bandumbana benu, bakamona bimono.

²⁹ Ha matena ayo, nikayitila moyo wami, ha bandungo benu babalume nanaba ba bambuyama.

³⁰ ‘Nikatenda bikomokesho, muyilu na hano hanci, kukekala mukeza, kuka banga mundilo, na makumbi akukakama wishe.

³¹ Mutena ukashipa, na ngonda ukafubila ngo mukeza, oho mutena wa Nyambi ya Ngula, wawunene na wawukalu shilolo ukume.

³² Pe ha shikati shiyo, nimwendi ukalambilila ha lizina lya Nyambi ya Ngula ukapulwishiwa. Aba bakapuluka, bakekala ha lipili lya Ziyoni namu Yelushalema, ngonehi Nyambi ya Ngula anamba, mukati kanobo bakapuluka, mukekala obo anehana Nyambi ya Ngula.”