Yowano 8 - Libuka Lya Kuyela

Mbuyama wawaniwile hatenda wumambe

¹ Ngoboni Yeshu wayile ku lipili lya mitondo ya Olive.

² Oho kwashile lumenemene wezile kami ku Litala lya Nyambi. Bantu nimwabo bezile kukwendi, niho ekalile hanci, pe wabalongeshele.

³ Baka ku longesha ndayano na Bafwalishi baletele mukati mbuyama bawanine hatenda wumambe, pe bamwimikile mukati kabo.

⁴ Bambile kuli Yeshu ngayi, “Mulongeshi, ou mbuyama unawaniwi hatenda wumambe.

⁵ Haya Moshesha mu ndayano watutongwezele ngayi ou mbuyama wanehe uku fwanina kupuhiwa mamanya. Haya obe ukwamba bishini?”

⁶ Bambile ebye mu kumwezeka ngayi bawane ha kumuyatishila. Ngoboni Yeshu wanyongamine, pe watikitile hanci na munwe wendi.

⁷ Oho batwalilileho na kumwipula, wanyongolokele wambile kukwabo ngayi, “Ou wakubula wubi mukati kenu, atatike kumupuha limanya.”

⁸ Niho anyongamine kami, watikitile hanci.

⁹ Ngoboni oho bayuvwile ebye ambile, nimwabo bafumine umo na umo, kutatika na bakulwane. Yeshu washalile ninkayendi na uya mbuyama hinga emana kumbili yendi.

¹⁰ Oho Yeshu anyongolokele wamwipwile ngayi, “Obe mbuyama, kati balikuti? Kati kowa muntu unakuyata ndi?”

¹¹ Mbuyama wambile ngayi, “Hekulu, kowa.” Yeshu wambile kukwendi ngayi, “Nanami kami ku kuyata nifwako. Yanga, ngoboni hinga utenda wubi kami.”]

Yeshu niye lumuni lwa mu kaye

¹² Niho Yeshu ambile kami ku Bafwalishi ngayi, “Ami lumuni lwa mu kaye. Nimwendi ukunkonka, kukenda mu mincimpwe wufwako, ngoboni ukekala na lumuni lwa wumi.”

¹³ Niho Bafwalishi bambile kukwendi ngayi, “Haya ukulipaka obe mwine, ebye ukwamba kaliha bya kupwisha.”

¹⁴ Yeshu wakumbwile kukwabo ngayi, “Hinge ndi nikulipaka amimwine, wupaki wami wa kupwisha, ndaba nikulimuka oku nafuma nanoku nikuya. Ngoboni enu kulimuka oku nafuma nanoku nikuya mufwako.

¹⁵ Mwayatanga na bihanganiko bya wuntu. Ami kuyata muntu nifwako.

¹⁶ Ngoboni shinga nikuyata, nyatilo yami shinga ya kupwisha, ndaba kaliha nili ninkayami, nili na Tate ou wantumine.

¹⁷ Kwatikitiwile mu ndayano zenu ngayi, wupaki wa bantu babili wenga wa kupwisha.

¹⁸ Nikulipaka amimwine, kami na Tate ou wantumine ukumpaka.”

¹⁹ Niho bambile kukwendi ngayi, “Tatiyobe uli kuti?” Yeshu wakumbwile ngayi, “Kundimuka mufwako, hinge Tate kumulimuka mufwako. Shinga mwandimuka, shinga mwalimuka na Tate kami.”

²⁰ Yeshu wambile awa mazu oho alongeshelenga mu Litala lya Nyambi, mu kampenci kaya kekalile na bikongelo bya ntupu. Ngoboni kowa muntu wamukwatile, ndaba shikati shendi oho shilolo shikume.

Kutwesha kuya oku ami nili na kuya mufwako

²¹ Yeshu wambile kami kukwabo ngayi, “Ami nikuya, mukancingancinga, ngoboni mukafwa mu wubi wenu. Oku nikuya, enu kutwesha kukumako mufwako.”

²² Niho Bayunda bambile ngayi, “Kampe ukaliziha ndi, oho akwamba ngayi, ‘Oku nikuya, enu kutwesha kukumako mufwako.’ ”

²³ Yeshu wambile kukwabo ngayi, “Enu muli ba hano hanci, ami nafuma kuyilu. Enu muli ba muno mu kaye, ami kaliha nili wa muno mu kaye.

²⁴ Nibyo namitongweze ngayi, mukafwila mu wubi wenu. Kami mukafwila mu wubi ndi enu kukulupila mufwako ngayi, ‘Ami niye Ami.’ ”

²⁵ Niho bamwipwile ngayi, “Kati obe yani?” Yeshu wakumbwile ngayi, “Hingebene ha kutatika namitongwezele.

²⁶ Nili na byabingi bya kwamba bya ku fwanina kumiyata. Ngoboni ou wantumine wenga wa kupwisha, pe nikutongweza kaye ebye nayuvwu kukwendi.”

²⁷ Kaliha bayuvwishishile ngayi Yeshu wabatongwezelenga bya Tatiyendi.

²⁸ Niho Yeshu ambile ngayi, “Oho mukakatula Mwana Muntu, niho mukalimuka ngayi ‘Ami niye Ami,’ kami ngayi kowa ebye nikutenda na ngovu zami amimwine, ngoboni nikwamba ebye antongwezele Tate.

²⁹ Kami ou wantumine uli na nami. Kunciya ninkayami wufwako, ndaba natendanga ebye bya mu wahililishanga.”

³⁰ Bantu babengi baya bayuvwile Yeshu hamba awa mazu ba kulupililile mumwendi.

Kupwisha kukamishobolola

³¹ Yeshu watongwezele ba Yunda aba ba kulupililile mumwendi ngayi, “Ndi enu mukwombatala ku longesha kwami, mukwinga bandongesha bami,

³² kami mukalimuka kupwisha, pe kupwisha kukamishobolola.”

³³ Bakumbwile kukwendi ngayi, “Etu tuli bazukulya Abulahama hinga twatanga kwinga ndungo ku muntu. Nahiti ukwamba ngayi, ‘Mukashoboloka?’ ”

³⁴ Yeshu waba kumbwile ngayi, “Mwa shikuma nikwamba kukwenu ngayi, ou nimwendi ukutenda wubi wenga ndungo ya wubi.

³⁵ Ndungo kwikala mu lupashi shikati nimwasho wufwako, ngoboni mwana ukwikalililamo.

³⁶ Ndi Mwana unamishobolo, mwa shikuma mukashoboloka.

³⁷ Nikulimuka ngayi muli bazukulya Abulahama. Ngoboni mukushinga kunziha, ndaba kutambula mazu wami mufwako.

³⁸ Ami nikwamba ebye namono kuli Tate, ngoboni enu mukutenda ebye munayuvwu kuli tatiyenu.”

³⁹ Bakumbwile kukwendi ngayi, “Abulahama niye tatiyetu.” Yeshu wambile kukwabo ngayi, “Shinga muli bana ba Abulahama, shinga mukutenda ebye Abulahama atendele.

⁴⁰ Ngoboni haya mukushinga kunziha, ami namitongweze kupwisha oku nayuvwile kuli Nyambi. Abulahama kaliha nibyo atendele.

⁴¹ Mukutenda ebye atendele tatiyenu.” Niho bambile kukwendi ngayi, “Etu kaliha tuli bana ba mu wunjenge. Tuli na Tatiyetu umo tuhu niye bene Nyambi.”

⁴² Yeshu wambile kukwabo ngayi, “Shinga Nyambi wenga Tatiyenu, shinga munahaka. Ndaba nezi kufuma kuli Nyambi kami nili hano. Kaliha ninezi mu shifungo shami, ngoboni sha uya wantumine.

⁴³ Kati shumangani mu kubula kuyuvwa ebye nikwamba? Ndaba ngayi kutwesha kuyuvwa mazu ami mufwako.

⁴⁴ Enu muli bana ba Shatana, niye tatiyenu, kami mukushinga kutenda bifungo bya tatiyenu. Wenga mukakuziha kufuma ku kutatika, kami kaliha watendele kupwisha ndaba mumwendi mowa kupwisha. Kwamba mahalo nisho ekala. Ndaba wenga wa mahalo kami niye tata mahalo.

⁴⁵ Ngoboni ami nikumitongweza kupwisha, niho mu kubula kunkulupila.

⁴⁶ Kati yani kukwenu ukaholola ngayi nili mukawubi? Ndi nikwamba kupwisha, shumangani mu kubula kunkulupila?

⁴⁷ Muntu ukufuma kuli Nyambi ukuyuvwa mazu a Nyambi. Shuma shikuletesha ngayi mubule kuwayuvwa ndaba enu kufuma kuli Nyambi mufwako.”

Yeshu na Abulahama

⁴⁸ Bayunda bakumbwile Yeshu ngayi, “Kati etu kaliha tunamba kupwisha ngayi obe uli Mukashamaliya, kami uli na mayimbwe ndi?”

⁴⁹ Yeshu wakumbwile ngayi, “Ami mayimbwe nifwawo. Nikulemeeka Tate, ngoboni enu kundemeeka mufwako.

⁵⁰ Amimwine kulishingila maleema nifwako. Kwali umo ukuwashinga niye mukakuyata.

⁵¹ Mwa shikuma nikwamba kukwenu ngayi, ndi muntu ukulama lizu lyami, kukafwa wufwako.”

⁵² Bayunda bambile kukwendi ngayi, “Haya tunalimuku ngayi uli na mayimbwe! Abulahama wafwa na bamiluwe bafwa nanibo, pe obe ukwamba ngayi, ‘Ndi muntu ukulama lizu lyami kukafwa wufwako.’

⁵³ Kati obe ukupitakana tatiyetu Abulahama, ou wafwa ndi? Kami bamiluwe nanibo bafwa. Kati obe ukulihanganika ngayi uli yani?”

⁵⁴ Yeshu wakumbwile ngayi, “Ndi nikulileemeka, pe maleema wami kuyavwa afwako. Tate niye ukundeemeka, ou mu kutoya ngayi niye Nyambi yenu.

⁵⁵ Ngoboni shilolo mu mulimuke, ami namulimuka. Ndi nikwamba ngayi kumulimuka nifwako nikenga wa mahalo ngonehe enu, ngoboni nikumulimuka kami nikwombatala lizu lyendi.

⁵⁶ Tatiyenu Abulahama wawahililile ngayi ukamona mutena wami. Waumonene, pe wawahililile.”

⁵⁷ Bayunda bambile kuli Yeshu ngayi, “Shilolo ukume ha myaka makumi mutanu, kati wamumona Abulahama ndi?”

⁵⁸ Yeshu wambile kukwabo ngayi, “Mwa shikuma nikwamba kukwenu ngayi, oho Abulahama shilolo ahemuwe, ‘Ami niko nekalile?’ ”

⁵⁹ Niho Bayunda batolele mamanya ngayi bamupuhe, ngoboni Yeshu waliholekele, pe watutikile mu Litala lya Nyambi.