Yowano 5 - Libuka Lya Kuyela

Yeshu ukunyongomanisha muntu ku liziba lya Mbetishayinda

¹ Munyima yanebye, Yeshu wayile ku Yelushalema ku shimbo sha Bayunda.

² Mu Yelushalema hahepi na Lipangati lya Bambelele mwekalile liziba lyatumbiwile mu Shihebelu ngayi Mbetizata. Kuyo kwekalile mazezelo mutanu. Mbetishaza mu Shialamayika ngayi Mbeteshayinda.

³ Muya mu mazezelo mwalanganinenga bantu babengi bakakukola, tushishitwa na ba kupenga na bakakalepa, baya batatililenga kuheloka kwa mema.

⁴ Ndaba ha shikati na shikati lingeloyi lya Mwene lya kunkulukilenga mu liziba na kuhelokesha mema. Wa kutatika kwingina mu mema ali na kuheloka, pe wanyongomanine ku wulweli nimwawo ekalile nawo.

⁵ Hakati ka bayo bakakukola hekalile muntu ou wakolele myaka makumi ahatu na mutanu na yihatu.

⁶ Oho Yeshu amumonene walimukile ngayi walanganine kuyo shikati shashitali, pe wambile kukwendi ngayi, “Ukushinga kunyongomana ndi?”

⁷ Mukakukola wakumbwile ngayi, “Hekulu, nifwendi muntu wakunkatwila mu liziba shikati sha kuheloka kwa mema, oho nikushinga kuyamo, wamina ha kumpita kumbili ha kwingina.”

⁸ Yeshu wambile kukwendi ngayi, “Katuka ushimbe wulili wobe, wende.”

⁹ Hohobene uya muntu wanyongomanine, washimbile wulili wendi, pe wendele. Shuma eshe shatendiwile ha Mutena Wakukatala.

¹⁰ Niho Bayunda bambile kuli ou muntu wanyongomanine ngayi, “Lelo Mutena Wakukatala, ndayano kwitabilisha ngayi ushimbe wulili wobe zifwako.”

¹¹ Ngoboni waba kumbwile ngayi, “Muntu nanyongomanishi unantongweze ngayi nishimbe wulili wami, pe nende.”

¹² Niho bamwipwile ngayi, “Kati ou muntu yani unakutongweze ngayi ushimbe wulili wobe wende?”

¹³ Ngoboni ou muntu wanyongomanine kaliha wamulimukile, ndaba Yeshu wabembulukilile mu likunge lya bantu.

¹⁴ Munyima, Yeshu wakamuwanine mu Litala lya Nyambi, wambile kukwendi ngayi, “Mona, unanyongomana. Hinga utenda wubi kami, kutina bya kupitakana ebye bikeza kukwobe.”

¹⁵ Uya muntu wayile, pe wakatongwezele Bayunda ngayi Yeshu niye unamunyongomanishi.

¹⁶ Niho Bayunda batatikile kuyandisha Yeshu, ndaba watendele ebye ha Mutena Wakukatala.

¹⁷ Ngoboni Yeshu waba kumbwile ngayi, “Tate ushili kutenda milimo nihano na nami nili na kutenda milimo.”

¹⁸ Nohobene Bayunda bashingile shikuma kumuziha, ndaba wabulile kukiluka tuhu Mutena Wakukatala ngoboni wambile kami ngayi Nyambi wenga Tatiyendi, pe walifwanikizile hamo na Nyambi.

Ngovu za Mwana Muntu

¹⁹ Yeshu wambile kukwabo ngayi, “Mwa shikuma nikwamba kukwenu ngayi, Mwana kutwesha kutenda shuma shimo ninkayendi wufwako, ngoboni watendanga tuhu ebye aku mona Tatiyendi hatenda, ndaba ebye akutenda nimwabyo nibyo kami Mwana akutenda.

²⁰ Ndaba Tate uku haka Mwana, pe unamumoneshe ebye akutenda. Kami Tate ukamumonesha milimo ya kupitakana eye, pe enu nimwenu mukakomoka.

²¹ Ngoboni nehi Tate akushangula bafu na kubapana wumi nahiyo kami Mwana ukupana wumi kuli aba akushinga.

²² Tate kuyata muntu wufwako, ngoboni unapana Mwana ngayi enge mukakuyata,

²³ ngayi bantu nimwabo mwanga balemeeke Mwana nehi ba kulemeeka Tate. Ou ukubula kulemeeka Mwana, kulemeeka Tatiyendi ou wamutumine wufwako.

²⁴ Mwa shikuma nikwamba kukwenu ngayi, ou nimwendi ukuyuvwa mazu wami na kukulupila ou wantumine, uli na wumi wa mwaya myaka. Kuyatiwa wufwako, ngoboni unafumu ku kufwa unezi ku wumi.”

²⁵ Mwa shikuma nikwamba kukwenu ngayi, “Shikati shili na kwiza, wuluno shakumakale, oho bafu bakayuvwa lizu lya Mwana Nyambi, pe baya bakayuvwako bakayoya.

²⁶ Nehi Tate enga mwine wumi nahiyo kami unapana Mwanendi ngayi enge mwine wumi.

²⁷ Kami unamupana ngovu za kuyata bantu, ndaba nengi Mwana Muntu.

²⁸ Hinga mukomoka ebye, shikati shili na kwiza oho bafu bali mu binzimbi nimwabo bakayuvwa lizu lyendi

²⁹ kami bakafumamo. Bantu baya batendele byakwoloka, bakashangukila ku wumi, kami baya batendele byabibi, bakashangukila ku kunonga.”

Wupaki kuli Yeshu

³⁰ “Kutwesha kutenda shuma na ngovu zami nifwako. Nikuyata ngonehe Tate akuntongweza, kami nayatanga mwakwoloka, ndaba kushinga shifungo shami nifwako, ngoboni shifungo sha Tate ou wantumine.

³¹ “Ndi nikupaka byami amimwine, pe kupaka kwami kaliha kwa kupwisha.

³² Kwali wamina ou ukupaka byami, pe nikulimuka ngayi eshe akupaka hahami sha kupwisha.

³³ Mwatumine miluwe kuli Yowano, kami naniye wapakile bya kupwisha.

³⁴ Kaliha ngayi ami niku fwanina kutambula wupaki ku muntu, ngoboni nikwamba ebye ngayi mupuluke.

³⁵ Yowano wengile ngo lumuni lwa kubanga na kubyazima, kami enu mwetabilile ku wahilila mu lumuni lwendi mu shikati shashishe.

³⁶ Ngoboni nili na wupaki wakupitakana wa Yowano, ndaba milimo eye ampanikile Tate ngayi niyimanishe niyo nikutenda, eye milimo yikumpaka ngayi Tate niye wantumine.

³⁷ Na Tate ou wantumine ukupaka byami. Enu hinga mwatanga kuyuvwa lizu lyendi, hinge ku mona lupala lwendi,

³⁸ kami lizu lyendi kwikala mumwenu lifwako, ndaba kukulupila muli ou atumine Tate mufwako.

³⁹ Enu mu kushingishisha byatikitiwile, ndaba mu kuhanganika ngayi mumwabyo mu kuwanamo wumi wa mwaya myaka. Kami ebye byatikitiwa bikupaka byami!

⁴⁰ Ngoboni enu munakana kwiza kukwami ngayi mwikale na wumi.

⁴¹ “Kushinga maleema ku bantu nifwako.

⁴² Ngoboni nikulimuka ngayi mowa shishemo sha Nyambi mu mitima yenu.

⁴³ Ami ninezi mu lizina lya Tate, kuntambula mufwako, ngoboni wamina ukwiza mu lizina lyendi niye mwine, mu kumutambula.

⁴⁴ Mukushinga kutambula maleema umo kuwamina, ngoboni kushinga maleema anafumu kuli Nyambi umo pele mufwako. Haya enu mukatwesha kukulupila nahiti kukwami?

⁴⁵ Hinga muhanganika ngayi nikamibangila kuli Tate. Moshesha ou munakulupili mumwendi niye ukamibangila mulandu.

⁴⁶ Shinga mwakulupilile Moshesha, shinga munankulupili, ndaba niye watikitile byami.

⁴⁷ Ngoboni ndi kukulupila mufwako ebye atikitile, mukakulupila nahiti mazu wami?”