Yowano 6 - Libuka Lya Kuyela

Yeshu ukulisha makulukazi mutanu a bantu

¹ Munyima yanebye Yeshu wazabukile Liziba lya Ngalileya (hinge ngayi, Liziba lya Timbeliyashi).

² Likunge lyalinene lya bantu lyamukonkele, ndaba bamonene bilimukisho byendi bya kunyongomanisha bakakukola.

³ Yeshu wakandamine ha lipili, pe wekalile hanci na bandongesha bendi.

⁴ Shimbo sha Kupitilila sha Bayunda shekalile hahepi.

⁵ Oho Yeshu ayimbwile meho wendi, wamonene likunge lyalinene lya bantu baya bezilenga kukwendi, wambile kuli Fwilipu ngayi, “Tukalanda kuti mankende ngayi aba bantu mwanga balye?”

⁶ (Wambile nahiyo kwezeka Fwilipu, ngoboni niye walimukile sha kufwanina kutenda.)

⁷ Fwilipu wakumbwile ngayi, “Mankende a ndando ya muwayawaya wa myanda yibili wa shiliba, kutwesha kukonkana aba bantu ngayi umo na umo atambule hinge kakashe afwako.”

⁸ Anduleu umo wa bandongesha, mukonzo wa Shimoni Pita, wambile kuli Yeshu ngayi,

⁹ “Kuli ndumbana kuno, uli na mankende mutanu a mbale na zinci zibili. Ngoboni ebye bikayavwa bishini ku bantu babengi nehe?”

¹⁰ Yeshu wambile ngayi, “Tongwezenu bantu bekale hanci.” (Bantu bekalile ha mwila wawingi wekalile kuyo.) Bantu bashingile kwinga makulukazi mutanu.

¹¹ Niho Yeshu atambwile mankende, wakambililile kuli Nyambi, watapishilile ku bantu bekalile hanci. Watendele shuma shimo kami ku zinci, pe bantu balile ngonehe bashingile.

¹² Bantu nimwabo oho bekutile, Yeshu watongwezele bandongesha bendi ngayi, “Tolenu ncankuncanku zinashalako ngayi kubule sha kuyongala.”

¹³ Bandongesha ba kungwile ncankuncanku za mankende a mbale nimwazo, pe benzalishile zintumba likumi na zibili.

¹⁴ Oho bantu bamonene eshe shimonekesho atendele Yeshu, bambile ngayi, “Mwa shikuma ou niye Muluwe bambile ngayi wafwanina kwiza mukaye!”

¹⁵ Oho Yeshu alimukile ngayi bakushinga kumukwata ngayi ba mwinge mwene, wafumineko, pe wayile ku lipili kwa ninkayendi.

Yeshu ukwenda ha mema

¹⁶ Oho kwengile mazolo, bandongesha ba Yeshu bayile ku liziba,

¹⁷ benginine mu wato, pe batatikile kuvuwa ngayi bazabuke liziba baye mu nciza ku Kapenauma. Oho kwengile wushiku, Yeshu kaliha wakumine kukwabo.

¹⁸ Kwezile nkuli yayinene, pe mema atatikile kunkwancana.

¹⁹ Oho bavuwile makilomita akukuma ku mutanu hinge ku mutanu na imo, oho bamonene Yeshu henda ha mema, heza kwakwipi na wato, batinine,

²⁰ ngoboni Yeshu wambile kukwabo ngayi, “Ami! Hinga mutina.”

²¹ Bawahililile ha kuyaka Yeshu mu wato, pe hohobene wato wakumine ku shibumbo sha kuyo bayilenga.

Bantu bakushinga Yeshu

²² Oho kwashile, likunge lya bantu baya bashalile mu nciza ya liziba, balimukile ngayi hekalile wato umo tuhu. Kami bantu balimukile ngayi Yeshu kaliha wenginine mu wato hamo na bandongesha bendi, ngoboni bandongesha bendi bayile ninkayabo.

²³ Mato amina afumine ku Timbeliyashi ezile na kufuwika ku shibumbo hahepi na mbalila ya haya likunge lya bantu balile mankende oho Mwene amanishile kukambilila.

²⁴ Oho likunge lya bantu bamonene ngayi Yeshu na bandongesha bendi kowa, benginine mu aya mato, pe bayile ku Kapenauma na kushinga Yeshu.

Yeshu niye Linkende lya Wumi

²⁵ Oho bamuwanine mu nciza ya liziba, bepwile Yeshu ngayi, “Mulongeshi, wakuma mwakangani kuno?”

²⁶ Yeshu waba kumbwile ngayi, “Mwa shikuma nikwamba kukwenu ngayi, muli na kuncinga, kaliha ngayi ndaba mwayuvwishishanga bilimukisho, ngoboni ndaba mwalya mankende, pe mwekuta.

²⁷ Hinga mutenda milimo ya byakulya biya bikabola, ngoboni tendenu milimo ya byakulya biya bikakuma ku wumi wa mwaya myaka. Ebye nibyo byakulya biya Mwana Muntu akamipana, ndaba Nyambi Tate unamuyaka limango lya kumwitabilisha.”

²⁸ Niho bamwipwile ngayi, “Tukwinga nahiti ngayi tutende ebye Nyambi akushinga?”

²⁹ Yeshu waba kumbwile ngayi, “Ebye Nyambi akushinga ngayi mutende, binengi kukulupila muli ou anatumu.”

³⁰ Bambile kuli Yeshu ngayi, “Ukutenda shikomokesho ngani ngayi tumone, pe tukukulupile? Ukutenda bishini?

³¹ Batatizetu balile maana mu libelelengwa, ngonehe kwatikitiwile ngayi, ‘Wa bapanikile mankende afumine ku yilu ngayi balye.’ ”

³² Niho Yeshu ambile kukwabo ngayi, “Mwa shikuma nikwamba kukwenu ngayi, Moshesha kaliha wamipanine mankende afumine kuyilu, ngoboni Tate ukumipana mankende akupwisha akufuma kuyilu.

³³ Ndaba mankende Nyambi apanikanga, enga niye ou nahuluku kufuma kuyilu, kami ukupana wumi ku kaye.”

³⁴ Bambile kuli Yeshu ngayi, “Mwene, tupane awa mankende matena nimwawo.”

³⁵ Yeshu wambile kukwabo ngayi, “Ami linkende lya wumi, nimwendi ukwiza kukwami kukekala na nzala wufwako, kami ou ukukulupila mumwami kukekala na linyontwa wufwako.

³⁶ Ngoboni nambile kukwenu ngayi munamono, ngoboni kukulupila mufwako.

³⁷ “Nimwabo aba Tate akumpana, bakeza kukwami. Kami muntu nimwendi ukwiza kukwami, kukamutanda nifwako,

³⁸ ndaba nahuluku kufuma kuyilu nikutenda shamutima wendi ou wantumine, kaliha ngayi nitende shamutima wami.

³⁹ Pe shamutima wendi ou wantumine ngayi hinga kukayongala hinge umo kunaba ampanine, ngoboni ngayi nikabashangule ku bafu ha mutena wa kukotoka.

⁴⁰ Ndaba eshe nisho shamutima wa Tate ngayi muntu nimwendi uku mona Mwana na kumukulupila, ekale na wumi wa mwaya myaka, kami nikamushangula ku bafu ha mutena wa kukotoka.”

⁴¹ Bayunda bangungutile kukwendi, ndaba wambile ngayi, “Ami linkende linafumu kuyilu.”

⁴² Bambile ngayi, “Kati ou kaliha niye Yeshu, mwana Yoshefwa ndi? Tukulimuka tatiyendi na mandiyendi. Haya ukwamba nahiti ngayi, ‘Nahuluku kufuma kuyilu?’”

⁴³ Yeshu waba kumbwile ngayi, “Hinga mungunguta mukatikenu.

⁴⁴ Kowa muntu ukwiza kukwami ndele Tate ou wantumine amukoke. Kami nikamushangula ha mutena wa kukotoka.

⁴⁵ Bamiluwe batikitile ngayi, ‘Bantu nimwabo bakalongeshiwa kuli Nyambi.’ Muntu nimwendi ukayuvwilila kuli Tate na kulilongesha kukwendi ukwiza kukwami.

⁴⁶ Kaliha ngayi muntu nimwendi wamona Tate, ndele tuhu ou unafumu kuli Nyambi niye wamona Tate.

⁴⁷ Mwa shikuma nikwamba kukwenu ngayi, niye ukukulupila, uli na wumi wa mwaya myaka.

⁴⁸ Ami linkende lya wumi.

⁴⁹ Batatizenu balile maana mu libelelengwa, ngoboni bafwile.

⁵⁰ Ngoboni linkende linafumu kuyilu linezi ngayi muntu nimwendi ukalyako akabule kufwa.

⁵¹ Ami linkende lya wumi liyo lyafumine kuyilu. Ndi muntu ukulya kunelye linkende ukayoya mwaya myaka. Linkende nikapana nilwo lutu lwami, luyo nikapana ku bakakaye ngayi bakekale na wumi.”

⁵² Niho Bayunda balikananganishile mukati kabo ngayi, “Ou muntu ukutwesha nahiti kutupanika lutu lwendi ngayi tulye?”

⁵³ Yeshu wambile kukwabo ngayi, “Mwa shikuma nikwamba kukwenu ngayi, ndele mulye lutu lwa Mwana Muntu na kunwa mukeza wendi, ndelewa kukekala na wumi mufwako.

⁵⁴ Nimwendi ukulya lutu lwami na kunwa mukeza wami uli na wumi wa mwaya myaka, kami nikamushangula ha mutena wa kukotoka.

⁵⁵ Ndaba lutu lwami lwenga byakulya bya kupwisha, kami mukeza wami wenga bya kunwa bya nkama.

⁵⁶ Nimwendi ukulya lutu lwami na kunwa mukeza wami ukwikala mumwami, kami ami nikwikala mumwendi.

⁵⁷ Ngonehe Tate wakuyoya antumine nami kami nikuyoya ndaba ya Tate. Nohobene, uya ukalya ami, ukekala na wumi mumwami.

⁵⁸ Elye nilyo linkende lyafumine kuyilu, bankakazenu balile maana kami bafwile, ngoboni uya ukalya elye linkende, ukayoya mwaya myaka.”

⁵⁹ Yeshu wambile ebye oho alongeshelenga mu shinangonge ku Kapenauma.

Mazu a wumi wa mwaya myaka

⁶⁰ Bandongesha ba Yeshu babengi oho bayuvwile ebye bambile ngayi, “Kulongesha oku kwakukalu shikuma. Yani ukutwesha kubitambula?”

⁶¹ Yeshu walimukile ngayi bandongesha bendi bangungutile ndaba yanebye. Pe wabepwile ngayi, “Kati ebye binakushinga kumi kwangisha ndi?

⁶² Mukenga nahiti ndi mukamona Mwana Muntu hakandama kuboka oku ekalile mwaka?

⁶³ Moyo wa Nyambi ukupanika wumi, ngovu za muntu kowa ebye zikutenda. Mazu ninamba kukwenu niwo Moyo, kami niwo wumi.

⁶⁴ Ngoboni kuli bamina kukwenu bakubula kukulupila.” (Ndaba Yeshu walimukile kufuma ku kutatika baya bakabula kumukulupila, kami wamulimukile uya ukamubeba.)

⁶⁵ Pe wambile ngayi, “Ebye nibyo namitongwezele ngayi, kowa muntu wakutwesha kwiza kukwami, ndele Tate amwitabilishe.”

⁶⁶ Kufuma ku shikati shiyo, bandongesha bendi babengi babokele, kami bashiyile kumukonka.

⁶⁷ Yeshu wepwile balikumi na babili ngayi, “Kati nenu kami mukushinga kuboka ndi?”

⁶⁸ Shimoni Pita wakumbwile ngayi, “Mwene, tukaya kuli yani? Obe uli na mazu a wumi wa mwaya myaka.

⁶⁹ Kami tunakulupili na kulimuka ngayi obe uli wa Kuyela wuya unafumu kuli Nyambi.”

⁷⁰ Niho Yeshu akumbwile ngayi, “Kati kaliha namihatile balikumi na babili ndi? Ngoboni wamina kukwenu nengi Shatana!”

⁷¹ Watoyele Yundashi mwana Shimoni Ishikalyote. Ndaba Yundashi, hinge wengile umo wa bandongesha likumi na babili, niye ukamubeba.