Yowano 20 - Libuka Lya Kuyela

Yeshu ukushanguka ku bafu

¹ Ku lumenemene shikuma, ha mutena wa Shunda, Maliya waku Mangandalena wayile ku shinzimbi, pe wamonene ngayi limanya banalifumishi ku shinzimbi.

² Maliya wetukile kuya kuli Shimoni Pita na ku ndongesha wamina ou Yeshu ahakile, wambile kukwabo ngayi, “Banafumishi Mwene mu shinzimbi, kulimuka oku ba na muyaka tufwako!”

³ Niho Pita na ndongesha wamina, bayile ku shinzimbi.

⁴ Wubili wabo betukile, ngoboni uya ndongesha wamina wetukile shikuma kupitakana Pita, pe walimenekele kukuma ku shinzimbi.

⁵ Wanyongamine, pe wamonene makwiza akulelema ekalilemo, ngoboni kaliha wengininemo.

⁶ Shimoni Pita wamukonkelenga munyima, oho akumine wenginine mu shinzimbi. Wawanine makwiza a kulelema ekalilemo,

⁷ na likwiza lyekalile ku mutwe wa Yeshu. Liyo likwiza kaliha lyekalile hamo na makwiza amina, ngoboni lyekalile haninkayalyo hinga lyalivungavunga.

⁸ Niho ndongesha wamina ou walimenekele ku shinzimbi enginine mu shinzimbi, wamonene, pe wakulupilile.

⁹ (Hinge noho, kaliha bayuvwishishile ebye byatikitiwile ngayi uku fwanina ku shanguka ku bafu.)

¹⁰ Niho bandongesha babokele ku munzi.

Yeshu ukulimonekesha kuli Maliya waku Mangandalena

¹¹ Maliya wemanine ha munkanda wa shinzimbi halila. Oho alililenga wanyongamine, pe watilaminine mu shinzimbi.

¹² Wamonene mangeloyi abili hinga avwala bya kutuba, ekalile mu shinzimbi haya bayakile mutuntu wa Yeshu, limo ku mutwe, lyamina ku mawulu.

¹³ Ambile kukwendi ngayi, “Mbuyama, ndabangani ukulila?” Wakumbwile ngayi, “Ndaba banafumishi Mwene yami, kami kulimuka oku ba na muyaka nifwako!”

¹⁴ Oho ambile noho, washetukile kunyima, pe wamonene Yeshu hinga emana, ngoboni kaliha wamulimukile ngayi niye Yeshu.

¹⁵ Yeshu wambile kukwendi ngayi, “Mbuyama, ndabangani uli na kulila? Kati yani ou uli na kushinga?” Maliya wahanganikile ngayi niye ndimi, wambile kukwendi ngayi, “Hekulu, ndi obe unamufumishi kuno, ntongweze oku unamuyaka, mwanga nikamufumisheko.”

¹⁶ Yeshu wambile kukwendi ngayi, “Maliya!” Pe Maliya watengulukile, wambile kukwendi mu Shihebelu ngayi, “Laboni!” (Kutontolola ngayi, “Mulongeshi.”)

¹⁷ Yeshu wambile kukwendi ngayi, “Hinga unkwata ndaba shilolo niye kuli Tate. Ngoboni yanga ku bawushinda wami, ukabatongweze ngayi nilinakuboka kuli Tate, niye kami Tatiyenu, kuli Nyambi yami, niye kami Nyambi yenu.”

¹⁸ Maliya waku Mangandalena wayile, pe watongwezele bandongesha ngayi, “Ninamono Mwene.” Kami wabatongwezele ebye Yeshu ambile kukwendi.

Yeshu ukulimonekesha ku bandongesha bendi

¹⁹ Ha mutena wakutatika wa Shunda mazolo, bandongesha bakungulukile hamo hinga bashinka bihala ndaba ya kutina Bayunda. Niho Yeshu ezile na kwimana mukati kabo, wambile kukwabo ngayi, “Ku mwena kwikale kukwenu.”

²⁰ Oho ambile noho wabamoneshele maboko endi na ku lupati lwendi. Niho bandongesha bawahililile oho bamonene Mwene.

²¹ Yeshu wambile kukwabo kami ngayi, “Ku mwena kwikale kukwenu. Ngonehe Tate antumine na nami nilinakumituma nahiyo.”

²² Oho ambile noho, niho oyelele hahabo, pe wambile kukwabo ngayi, “Tambulenu Moyo wa Kuyela.

²³ Ndi mukayatila wubi wa bantu, pe bakayatiwila. Ndi mukabula kuyatila wubi wabo, pe kukayatiwila bafwako.”

Yeshu na Tomashi

²⁴ Ngoboni Tomashi (watumbiwile Mbuyu), umo wa balikumi na babili, kaliha wekalile nabo oho Yeshu ezile.

²⁵ Nohobene bandongesha bamina bamutongwezele ngayi, “Tunamono Mwene!” Tomashi wambile kukwabo ngayi, “Ndele nimone mu maboko wendi mabenga a zindonda na kukwata na minwe yami mu mabenga na kukwata na liboko lyami ku lupati lwendi, kuka kulupila nifwako.”

²⁶ Munyima ya matena mutanu na ahatu, bandongesha kami bekalile mu litala na Tomashi wekalile nabo. Niho Yeshu ezile, bihala hinga bya shinkiwa, wemanine mukati kabo, wambile ngayi, “Ku mwena kwikale kukwenu.”

²⁷ Niho ambile kuli Tomashi ngayi, “Kwata na minwe yobe omwe, kami mona mu maboko ami. Tandubula liboko lyobe ukwate ku lupati lwami. Shiya nkani, pe ukulupile!”

²⁸ Tomashi wamukumbwile ngayi, “Mwene yami na Nyambi yami!”

²⁹ Yeshu wambile kukwendi ngayi, “Tomashi, ukukulupila ndaba unamono. Bali na mfuywezi aba banakulupili kwakubula ku mona!”

Bihanganiko bya libuka elye

³⁰ Nohobene Yeshu watendele bikomokesho byamina byabingi ku meho a bandongesha bendi, ebye binabulu kutikitiwa mu libuka elye.

³¹ Ngoboni ebye binatikitiwi mwanga mukulupile ngayi Yeshu niye Kilishitu, Mwana Nyambi, kami ngayi na kukulupila mumwendi mwikale na wumi mu lizina lyendi.