Yowano 4 - Libuka Lya Kuyela

Yeshu na mbuyama waku Shamaliya

¹ Bafwalishi bayuvwile ngayi Yeshu uli na kuzubilisha bandongesha babengi kupitakana Yowano.

² (Hinge noho, Yeshu niye kaliha wazubilishilenga ndele tuhu bandongesha bendi nibo bazubilishilenga.)

³ Oho Yeshu alimukile ebye, wafumine ku Yundeya, pe wabokele ku Ngalileya.

⁴ Oho ayilenga wahanganikile kupita nzila ya Shamaliya.

⁵ Mu Shamaliya wakumine ku munzi watumbiwa ngayi Shika hahepi na mfuba iya Yakobo apanikile mwanendi Yoshefwa.

⁶ Lishima lya Yakobo lyekalile kuyo. Yeshu wekalile hanci ku lishima, ndaba ya kukwanga ha mukala. Shengile shikati sha mwaana oho mutena uli hakati ka mutwe.

⁷ Mbuyama wa Kashamaliya wezile na kutekula mema, pe Yeshu wambile kukwendi ngayi, “Nikulombako mema akunwa.”

⁸ (Ndaba bandongesha bendi bayile mu munzi na kulanda byakulya.)

⁹ Mbuyama wambile kukwendi ngayi, “Obe uli Kayunda nahiti ukunyepa mema kukwami ami mbuyama wa Kashamaliya?” (Ndaba Bayunda kaliha baliyuvwilenga na Bakashamaliya.)

¹⁰ Yeshu wamukumbwile ngayi, “Shinga walimuka shishemo sha Nyambi na kulimuka ngayi ou unanyepe kukwobe mema akunwa yani, shinga unanyepe kukwendi, shinga unakupana mema a wumi.”

¹¹ Mbuyama wambile kukwendi ngayi, “Hekulu, sha kutekwisha wufwasho, kami lishima lya kunonka. Kati mema a wumi wukawana kuti?

¹² Elye lishima lya kutushiyila nkaka yetu Yakobo. Niye na bana bendi na matanga wendi a bimuna nimwabo nimo banwinenga. Kati obe uli wamunene kupitakana Yakobo ndi?”

¹³ Yeshu wambile kukwendi ngayi, “Muntu nimwendi ukunwa awa mema ukekala na linyontwa kami,

¹⁴ ngoboni nimwendi ou ukanwa mema nikamupanika kukekala na linyontwa wufwako. Mema nikamupanika akenga mumwendi kaheloke ka mema aya akamupana wumi wa mwaya myaka.”

¹⁵ Mbuyama wambile kukwendi ngayi, “Hekulu, mpeko owo mema ngayi nibule kwikala na linyontwa, hinge nibule kwizanga kuno na kutekula mema.”

¹⁶ Yeshu wambile kukwendi ngayi, “Yanga ukehane mukokwobe, pe mwize kuno.”

¹⁷ Mbuyama wamukumbwile ngayi, “Nifwaye mukokwami.” Yeshu wambile kukwendi ngayi, “Unamba shiwahe hakwamba ngayi, ‘Nifwaye mukokwami.’

¹⁸ Ndaba wayekiwile ku balume mutanu, pe ou mulume uli nendi wuluno kaliha mukokwobe. Eshe unamba sha kupwisha.”

¹⁹ Mbuyama wambile kukwendi ngayi, “Hekulu namono ngayi uli muluwe.

²⁰ Bankakazetu balemeshelenga Nyambi ha lipili elye, ngoboni enu Bayunda mukwamba ngayi ku Yelushalema niko bantu ba ku fwanina kulemeshela Nyambi.”

²¹ Yeshu wambile kukwendi ngayi, “Obe mbuyama nkulupile, shikati shikeza oho mukabula kulemesha Tate ha lipili elye hinge ku Yelushalema.

²² Enu Bakashamaliya mu kulemesha ou mu kubula kulimuka. Ngoboni Etu Bayunda tukulemesha ou twalimuka, ndaba ku Bayunda niko kunafuminini kupuluka.

²³ Ngoboni shikati shili na kwiza, haya wuluno shakumakale oho bakakulemesha ba kupwisha bakalemesha Tate mu moyo na mu kupwisha, ndaba Tate washinga bakakumulemesha banoho.

²⁴ Nyambi wenga Moyo, kami baya ba kumulemesha ba ku fwanina kumulemesha mu moyo na mu kupwisha.”

²⁵ Mbuyama wambile kukwendi ngayi, “Nikulimuka ngayi Meshiya uli na kwiza, oho akeza ukatutontwelela byuma nimwabyo.”

²⁶ Yeshu wambile kukwendi ngayi, “Amibene, ami nili na kwamba kukwobe.”

²⁷ Shikati shiyabene bandongesha ba Yeshu babokele, bakomokele ha kuwana ulinakwambola na mbuyama. Ngoboni kowa wambile kuli uya mbuyama ngayi, “Ukushinga bishini?” Hinge kwipula Yeshu ngayi, “Bishini ukwambila nendi?”

²⁸ Niho mbuyama ashiyile ntesho yendi ya mema, wabokele ku munzi, wambile ku bantu ngayi,

²⁹ “Yekenu mumone muntu unantongweze nimwabyo biya natendanga. Kampe niye Kilishitu?”

³⁰ Bantu bafumine mu munzi, pe bezile kuli Yeshu.

³¹ Shikati shiyo bandongesha bendi banyepele ngayi, “Mulongeshi, lya taha.”

³² Ngoboni Yeshu waba kumbwile ngayi, “Nili na byakulya biyo enu mu kubula kulimuka.”

³³ Niho bandongesha bendi balyambashanine mukati kabo ngayi, “Kunekala muntu unamuletele byakulya ndi?”

³⁴ Yeshu wambile kukwabo ngayi, “Byakulya byami byenga kutenda shifungo shendi ou wantumine na kumanisha mulimo wendi.

³⁵ Kaliha mwambanga ngayi, ‘Kunashala zingonda zinaa, niho shikati sha kuteza shikume.’ Nikumitongweza ngayi, monenu ayo mafuba! Mbuto yahokakale, pe shikati sha kuteza shakumakale.

³⁶ Mukakuteza ukutambula ngo ku mulimo akutenda, kami ukukungwila mbuto mu wumi wa mwaya myaka, ngayi mukakukuba na mukakuteza bawahilile hamo.

³⁷ Nyambilo eye yenga ya kupwisha ya kwamba ngayi, ‘Umo ukukuba, kami wamina ukuteza.’

³⁸ Namitumu mu kuteza mu mfuba iya mwabulile kutenda milimo. Bantu bamina batendele mulimo, enu mu kuwaninaho ha mulimo wabo.”

³⁹ Bakashamaliya babengi ba mu munzi muyo bakulupilile Yeshu ndaba ya wupaki wa uya mbuyama ou ambile ngayi, “Unantongweze nimwabyo ebye natendele.”

⁴⁰ Oho Bakashamaliya bakumine kuli Yeshu, bamunyepele ngayi ekale nabo, pe wekalile kuyo matena abili.

⁴¹ Kami babengi bamina bakulupilile ndaba ya mazu a Yeshu.

⁴² Bambile kuli mbuyama ngayi, “Tunakulupili, kaliha ndaba ya mazu obe tuhu, ngoboni etu bamwine tunaliyuvwili, kami tukulimuka ngayi mwa shikuma ou muntu nengi Mukakupulwisha kaye.”

Yeshu ukunyongomanisha mwana shilolo

⁴³ Munyima yakwikala matena abili kuyo, Yeshu wayile ku Ngalileya.

⁴⁴ Yeshu niye mwine wambile ngayi, “Muluwe ufwao maleema mu litunga lyendi.”

⁴⁵ Oho akumine ku Ngalileya, bantu ba kuyo bamutambwile, ndaba bayile ku Yelushalema ku Shimbo sha Kupitilila, kami bamonene nimwabyo ebye Yeshu atendele shikati sha shimbo.

⁴⁶ Yeshu wabokele kami ku Kana mu Ngalileya, kuya afutwile mema kwinga waine. Kwekalile shilolo wamina, ou mwanendi wekalile na kukola ku Kapenauma

⁴⁷ Oho ayuvwile ngayi Yeshu unezi ku Ngalileya kufuma ku Yundeya, wayile kukwendi, pe wamulombele ngayi aye nendi ku Kapenauma na kunyongomanisha mwanendi washingilenga kufwa.

⁴⁸ Yeshu wambile kukwendi ngayi, “Enu kutwesha kukulupila mufwako ndele munamono bilimukisho na bikomokesho.”

⁴⁹ Shilolo wambile ngayi, “Hekulu, tuyenga taha oho mwanami shilolo afwe.”

⁵⁰ Yeshu wambile kukwendi ngayi, “Yanga, mwanobe ukayoya!” Uya muntu wakulupilile mazu ambile Yeshu, pe wayile.

⁵¹ Oho ayilenga kukwabo, walihanganine na bakamilimo bendi ha nzila bamutongwezele ngayi, “Mwanobe nayoyo!”

⁵² Niho abepwile shikati osho mwana aliyuvwile shiwahe. Pe bakumbwile kukwendi ngayi, “Mashikashika amumana nzona shikati sha wulikumi na kahatu.”

⁵³ Niho tatiyendi alimukile ngayi shengile shikati shiyo Yeshu ambile kukwendi ngayi, “Mwanobe ukayoya.” Niho akulupilile hamo na baka litala lyendi nimwabo.

⁵⁴ Eshe shengile shikomokesho sha wubili shiya Yeshu atendele oho akumine ku Ngalileya kufuma ku Yundeya.